އަމީނީމަގު މަރާމާތު ކުރުމުގެ މަސައްކަތް ކުރިއަށްދާތީ، އެ ސަރަހައްދުގެ ބައެއް މަގުތައް ބަންދުކުރުމާ ގުޅިގެން އާރްޓީއެލްގެ ބައެއް ރޫޓުތަކުގެ ބަހުގެ ހިދުމަތަށް ބޮޑެތި ބަދަލުތަކެއް ގެނެސްފިއެވެ.

އެމްޓީސީސީން ބުނިގޮތުގައި މި ބަދަލުތަކުގެ ތެރެއިން R11 ރޫޓުގެ ބަހުގެ ހިދުމަތް މަސައްކަތް ނިމެންދެން މުޅިން މެދުކަނޑާލުމަށް ވަނީ ނިންމާފައެވެ.

Ad by Hajj Corporation

އެމްޓީސީސީން މައުލޫމާތު ދީފައިވާ ގޮތުގައި، އަމީނީމަގުގެ މަރާމާތަށް އިއްޒުއްދީން މަގުން ފެށިގެން ދަރުމަވަންތަ ހޮސްޕިޓަލާ ހަމައަށް އޮންނަ ސަރަހައްދު މިރޭ 12:00 އިން ފެށިގެން ބަންދުކުރާނެއެވެ. މި މަސައްކަތް މި މަހުގެ 28 ވަނަ ދުވަހުގެ ނިޔަލަށް ކުރިއަށްދާނެ ކަމަށް ލަފާކުރެވެއެވެ.

މަގު ބަންދުކުރުމާ ގުޅިގެން އައިޖީއެމްއެޗް، ދަރުމަވަންތަ ހޮސްޕިޓަލް އަދި ސޯޝަލް ސެންޓަރު ކައިރީގައި ހުންނަ ބަސް ސްޓޮޕްތަކަށް ބަހުގެ ހިދުމަތް ވަނީ މެދުކަނޑާލާފައެވެ. މީގެ އިތުރުން R10 ރޫޓުގެ ބަސްތައް ދަރުމަވަންތަ ބަސް ސްޓޮޕްގެ ބަދަލުގައި ދެން މަޑުކުރާނީ ވެސްޓް ޕާކް ކައިރީގައި ހުންނަ ބަސް ސްޓޮޕަށެވެ.

އަދި R1، R3، R7 އަދި R15 ރޫޓުގެ ބަސްތަކުގެ ހިދުމަތަށް ވެސް ވަނީ ބަދަލު ގެނެސްފައެވެ. މި ރޫޓުތަކުގެ ބަސްތައް އެންމެ ފަހު މަންޒިލެއްގެ ގޮތުގައި މަޑުކުރާނީ މާފަންނު ބަސް ޓާމިނަލަށެވެ. މި ބަދަލުތަކަކީ މަގު ހެދުމުގެ މަސައްކަތް ކުރިއަށްދާ ވަގުތު އާންމު ދަތުރުފަތުރަށް ދިމާވެދާނެ ދަތިތައް ކުޑަކުރުމަށް އެޅި ފިޔަވަޅުތަކެކެވެ.

މަގު ބަންދުކޮށްގެން ކުރިއަށްގެންދާ މި މަސައްކަތް ނިމުމުން، ބަހުގެ ހިދުމަތްތައް އަލުން ކުރިއެކޭ އެއްގޮތަށް އިއާދަކުރެވޭނެ ކަމަށް ބެލެވެއެވެ.