ލ. އަތޮޅުން ފުރައިގެން ހުވަދު އަތޮޅަށް އަށް މީހުންނާއެކު ދަތުރުކުރި ސަޕްލައި ދޯންޏެއް ދިޔަވެ، އަޑިއަށްދާ ކަމުގެ މައުލޫމާތު ލިބިގެން އެމީހުން ސަލާމަތް ކުރުމުގެ މަސައްކަތް ކުރަމުން ދަނިކޮށް، ދޯނި އަޑިއަށް ގޮސް ތިން މީހަކު ގެއްލިއްޖެއެވެ.

މި ހާދިސާ ހިނގާފައިވަނީ 5 އޯގަސްޓް 2026 ވީ ބުދަ ދުވަހުގެ ރޭގެ ވަގުތެއްގައެވެ.

Ad by Hajj Corporation

ފުލުހުން މައުލޫމާތު ދޭ ގޮތުގައި، ދޯނި ދިޔަވެ އަޑިއަށްދާ ކަމުގެ ރިޕޯޓް ލިބިފައިވަނީ އެރޭގެ 23:22 އެހައިކަންހާއިރުއެވެ. މި ރިޕޯޓާ ގުޅިގެން ފުލުހުންނާއި އެމްއެންޑީއެފް ގުޅިގެން ދޯނި ސަލާމަތް ކުރުމުގެ އޮޕަރޭޝަނެއް ވަނީ ވަގުތުން ފަށާފައެވެ.

ނަމަވެސް، ސަލާމަތް ކުރުމުގެ މަސައްކަތް ކުރަމުން ދަނިކޮށް ދޯނި ވަނީ އޭގައި ހުރި މުދަލާއެކު އެއްކޮށް އަޑިއަށް ގޮސްފައެވެ. މި ހާދިސާ ހިނގިއިރު ދޯނީގައި ތިބި މީހުންގެ ތެރެއިން ހަތް މީހަކު ވަނީ ކަނޑުން ސަލާމަތް ކުރެވިފައެވެ.

މި ހާދިސާގައި ގެއްލިފައިވަނީ ސަލާމަތް ކުރުމުގެ މަސައްކަތުގައި ހަރަކާތްތެރިވި ފުލުހަކާއި، ސިފައިންގެ ބޭކަލެއްގެ އިތުރުން ދޯނީގެ ކެޕްޓަނެވެ.

ގެއްލުނު މީހުން ހޯދުމުގެ މަސައްކަތް އެމްއެންޑީއެފް ކޯސްޓްގާޑާއި ފުލުހުން ގުޅިގެން މިހާރު ދަނީ ހުއްޓުމެއް ނެތި ކުރަމުންނެވެ.