ކޮންމެ ޤައުމެއްގެވެސް ކުރިއެރުމާއި ތަރައްޤީގެ އަސްލަކީ އެ ޤައުމެއްގައި އޮންނަ ސިޔާސީ އަދި އިޖުތިމާޢީ ހަމަޖެހުމެވެ. ދިވެހިރާއްޖެ ފަދަ ކުޑަ ޤައުމަކަށް މި ހަމަޖެހުން މާ މުހިންމެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދާދިފަހުން ދެއްވި ތަޤުރީރުގައި ފާހަގަކުރެއްވި ފަދައިން، ޤައުމަށް ފައިދާހުރި ކަންކަމުގައި އެންމެން އެއްބަސްކިޔުމަކީ ކުރިއަރާފައިވާ ޤައުމުތަކުން ފެންނަ ރީތި ނަމޫނާއެކެވެ. ނަމަވެސް، ރާއްޖޭގެ ސިޔާސީ މަސްރަޙުން މި މަންޒަރު ނުފެނުމަކީ ޤައުމުގެ ކުރިމަގަށް އޮތް ބޮޑު ގޮންޖެހުމެކެވެ.

ސިޔާސީ ހަމަޖެހުމާއި ބަދަލުހިފުމުގެ ރޫޙު ނައްތާލުން

Ad by Hajj Corporation

ސިޔާސީ ހަމަޖެހުން ޤާއިމުކުރުމަކީ މި ސަރުކާރުގެ އެންމެ މުހިންމު އެއް ވަޢުދެވެ. މާޒީގައި ރާއްޖެއިން ފެނިގެންދިޔަ ބަދަލުހިފުމުގެ ސިޔާސީ ސަގާފަތުގެ ސަބަބުން ޤައުމުގެ އިޖުތިމާޢީ ފޭރާން ވަނީ ވަރަށް ބޮޑަށް ވީދިފައެވެ. ރައީސް ވިދާޅުވި ފަދައިން، ބަދަލުހިފުމުގެ ރޫޙު އެއްކޮށް ނައްތާލައި، ސިޔާސީ ހަމަޖެހުން އޮތް ޤައުމަކަށް ރާއްޖެ ހެދުމަކީ ހުރިހާ ރައްޔިތުންގެ ލާބަޔާއި މަންފާއަށްޓަކައި ކުރަންޖެހޭ ކަމެކެވެ. މި ހަމަޖެހުން ގެއްލިއްޖެނަމަ، ޤައުމު އަނެއްކާވެސް ފަހަތަށް ސާބަސްދޭނެކަން ކަށަވަރެވެ.

ދޮގު މަޢުލޫމާތާއި ފިތުނައިން ރައްކާތެރިވުން

މިހާރަކަށް އައިސް އެއްވެސް އަސާސެއް ނެތް ދޮގު ވާހަކަތައް ފެތުރުން ވަނީ އާންމުވެފައެވެ. މިއީ ޤައުމު ހަލަބޮލިކުރުމަށް ބަޔަކު ރާވައިގެން ކުރާ މަސައްކަތެއްގެ ގޮތުގައި ބެލެވެއެވެ. ޚާއްޞަކޮށް ޒުވާނުން މިފަދަ ދޮގު ޚަބަރުތަކަށް ހޭލުންތެރިވާންޖެހެއެވެ. ސިޔާސީ ވެރިން ދައްކަވާ ވާހަކަތަކާމެދު ފުންކޮށް ވިސްނައި، ހަޤީޤަތް އޮޅުންފިލުވުމަކީ ކޮންމެ ރައްޔިތެއްގެ ޒިންމާއެކެވެ. މިކަމުގައި އިސްރަށްވެހިންގެ ދައުރު ވަރަށް ބޮޑެވެ. މާޒީގައި ކަން ހިނގާފައިވާ ގޮތުގެ ހަޤީޤަތް ޒުވާނުންނަށް ކިޔައިދީ، މަގު އޮޅުވާލުމުގެ ފުރުސަތު ނުދިނުމަށް އެފަރާތްތަކުން މަސައްކަތް ކުރަންޖެހެއެވެ.

އިޤްތިޞާދީ އަދަވަޅުން ސަލާމަތްވުން

މި ސަރުކާރު ހަވާލުވިއިރު ޤައުމުގެ އިޤްތިޞާދީ ހާލަތު އޮތީ ވަރަށް ނާޒުކު ފައްތަރެއްގައެވެ. ތަރައްޤީގެ މަޝްރޫޢުތައް ހުއްޓި، އިޤްތިޞާދު ވަނީ ބޮޑު އަދަވަޅަކަށް ވެއްޓިފައެވެ. ނަމަވެސް، ވޭތުވެދިޔަ ކުރު މުއްދަތުގެ ތެރޭގައި ކުރެވުނު މަސައްކަތުން އިޤްތިޞާދު އަލުން ކޮޅަށް ޖެހުމުގެ އުންމީދު ވަނީ އާވެފައެވެ. ޤައުމު ހަލަބޮލިކޮށް، ހަމަނުޖެހުން އުފައްދަން މަސައްކަތްކުރާ ފަރާތްތަކަށް ފުރުސަތު ދީފިނަމަ، އިޤްތިޞާދު އަނެއްކާވެސް ބޮޑު އަދަވަޅަކަށް ވެއްޓި، އޭގެ ތަކުލީފު އުފުލަންޖެހޭނީ އާންމު ރައްޔިތުންނަށެވެ.

ޤައުމު ފަނާކޮށް ހަމަނުޖެހުމުގެ ތެރެއަށް ގެންދަން އުޅޭ އެއްވެސް އޮއިވަރެއްގައި ޖެހިގެން ނުވާނެ

ޤައުމުގެ ތަރައްޤީއާއި، ހަމަޖެހުމާއި، ރައްކާތެރިކަން ކަށަވަރުކުރުމަށް ކުރާ މަސައްކަތުގައި ރައްޔިތުން ސާބިތުކަމާއެކު ތިބުމަކީ ކޮންމެހެން ބޭނުންތެރި ކަމެކެވެ. ޤައުމު ފަނާކޮށް ހަމަނުޖެހުމުގެ ތެރެއަށް ގެންދަން އުޅޭ އެއްވެސް އޮއިވަރެއްގައި ޖެހިގެން ނުވާނެއެވެ. ރައީސް ވިދާޅުވި ފަދައިން، ރައްޔިތުން އެއްބައިވަންތަކަމާއެކު ކުރިއަށްދާނަމަ، ޤައުމަށް އޮތީ އުފާފާގަތިކަމާއި ތަނަވަސްކަމެވެ. އެހެންކަމުން، ޤައުމީ މަޞްލަޙަތު އިސްކޮށް، ހަމަޖެހުން ދެމެހެއްޓުމަށް އެންމެން އަތްގުޅާލަންޖެހެއެވެ.