ލޯކަލް ގަވަރމަންޓް އޮތޯރިޓީ، އެލްޖީއޭގެ ބޯޑަށް ރައްޔިތުންގެ މަޖިލީހުން ކަނޑައަޅުއްވާ މެންބަރުންގެ ތެރެއިން ދެ މަގާމަށް ބޭފުޅުން ޢައްޔަންކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަޖިލީހަށް ނަން ފޮނުއްވައިފި އެވެ.

އެލްޖީއޭގެ ބޯޑުގެ 3 މެންބަރެއްގެ މަގާމުގެ މުއްދަތު ސެޕްޓެމްބަރު މަހަށް ހަމަވާތީ، އެ މަގާމުތަކަށް ކުރިމަތިލުމުގެ ފުރުސަތު ރައީސުލްޖުމްހޫރިއްޔާގެ އޮފީހުން ހުޅުވާލާފައިވަނީ މިއަހަރުގެ ޖުލައި މަހުއެވެ. އެ ފުރުސަތުގައި ކުރިމަތިލެއްވި ބޭފުޅުންގެ ތެރެއިން ރައީސުލްޖުމްހޫރިއްޔާއަށް ފެނިވަޑައިގަންނަވާ ދެ ދާއިރާއެއްގެ ބޭފުޅުންގެ ނަންތައް ވަނީ މަޖިލީހުގެ ރުހުން ހޯދުމަށް ފޮނުއްވާފަ އެވެ.

Ad by Hajj Corporation

އެގޮތުން، މިންތީގެ ހަމަހަމަކަމުގެ ދާއިރާއިން ޖެންޑަރ އިކުއަލިޓީގެ ތަޖުރިބާ ލިބިފައިވާ ބޭފުޅެއްގެ ގޮތުގައި އެލްޖީއޭގެ ބޯޑަށް ޢައްޔަންކުރެއްވުމަށް ފޮނުއްވާފައިވަނީ ގދ. ގައްދޫ ތިބުރޯޒުގެ، އައިޝަތު އާރިފާގެ ނަންފުޅެވެ. އަދި ގަވަރނަންސް ނުވަތަ ޕަބްލިކް އެޑްމިނިސްޓްރޭޝަންގެ ދާއިރާއިން ތަޖުރިބާ ލިބިފައިވާ ބޭފުޅެއްގެ ގޮތުގައި ހުށަހަޅުއްވާފައިވަނީ ށ. ކަނޑިތީމު ރަތްވިލާގެ، މުޙައްމަދު އާރިފްގެ ނަންފުޅެވެ.

މި ދެ ދާއިރާގެ އިތުރުން މަދަނީ ޖަމްޢިއްޔާގެ މެންބަރެއްގެ ގޮތުގައި ޢައްޔަންކުރައްވާ ބޭފުޅެއްގެ މަޤާމަށް ކުރިމަތިލާންވެސް ރައީސް އޮފީހުން ވަނީ ހުޅުވާލާފައެވެ. ޖުމްލަ 9 މެންބަރުންގެ މައްޗަށް އެކުލެވިގެންވާ އެލްޖީއޭގެ ބޯޑުގައި، ވަޒީރުންނާއި، ކައުންސިލަރުންނާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކާއި، މަދަނީ ޖަމްޢިއްޔާތަކުގެ މަންދޫބުންގެ އިތުރުން ކަމާބެހޭ ދާއިރާތަކުގެ ތަޖުރިބާކާރުން ހިމެނެ އެވެ.