މިފްކޯއަށް މަސްކިރާ ދޯނިފަހަރަށް ކްރެޑިޓަށް ތެޔޮ ލިބޭނެ އިންތިޒާމު ހަމަޖެއްސުމަށްޓަކައި، މިފްކޯ އާއި ފިއުލް ސަޕްލައި މޯލްޑިވްސް (އެފްއެސްއެމް) އާ ދެމެދު މުހިންމު އެއްބަސްވުމެއްގައި ސޮއިކޮށްފި އެވެ.

މި ރަސްމިއްޔާތުގައި މިފްކޯގެ ފަރާތުން ސޮއިކުރެއްވީ އެ ކުންފުނީގެ ސީއީއޯ އަދި އެމްޑީ މުޙައްމަދު އަނަސްއެވެ. އަދި އެފްއެސްއެމްގެ ފަރާތުން ސޮއިކުރެއްވީ އެ ކުންފުނީގެ އެމްޑީ ފާޠިމަތު އާޝާންއެވެ.

Ad by Hajj Corporation

މި އެއްބަސްވުމުގެ ދަށުން، އެފްއެސްއެމްގެ ފިއުލް ޝެޑްތައް ގާއިމުކޮށްފައިވާ މިފްކޯގެ މައިގަނޑު ސެންޓަރުތަކުން މިއަދުން ފެށިގެން ދޯނިފަހަރަށް ކްރެޑިޓަށް ތެޔޮ ލިބޭނެއެވެ. އެގޮތުން ފެލިވަރު، ކޫއްޑޫ އަދި އައްޑޫ ފިޝަރީޒް ކޮމްޕްލެކްސްއިން މި ޚިދުމަތް ލިބޭނެ އިންތިޒާމު ވަނީ ހަމަޖައްސާފަ އެވެ.

ތެޔޮ ނެގުމަށްފަހު ފައިސާ ދައްކާނީ މިފްކޯއަށް މަސްކިރުވުމަށް ފަހު ލިބޭ ފައިސާއިންނެވެ. އެގޮތުން، މަސްކިރުވާތާ 48 ގަޑިއިރު ތެރޭގައި މަސްވެރިންނަށް ދޭ ފައިސާގެ ޕޭމަންޓުން ތެލުގެ ބިލަށްވާ ފައިސާ އުނިކުރެވޭނެއެވެ.

މިފްކޯއިން ބުނީ މިއީ މަސްވެރިންގެ ފަރާތުން ވަރަށް ބޮޑަށް އެދެމުން އައި ކަމަކަށްވާތީ، މި އާ އިންތިޒާމާއެކު ތެޔޮ ގަތުމުގައި ހުރި މާލީ ދަތިތަކަށް ބޮޑު ލުޔެއް ލިބިގެންދާނެ ކަމަށެވެ. އަދި މީގެ ސަބަބުން މަސްވެރިންނަށް މަހަށް ފުރުމަށް އިތުރު ހިތްވަރެއް ލިބިގެންދާނެ ކަމަށް ވެސް މިފްކޯއިން ދެކެ އެވެ.