ކުޑަކުދިންނާއި ނާޒުކު ހާލަތްތަކުގައިވާ މީހުންގެ މައްސަލަ ރިޕޯޓުކުރުމުގައި ސަމާލުވުމަށް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުން، މީޑިއާތަކަށް އިލްތިމާސްކޮށްފިއެވެ.

އިއްޔެ އެ ކޮމިޝަނުން ނެރުނު ބަޔާނެއްގައި ބުނީ، ރާއްޖޭގެ ގާނޫނުތަކާއި ގަވައިދުތަކާ އެއްގޮތަށް މުޖުތަމައުގައި ހިނގާ އެކި ހާދިސާތަކާއި މައްސަލަތަކުގެ މައުލޫމާތު މީޑިއާތަކުން އާންމުންނަށް ހާމަކުރުމަކީ، ފަރުދީ އަދި އިޖުތިމާއީ ގޮތުން އަދާކުރަން ޖެހޭ ޒިންމާއެއް ކަމަށެވެ.

Ad by Hajj Corporation

އެހެންކަމުން ކުޑަކުދިންނާއި މައިންބަފައިންނާއި ނާޒުކު ހާލަތްތަކުގައިވާ މީހުންނާ ގުޅުން ހުރި މައްސަލަތައް ރިޕޯޓުކުރުމުގައި ސަމާލުކަން ދޭން ޖެހޭ ކަންކަމަށް ފުރިހަމައަށް އެއްބާރުލުން ދިނުމަށް މީޑިއާ ކޮމިޝަނުން ވަނީ ނޫސްވެރިންނަށް އިލްތިމާސްކޮށްފައެވެ.

އެގޮތުން، އެއްވެސް މީހެއްގެ އަބުރާއި ކަރާމާތަށް އުނިކަން ނާންނާނެ ގޮތަކަށް ކޮންޓެންޓު އާންމުކުރުމަށް އެ ކޮމިޝަނުން ވަނީ ހަނދާންކޮށްދީފައެވެ.

ޚާއްސަކޮށް، ކުޑަކުދިންނާއި ނާޒުކު ހާލަތުގައިވާ މީހުންގެ ވަނަވަރު ނުވަތަ އެ މީހުން ދެނެގަނެވިދާނެ މައުލޫމާތެއް ހާމަކުރަންވާނީ ގާނޫނުއަސާސީއާއި ގާނޫނުތަކާއި ގަވައިދުތަކުގެ އިތުރަށް އިދާރާތަކުން ރަސްމީކޮށް ހިއްސާކުރާ މައުލޫމާތުގެ މައްޗަށް ބިނާކޮށްކަން އެ ކޮމިޝަނުން ހަނދާންކޮށްދީފައިވެއެވެ.

އެ ބަޔާނުގައި ބުނީ، ނާޒުކު ހާލަތުގައިވާ ފަރާތްތަކުގެ މައްސަލަތައް މީސްމީޑިއާގައި "ޝަރީއަތް" ކުރުމުގެ ބަދަލުގައި ގާނޫނީ އުސޫލުތަކުގެ ތެރެއިން، ކަމާ ބެހޭ އިދާރާތަކުން ހާމަކުރާ ސައްހަ މައުލޫމާތު ހާމަކުރުމަކީ އެންމެ މަސްހަލަތު ހުރި ގޮތް ކަމަށް ދެކޭ ކަމަށެވެ.

މީގެއިތުރުން، ކުޑަކުދިންނާއި މައިންބަފައިންގެ މައުލޫމާތު ގެނެސްދިނުމުގައި އެ މީހުންގެ ކަރާމާތައި އަމިއްލަ މިނިވަންކަމާއި ރައްކާތެރިކަން ކަށަވަރުކުރުމަކީ ނޫސްވެރިންނާއި މީޑިއާއަށް ލާޒިމު ކަމެއް ކަމަށް މީޑިއާ ކޮމިޝަނުން ވަނީ ބުނެފައެވެ.

ކަނޑައެޅިފައިވާ ގާނޫނުތަކާއި ގަވައިދުތަކުގެ އިތުރަށް މީޑިއާގެ ސުލޫކީ މިންގަނޑަށް ފުރިހަމައަށް ތަބާވުމަށް މީޑިއާގައި މަސައްކަތް ކުރާ އެންމެނަށް އެ ކޮމިޝަނުން ވަނީ ހަނދާންކޮށްދީފައެވެ.