ރާއްޖޭގެ އެކި ސަރަހައްދުތަކުގައި އެއާޕޯޓް އެޅުމަކީ ދެކޮޅު ޖެހޭނެ ކަމެއް ކަމަށާއި ބޭނުންވަނީ އެކަން ރަނގަޅަށް ތަންފީޒު ކުރުން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް އޮފީހުން ގެނެސްދޭ "ދަ ޕަލްސް" ޕޮޑްކާސްޓް ސިލްސިލާގެ ހަވަނަ އެޕިސޯޑުގައި ވާހަކަފުޅުދައްކަވަމުން ރައީސް ވިދާޅުވީ އެއާޕޯޓް އެޅުމަކީ ރައްޔިތުންގެ ފައިދާ އަށް ކުރާ ކަމެއް ކަމަށެވެ. އަދި ފަތުރުވެރި ކަމުގެ ކުރިއެރުމަށް ވެސް ވައިގެ މަގުން ގުޅިފައި ހުންނަވަރަކީ މުހިއްމު ކަމެއް ކަމަށް އެމަނިކުފާނު ވިދާޅުވި އެވެ.

Ad by Hajj Corporation

ރައީސް ވިދާޅުވީ ސަރަހައްދީ ތަރައްގީގެ ވިސްނުމުގެ ދަށުން މުޅި ރާއްޖެ ތަރައްގީ ކުރާނަމަ، އެއާޕޯޓްތައް އެޅުމަކީ ކުރަންޖެހޭ ކަމެއް ކަމަށެވެ. އަދި ދަތުރުފަތުރަކީ ތަރައްގީގެ އެންމެ މުހިއްމު އެތް ވަސީލަތް ކަމަށާއި ރާއްޖެ އުފެދިފައި އޮތް ގޮތުން ހަމައެކަނި ކަނޑުމަގުން ދަތުރުކޮށްގެން ނުވާނެ ކަމަށް އެމަނިކުފާނު ވިދާޅުވި އެވެ. އަދި މިސަބަބާހުރެ، ވައިގެ މަގުން މުޅި ރާއްޖެ ގުޅެން ޖެހޭ ކަމަށް ވެސް ރައީސް ފާހަގަ ކުރެއްވެވި އެވެ.

ސިޔާސަތަކީ 30 މިނެޓުން ކަނޑުމަގުން ދަތުރު ނުކުރެވޭ ސަރަހައްދުތަކަށް ވައިގެ މަގުން ދަތުރުކުރެވޭނެ ގޮތްތަކެއް ހަދައިދިނުން ކަމަށާއި އެއީ އިޖްތިމާއީ އަދި އިގްތިސޯދީ ތަރައްގީ އަށް މުހިއްމު ކަމެއް ކަމަށް ވެސް ރައީސް ވިދާޅުވި އެވެ.