ފިނޭންސް މިނިސްޓްރީގެ ތަފާސްހިސާބުތައް ދައްކާ ގޮތުން، ދައުލަތުގެ ދަރަނި އަދާކުރުމަށްޓަކައި ދުރާލައި ތައްޔާރުވުމަށް އުފައްދާފައިވާ ސޮވެރިން ޑިވެލޮޕްމަންޓް ފަންޑު (އެސްޑީއެފް) އަށް ޖަމާކުރި ފައިސާގެ އަދަދު އިތުރު ވެއްޖެ އެވެ.

މި މަހުގެ 13 ވަނަ ދުވަހާ ހަމައަށް އެ ފަންޑަށް ޖުމްލަ 1.38 ބިލިއަން ރުފިޔާ ޖަމާކޮށްފައިވާ ކަމަށް މިނިސްޓްރީގެ ހިސާބުތަކުން ދައްކަ އެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު އިތުރު އަދަދެއް ކަމުގައިވީނަމަވެސް، މިއަހަރުގެ ބަޖެޓުގައި އެ ފަންޑަށް ޖަމާކުރުމަށް ކަނޑައަޅާފައިވަނީ 2.4 ބިލިއަން ރުފިޔާއެވެ. ސަރުކާރުން ވަނީ މި ފަންޑު ބޭނުންކޮށްގެން މި އަހަރުވެސް ދައުލަތުގެ ދަރަނީގެ ބޮޑު ބަޔަކާއި ސުކޫކު ދައްކާފައެވެ.

Ad by Hajj Corporation

އެސްޑީއެފްއަށް ފައިސާ ޖަމާކުރަނީ 2017 ވަނަ އަހަރުން ފެށިގެން ނަގަމުން އަންނަ އެއާޕޯޓް ޑިވެލޮޕްމަންޓް ފީ އާއި ވެލާނާ އިންޓަނޭޝަނަލް އެއާޕޯޓުންދޭ ޚިދުމަތްތަކުގެ އަގަށް ގެނައި ބަދަލުތަކުން އިތުރުވާ ފައިސާއިންނެވެ. މީގެ ކުރިން 2018 ވަނަ އަހަރުގެ ނިޔަލަށް މި ފަންޑުގައި ބޭރު ފައިސާގެ ގޮތުގައި 200 މިލިއަން ޑޮލަރާ ގާތްކުރާ އަދަދަކަށް ފައިސާ ހުއްޓެވެ. ނަމަވެސް 2019 ވަނަ އަހަރު ވީ އެއްބަސްވުމެއްގެ ދަށުންނާއި ކޮވިޑް-19 ގެ ބަލިމަޑުކަމާ ގުޅިގެން އިގްތިސާދަށް ކުރިމަތިވި ގޮންޖެހުންތަކާއެކު، ފަންޑުގައި ހުރި ގިނަ ފައިސާ ވަނީ ދިވެހި ރުފިޔާއަށް ބަދަލުކޮށްފައެވެ. އެގޮތުން 2023 ވަނަ އަހަރު ސަރުކާރު ބަދަލުވިއިރު، ފަންޑުގައި ބޭރު ފައިސާގެ ގޮތުގައި ހުރީ އެންމެ 2 މިލިއަން ޑޮލަރެވެ. އެ ސަބަބާހުރެ، ސަރުކާރުން ވަނީ ފަންޑަށް ޖަމާކުރާ ބޭރު ފައިސާގެ މިންވަރު އިތުރުކުރުމަށް ހާއްސަ މަސައްކަތްތަކެއް ފަށާފައެވެ.