އަމިއްލަ އެދުން އިސްކުރާ ލީޑަރުންނާއި، އުޞޫލުތަކުގައި ސާބިތުވެ ތިބޭ އިޚްލާޞްތެރި ލީޑަރުން މިހާރު ރައްޔިތުންނަށް ވަކިކުރަން އެނގޭނެކަމަށް ވިދާޅުވެ، ރައްޔިތުންގެ މަޖިލީހުގެ ބާރަށު ދާއިރާގެ މެމްބަރު އިބްރާހިމް ޝުޖާޢު، ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމަށް ވަރަށް ބޮޑަށް ފާޑުވިދާޅުވެއްޖެއެވެ.

ކުރީގެ ރައީސް މުޙައްމަދު ނަޝީދާއި، އެމްޑީޕީގެ މާލެ، އައްޑޫ އަދި ތިނަދޫ ސިޓީގެ މޭޔަރުންނާއެކު ރައީސް ޔާމީން ފެންނަ ފޮޓޯތަކެއް ސޯޝަލް މީޑިއާގައި ހިއްސާކުރައްވަމުން ޝުޖާޢު ވިދާޅުވީ، ބިނާކުރަނިވި ފިކުރުގެ ލީޑަރަކަށް ވުމުގެ ޚާއްޞަ ޝަރުތަކީ އެމްޑީޕީގެ ލީޑަރުންނާއެކު ސިޔާސީ އެއްދާން ނުކުރުން ކަމަށާއި، މި ވާހަކަ އެންމެ އަޑުހަރުކޮށް އިއްވެވީ ރައީސް ޔާމީން ކަމަށެވެ. އަދި ރައީސް މައުމޫނާއި ޕާޓީގެ ސަޕޯޓަރުން ދުރުކުރުމަށް ރައީސް ޔާމީން އެންމެ ބޮޑަށް ބޭނުންކުރެއްވި ހަތިޔާރަކީވެސް ރައީސް މައުމޫން އެމްޑީޕީގެ ލީޑަރުންނާއެކު ސިޔާސީ މަސައްކަތް ކުރެއްވި ކަމުގެ ވާހަކަ ކަމަށް ޝުޖާޢު ފާހަގަކުރެއްވިއެވެ.

Ad by Hajj Corporation

ޝުޖާޢު އިތުރަށް ވިދާޅުވީ، ރައީސް ޔާމީން ޖަލުގައި އޮންނެވި ދުވަސްވަރުވެސް އަދި މިހާރުވެސް އެ ބޭފުޅުން އެމްޑީޕީގެ ލީޑަރުންނާއެކު ސިޔާސީ ގޮތުން ގުޅިވަޑައިގެންފައި ނުވާނެ ކަމަށެވެ. ނަމަވެސް، މިއަދު ފެންނަނީ އެ ވާހަކަތައް ހަރުއަޑުން ދެއްކެވި ރައީސް، މުންޑެއް އަޅުއްވައިގެން އެމްޑީޕީގެ އިސް ލީޑަރުންނާއެކު ހިނިވަރުނަކުރައްވާ މަންޒަރު ކަމަށް ޝުޖާޢު ވިދާޅުވިއެވެ.

މީގެއިތުރުން، ރައީސް ޑރ. މުޙައްމަދު މުޢިއްޒު މާލޭގެ މޭޔަރުކަމުގައި ހުންނެވި ދުވަސްވަރު އެމްޑީޕީ ސަރުކާރުގެ ރަސްމީ ހަފްލާތަކަށް ދަޢުވަތު އެރުވި ނަމަވެސް، އޭރުގެ ޕާޓީގެ ލީޑަރަށް ދެމުންދިޔަ ސިޔާސީ އަނިޔާއާއި ތަފާތުކުރުންތަކާ ދެކޮޅަށް އެމަނިކުފާނު ސާބިތުވެ ހުންނެވި ކަމަށް ޝުޖާޢު ފާހަގަކުރެއްވިއެވެ. އަދި ފަސޭހަ ގޮތް އޮތް ނަމަވެސް ރައީސް މުޢިއްޒު އިސްކުރެއްވީ ޤަބޫލުކުރެއްވި އުޞޫލުތައް ނެގެހެއްޓުން ކަމަށްވެސް ވިދާޅުވިއެވެ.

ޝުޖާޢުގެ ވާހަކަ ނިންމަވާލައްވަމުން ވިދާޅުވީ، އެ ބޭފުޅުން ތިއްބެވީ ރައީސް މުޢިއްޒާއެކު އޭރުވެސް އަދި މިއަދުވެސް ޤަބޫލުކުރާ އުޞޫލުތަކުގައި ސާބިތުވެގެން ކަމަށާއި، މިހާރު ރައްޔިތުންނަށް އަމިއްލަ އެދުން އިސްކުރާ ލީޑަރުންނާއި އިޚްލާޞްތެރިކަމާއެކު އުޞޫލުތަކުގައި ދެމިތިބޭ ލީޑަރުން ވަރަށް ސާފުކޮށް އެނގޭނެ ކަމަށެވެ.