ރައީސް ޑރ. މުޙައްމަދު މުޢިއްޒު ގެންނަވަމުންދާ ތަރައްޤީއާއި އިންވެސްޓްމެންޓްތައް ހުއްޓުވަން ކުރީގެ ރައީސް ޢަބްދުﷲ ޔާމީން ކުރައްވާ މަސައްކަތްތަކުން ހާމަވަނީ، އެމަނިކުފާނުގެ ހިތްޕުޅުގައި ރައީސް މުޢިއްޒުގެ މައްޗަށް އޮތް ހަސަދަވެރިކަމާއި ޤައުމަށް ރަހުމެއް ނެތްކަން ކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އަދި ޕީއެންސީގެ ޕާލިމަންޓްރީ ގްރޫޕުގެ ލީޑަރު އިބްރާހީމް ފަލާޙު ވިދާޅުވެއްޖެއެވެ.

ފަލާޙު މިހެން ވިދާޅުވީ، ރައީސް ޔާމީންގެ ވެރިކަމުގައި ބޭރު މީހުންނަށް ރާއްޖޭގެ ބިން މިލްކުކުރެވޭ ގޮތަށް ޤާނޫނު ހެއްދެވުމަށްފަހު އެކަން ދިފާޢުކުރައްވައި ދެއްކެވި ވާހަކަފުޅުތަކުގެ ވީޑިއޯއެއް ސޯޝަލް މީޑިއާގައި ހިއްސާކުރައްވަމުންނެވެ. އެ ވީޑިއޯގައި ރައީސް ޔާމީން ވިދާޅުވެފައިވަނީ ދުނިޔޭގެ ހުރިހާ ޤައުމެއްގައި އަދި އެއްވަނަ ދުނިޔޭގެ ޤައުމުތަކުގައި ވެސް އެކަން އޮންނަނީ އެގޮތަށް ކަމަށެވެ.

Ad by Hajj Corporation

ޔާމީން ދެެއްކެވި ވާހަކަ އަޑުއައްސަވާލައްވަން ފަލާހްގެ އެކްސް ޕޯސްޓް ބައްލަވާ:

ނަމަވެސް އެ ވާހަކަފުޅުތައް ހަނދާންނައްތަވާލެއްވުމަށްފަހު ރަސްމާލެ މަޝްރޫޢާ ގުޅިގެން ރައީސް ޔާމީން ދައްކަވާ ވާހަކަފުޅުތަކަށް ފާޑުވިދާޅުވަމުން ފަލާޙު ވިދާޅުވީ، އެއީ އިހަށްދުވަހު ޔާމީންގެ ވެރިކަމުގައި ޤާނޫނުއަސާސީއާއި ޤާނޫނުތަކުން ރާއްޖޭގައި ހުއްދަކޮށްފައިވާ ކަންކަން ކަމަށެވެ. އަދި މިއަދުވެސް ޢަމަލުކުރަމުންދަނީ އެ ޤާނޫނުތަކަށް ކަމަށް އޭނާ ފާހަގަކުރެއްވިއެވެ.

ފަލާޙު އިތުރަށް ވިދާޅުވީ ރައީސް މުޢިއްޒު މަސައްކަތް ކުރައްވަމުން ގެންދަވަނީ ޤައުމުގެ އިސްތިޤުލާލަށް އުނިކަމެއް ނުގެނެސް، އެއްވެސް ރައްޔިތެއްގެ ޙައްޤެއް ނުގެއްލި، އަދި ދަޢުލަތަށް ކުޑަވެސް ގެއްލުމެއް ނާންނާނެ ގޮތަށް ކަމަށެވެ. އަދި މިއަދު ޤައުމަށް ހެވެއް އެދޭ ކޮންމެ ރައްޔިތަކު ޔާމީނަށާއި، މިފަދައިން ޤައުމަށް ނިކަމެތިކަން ދޭން މަސައްކަތްކުރާ ހުރިހާ ފަރާތްތަކަށް ނޫނެކޭ ބުނަންޖެހޭ ކަމަށްވެސް އޭނާ ވިދާޅުވިއެވެ.