މާލޭގެ ރެސްޓޯރެންޓެއްގެ ތެރޭގައި އިން އަންހެނަކަށާއި ހަމަލާދީ މާރާމާރީ ހިންގައި ތަނަށް ގެއްލުންދިން މައްސަލައެއްގައި މީހަކު ހައްޔަރުކޮށްފިއެވެ.

ފުލުހުން ބުނި ގޮތުގައި މި ހާދިސާ ހިނގާފައި ވަނީ މާލޭގެ މާފަންނުގައި ހުންނަ ރެސްޓޯރެންޓެއްގައެވެ. މި މާރާމާރީއެއް ހިންގަމުންދާ ކަމުގެ މައުލޫމާތު ފުލުހުންނަށް ރިޕޯޓްކޮށްފައިވަނީ 22 އޮގަސްޓް 2026 ވަނަ ދުވަހުގެ ރޭގަނޑު 23:00 އެހައިކަންހާއިރުކަމަށް ވެސް އެ އިދާރާއިން ބުންޏެވެ.

Ad by Hajj Corporation

މި މާރާމާރީއާ ގުޅޭގޮތުން މިހާތަނަށް ލިބިފައިވާ މައުލޫމާތަށް ބަލާއިރު، ރެސްޓޯރެންޓް ތެރޭގައި ހިނގި ހަމަނުޖެހުމުގައި އެތަނުގައި އިން އަންހެނަކަށް ފިރިހެނަކު ވަނީ ހަމަލާދީފައިވާއިރު، މި ހަމަނުޖެހުން ހުއްޓުވަން މަސައްކަތްކުރި ބަޔަކަށްވެސް ހަމަލާދީ، ރެސްޓޯރެންޓްގެ ދޮރަށް ވަނީ ގެއްލުންދީފައެވެ.

މީގެ އިތުރުން މި މާރާމާރީގައި އެ ރެސްޓޯރެންޓުގެ އަންހެން މުވައްޒަފެއްގެ ބޮލަށް ވެސް ވަނީ ހަމަލާދީފައެވެ. އެ މުވައްޒަފަށް އަމާޒުވި ހަމަލަގައި އެ މުވައްޒަފުގެ ބޯ ދުޅަވެ އަނިޔާވެފައިވާ ކަމަށް ފުލުހުން ވަނީ ބުނެފައެވެ.

މި މައްސަލައާ ގުޅިގެން 19 އަހަރުގެ ދިވެހި ފިރިހެނަކު ފުލުހުންގެ ބެލުމުގެ ދަށަށް ގެންގޮސްފައިވާއިރު، ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.