ރޮބާޓޯ ޑި ޒާބީގެ އިރުޝާދުގެ ދަށުން ޓޮޓެންހަމް ހޮޓްސްޕާއިން އިނގިރޭސި ޕްރިމިއާ ލީގުގެ އައު ސީޒަން ފެށީ ހިތްދަތި ގޮތަކަށެވެ. ހޮނިހިރު ދުވަހު ކުޅުނު ސީޒަނުގެ ފުރަތަމަ މެޗުން ލަންޑަނުގެ ވާދަވެރި ބްރެންޓްފޯޑް އަތުން ޓޮޓެންހަމް ވަނީ 3-0 ގެ ތަފާތު ބޮޑު ނަތީޖާއަކުން ބަލިވެފައެވެ.

ޖީޓެކް ކޮމިއުނިޓީ ސްޓޭޑިއަމްގައި ކުޅުނު މި މެޗު ފެށުނީއްސުރެ ޓޮޓެންހަމަށް މެޗުގެ ކޮންޓްރޯލް ގެއްލިފައިވާއިރު، މެޗުގެ ފުރަތަމަ 33 މިނެޓުގެ ތެރޭގައި ކީން ލުއިސް-ޕޮޓާއާއި ވިޓާލީ ޔެނެލްޓް ވަނީ ބްރެންޓްފޯޑަށް ލީޑު ނަގައިދީފައެވެ. ފުރަތަމަ ލަނޑު 12 ވަނަ މިނެޓުގައި ލުއިސް-ޕޮޓާ ކާމިޔާބުކުރީ އައު ކުޅުންތެރިޔާ ސަންގާރޭ ތަނަވަސްކޮށްދިން ފުރުސަތަކުންނެވެ. އަދި ދެވަނަ ހާފުގެ ކުރީކޮޅު، 49 ވަނަ މިނެޓުގައި މައިކަލް ކަޔޯޑޭ ވަނީ ބްރެންޓްފޯޑުގެ ތިންވަނަ ލަނޑު ޖަހާފައެވެ.

Ad by Hajj Corporation

މެޗުގައި ޓޮޓެންހަމްގެ ގޯލްކީޕަރު އެންޓޮނިން ކިންސްކީގެ ފަރާތުން ފެނުނު ގޯސްތަކުގެ ފައިދާ ބްރެންޓްފޯޑުން ނެގިއިރު، މިއަށްވުރެ ބޮޑު ނަތީޖާއަކުން ބަލިނުވީ އިގޯ ތިއާގޯ ޖެހި ޕެނަލްޓީ ގޯލުގެ ދަނޑިއަށް އަމާޒުވުމުންނެވެ. އަނެއްކޮޅުން ޓޮޓެންހަމުން 85 މިލިއަން ޕައުންޑަށް ގަތް މަޓެއުސް ފެނާންޑެސް ދެވަނަ ހާފުގައި ކުޅެން އެރި ނަމަވެސް، އެ ޓީމަށް މެޗުގެ އޮއިވަރު ބަދަލުކޮށެއް ނުލެވުނެވެ.

މި މެޗުގައި ބްރެންޓްފޯޑުން މޮޅު ކުޅުމެއް ދެއްކިއިރު، އެ ޓީމުގެ ހަތް ކުޅުންތެރިއަކު ވަނީ ގޯލާ އަމާޒުކޮށް ހަމަލާ ފޮނުވާލާފައެވެ. ޓޮޓެންހަމުން ދެން ނުކުންނާނީ އީއެފްއެލް ކަޕުގައި ޗާލްޓަން އެތުލެޓިކާ ދެކޮޅަށެވެ. އަދި އޭގެ ފަހުން ލީގުގެ ދެވަނަ މެޗުގައި ވާދަކުރާނީ ނިއުކާސަލް ޔުނައިޓެޑާއެވެ.