ދިވެހި ފުލުހުންގެ ޚިދުމަތުގެ ޚިދުމަތްތެރި އޮފިސަރުންގެ ތެރެއިން މާލެ އޭރިއާގައި މަސައްކަތްކުރާ ފުލުހުންގެ ތެރެއިން 166 އޮފިސަރަކަށް މިއަދު މަގާމުގެ ކުރިއެރުން ދީފިއެވެ.

މި ކަމަށް ބޭއްވި ހާއްސަ ރަސްމިއްޔާތު ކުރިއަށް ގޮސްފައި ވަނީ މިއަދު ފުލުހުންގެ އެއް މަރުކަޒު އިސްކަންދަރު ބިލްޑިންގ ގައެވެ.

Ad by Hajj Corporation

މި ރަސްމިއްޔާތު ޝަރަފުވެރިކޮށްދެއްވީ ކޮމިޝަނަރ އޮފް ޕޮލިސް އަޙްމަދު މުޙައްމަދުއެވެ. އަދި މި ރަސްމިއްޔާތުގައި ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީ ވެސް ވަނީ ބައިވެރިވެވަޑައިގެންފައެވެ. މީގެއިތުރުން ފުލުހުންގެ ސީނިއަރ އޮފިސަރުން ވެސް މި ރަސްމިއްޔާތުގައި ބައިވެރިވެވަޑައިގެންނެވިއެވެ.

މިއަދުގެ ރަސްމިއްޔާތުގައި މަގާމުގެ ކުރިއެރުން ލިބުނު 166 އޮފިސަރުންތެރެއިން ސީނިއަރ ސަރޖަންޓް ރޭންކުން ސަބް އިންސްޕެކްޓަރ ރޭންކަށް 35 ފުލުހުން ވަނީ ޕްރޮމޯޓް ވެފައެވެ. އަދި ސަރޖަންޓް ރޭންކުން ސީނިއަރ ސަރޖަންޓް ރޭންކަށް 121 ފުލުހަކު ޕްރޮމޯޓްވެފައިވާއިރު، ކޮންސްޓަބަލް ރޭންކުން ސަރޖަންޓް ރޭންކަށް 10 ފުލުހަކު ވަނީ ޕްރޮމޯޓް ވެފައެވެ.