މާލޭގެ މާވެޔޮމަގުގައި ހުންނަ ގެއެއްގައި އަލިފާނުގެ ހާދިސާއެއް ހިނގައި، ހަތަރު މީހަކަށް އަނިޔާވެގެން ހޮސްޕިޓަލުގައި ފަރުވާދޭން ފަށައިފިއެވެ.

ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ވިދާޅުވީ، އަލިފާނުގެ މި ހާދިސާ ހިނގާފައިވަނީ މާވެޔޮމަގުގައި ހުންނަ އޭޑީކޭ ފާމަސީ ކުރިމައްޗަށް އޮންނަ ހަނި ގޯޅީގައި ހުންނަ މ. ދޫގަސްވިލާ ގޭގައެވެ. މި ހާދިސާއާ ގުޅިގެން އެ އޮތޯރިޓީން ވަނީ އެ ސަރަހައްދުގައި ހަރަކާތްތެރިވާން ފަށާފައެވެ.

Ad by Hajj Corporation

އެންޑީއެމްއޭ އިން ހާމަކުރި ގޮތުގައި، ގޭގައި ރޯވި އަލިފާން މިހާރު ވަނީ އެއްކޮށް ކޮންޓްރޯލް ކުރެވިފައެވެ. ނަމަވެސް، މި ހާދިސާގެ ސަބަބުން އަނިޔާވި މީހުންނަށް ހޮސްޕިޓަލުގައި މިހާރު ދަނީ ފަރުވާ ދެމުންނެވެ.

މި ހާދިސާ އާއި ގުޅިގެން ފުލުހުން ވަނީ ހާދިސާ ހިނގި ސަބަބު ދެނެގަނެ ހާމަކޮށްފައެވެ. ފުލުހުޖް ވިދާޅުވީ މއ. ދޫގަސް ގޭގައި އަލިފާނުގެ ހާދިސާއެއް ހިނގީ ގޭސްފުޅިއެއް ގޮވައިގެންކަމަށެވެ.

މި ހާދިސާގެ ރިޕޯޓު ފުލުހުންނަށް ކޮށްފައި ވަނީ ފަތިހު 5:27 ހާއިރުއެވެ.

މި ހާދިސާގައި އަނިޔާވި 4 ބިދޭސީންނަށް އައިޖީއެމް ހޮސްޕިޓަލުގައި ދަނީ ފަރުވާދެމުންނެވެ. އެއީ ބަންގްލަދޭޝް 2 މީހުންނާއި އިންޑިއާ 2 މީހުންނެވެ. އޭގެ ތެރެއިން 2 މީހުންގެ ހާލު ސީރިއަސް ކަމަށް ހޮސްޕިޓަލުން ފުލުހުންނަށް ވަނީ މައުލޫމާތު ދީފައިވެއެވެ.

އެގޭގައި ރޯވި އަލިފާން މިހާރު ކޮންޓްރޯލް ކުރެވިފައިވާ ކަމަށް އެމްއެންޑީއެފް އިން މައުލޫމާތު ދީފައިކަމަށް ފުލުހުން ވެސް ބުނެއެވެ.

މި މައްސަލަ ފުލުހުން ދަނީ ތަހުގީގުކުރަމުންނެވެ.