ސިނަމާލެ ބްރިޖަކީ ދިވެހިރާއްޖޭގެ ތާރީޚުގައި މިހާތަނަށް ހިންގުނު އެންމެ ބިޔަ އަދި އިންޖިނިއަރިންގގެ ގޮތުން އެންމެ ފާހަގަކޮށްލެވޭ އެއް އުމްރާނީ މަޝްރޫޢެވެ. ވެރިރަށް މާލެއާއި، ވެލާނާ އިންޓަނޭޝަނަލް އެއާޕޯޓް އަދި ހުޅުމާލެ އެއްގަމު މަގުން ގުޅުވާލަދިން މި ތާރީޚީ ބިނާއަކީ ދިވެހިންގެ ދަތުރުފަތުރާއި އިޤްތިޞާދަށް އިންގިލާބީ ބަދަލުތަކެއް ގެނުވި ވަރުގަދަ ބުރިޖެކެވެ. މިއަދު މި ބިޔަ މަޝްރޫޢުގެ ކާމިޔާބީގެ ވާހަކަ ދައްކާއިރު، މި މަސައްކަތުގެ އެންމެ އިސް މޭސްތިރިއެއްގެ ގޮތުގައި ފެނިގެންދިޔަ މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޤާބިލުކަމާއި ބުރަ މަސައްކަތްޕުޅު ފާހަގަކުރަންޖެހެއެވެ.

Ad by Hajj Corporation

މަޝްރޫޢުގެ ފެށުމާއި ޑރ. މުޢިއްޒުގެ މޭސްތިރިކަން

2015 ވަނަ އަހަރުގެ ތެރޭގައި ސިނަމާލެ ބްރިޖުގެ ޢަމަލީ މަސައްކަތް ފެށިގެން ދިޔައިރު، އޭރުގެ ހައުސިންގ މިނިސްޓަރުގެ މަޤާމުގައި ހުންނެވި ޑރ. މުޙައްމަދު މުޢިއްޒަކީ މި މަޝްރޫޢުގެ އެންމެ މުހިންމު ހުންގާނު ހިއްޕެވި ބޭފުޅާއެވެ. އިންޖިނިއަރިންގގެ ދާއިރާއިން ޕީއެޗްޑީ ޙާޞިލުކުރައްވާފައިވާ ޤާބިލު އިންޖިނޭރެއްގެ ގޮތުގައި ހުންނަވައި، އެމަނިކުފާނު ވަނީ މި ބިޔަ މަސައްކަތުގެ ކޮންމެ މަރުޙަލާއެއް ވަރަށް ގާތުން ބައްލަވައި، އިންތިޒާމުތައް ފުރިހަމައަށް ހަމަޖައްސަވާފައެވެ. ގޮންޖެހުންތަކުން ފުރިގެންވި ކަނޑުގެ އޮއިވަރުގެ ތެރޭގައި އެޅުނު މި ބްރިޖުގެ މަސައްކަތް ކާމިޔާބުވުމުގެ އަސްލަކީ އެމަނިކުފާނުގެ ހިންގުންތެރިކަމާއި ކަމަށް ކަމޭހިތްތެވި މުރާލިކަމެވެ.

އިންޖިނިއަރިންގގެ އަޖައިބެއް ފަދަ ފުރިހަމަ ބިނާއެއް

ޗައިނާގެ ސީ.ސީ.ސީ.ސީ ސެކަންޑް ހާބަރ އިންޖިނިއަރިންގ ކުންފުންޏާ ޙަވާލުކޮށްގެން ކުރިއަށްގެންދިޔަ މި މަޝްރޫޢަކީ ރާއްޖެއާއި ޗައިނާއާ ދެމެދު އޮތް ބަދަހި ރަޙުމަތްތެރިކަން ރަމްޒުކޮށްދޭ 'ޗައިނާ-މޯލްޑިވްސް ފްރެންޑްޝިޕް ބްރިޖް' އެވެ. މި ބްރިޖުގެ ދިގުމިނުގައި 1.39 ކިލޯމީޓަރު އަދި ފުޅާމިނުގައި 20.3 މީޓަރު ހުރެއެވެ. މި ބިނާ ފަރުމާކުރެވިފައިވަނީ ހަތަރު ފުރޮޅުލީ އުޅަނދުތަކަށް ޚާއްޞަ ދެ ލޭނާއި، ސައިކަލުތަކަށް ޚާއްޞަ ދެ ލޭނުގެ އިތުރުން ހިނގާ މީހުންނަށް ވަކި ދުވާރެއް ހިމެނޭ ގޮތަށެވެ. މުޅި މަޝްރޫޢު ނިންމުމަށް ކަނޑައެޅި ތާރީޚަށްވުރެ 25 ދުވަސް ކުރިން މަސައްކަތް އެއްކޮށް ނިންމާލެވުމަކީ ޑރ. މުޢިއްޒުގެ ޓީމުގެ ވަގުތަށް ކަންކަން ނިންމުމުގެ ހުނަރު ހާމަކޮށްދިން ކަމެކެވެ.

އުމްރާނީ އެތައް މަޝްރޫޢަކާއެކު ގެނެސްދެއްވި ނަތީޖާ

ސިނަމާލެ ބްރިޖުގެ މަސައްކަތް ހިނގަމުން ދިޔަ ދުވަސްވަރަކީ ރާއްޖޭގެ ތާރީޚުގައިވެސް އެންމެ ގިނަ އަދަދަކަށް ބޯހިޔާވަހިކަމުގެ މަޝްރޫޢުތަކާއި، ބަނދަރުތަކާއި، މާލޭގެ ބޭރުމަގު ހެދުން ފަދަ އުމްރާނީ ތަރައްޤީގެ އެތައް ސަތޭކަ މަޝްރޫޢުތަކެއް ފުލުފުލުގައި ހިނގަމުންދިޔަ ދުވަސްވަރެކެވެ. މި ހުރިހާ މަޝްރޫޢުތަކެއްގެ ޒިންމާ އުފުއްލަވަމުންވެސް، އެއްވެސް މަސައްކަތަކަށް މަޑުޖެހުމެއް އަޔަނުދީ، ސިނަމާލެ ބްރިޖުގެ މަސައްކަތް ތާވަލާ އެއްގޮތަށް ޑެލިވަރކޮށްދެއްވުމަކީ ޑރ. މުޢިއްޒުގެ ހީވާގިކަމާއި ލީޑަރޝިޕް ދައްކުވައިދިން ސާފު ހެއްކެކެވެ.

ރައީސް މުޢިއްޒުގެ ނަންފުޅު ޤއުމީ ތާރީޚުގައި އަބަދުވެސް ފަޚުރުވެރިކަމާއެކު ފާހަގަކުރެވޭނެ

ސިނަމާލެ ބްރިޖަކީ ހަމައެކަނި ދެ ރަށް ގުޅުވާލަދިން ވަސީލަތެއް ނޫނެވެ. އެއީ ދިވެހިރައްޔިތުންގެ ދިރިއުޅުމުގެ ފެންވަރު މަތިކޮށް، ޤައުމުގެ އިޤްތިޞާދީ އޮއިވަރު ބަދަލުކޮށްލި ތާރީޚީ ބިނާއެކެވެ. މި ބޮޑު މަޝްރޫޢު ކާމިޔާބުކަމާއެކު ނިންމަވައި ރައްޔިތުންނާ ހަމައަށް ގެނެސްދެއްވުމުގައި ރައީސް ޑރ. މުޙައްމަދު މުޢިއްޒު އަދާކުރެއްވި މުހިންމު ދައުރާއި އެމަނިކުފާނުގެ އިޚްލާޞްތެރި މަސައްކަތްޕުޅަކީ ޤައުމީ ތާރީޚުގައި އަބަދުވެސް ފަޚުރުވެރިކަމާއެކު ފާހަގަކުރެވޭނެ އަގުހުރި ޚިދުމަތެކެވެ.