ހުޅުމާލެ ދެވަނަ ފިޔަވަހީގައި އިއްޔެ ހިނގި ނުރައްކާތެރި އެކްސިޑެންޓެއްގައި ބައްޕައަކާއި ދަރިއަކަށް އަނިޔާވެ، އޭގެ ތެރެއިން ބައްޕަގެ ހާލު ސީރިއަސްވެގެން ސިކުނޑީގެ އޮޕަރޭޝަނެއް ކޮށްފިއެވެ.

ފުލުހުން ވިދާޅުވި ގޮތުގައި މި އެކްސިޑެންޓް ހިނގާފައިވަނީ ހުޅުމާލެ ދެވަނަ ފިޔަވަހީގެ ހީނާމާ ހިނގުމާއި ދުނބުރިގަސް މަގު ގުޅުނު ހަތަރުއަނގޮޅީގައެވެ. މި ހާދިސާގެ މައުލޫމާތު ފުލުހުންނަށް ރިޕޯޓްކޮށްފައިވަނީ އިއްޔެ ހެނދުނު 7:44 ހާއިރުއެވެ. މި އެކްސިޑެންޓް ހިނގާފައިވަނީ ކާރަކާއި ސައިކަލެއް ޖެހިގެންނެވެ.

Ad by Hajj Corporation

މި އެކްސިޑެންޓުގައި ސައިކަލް ދުއްވަން އިން އުމުރުން 62 އަހަރުގެ ފިރިހެނަކަށާއި، ސައިކަލް ފަހަތުގައި އިން އޭނާގެ ދަރިފުޅު، އުމުރުން 24 އަހަރުގެ ފިރިހެނަކަށް އެކިވަރުގެ އަނިޔާތައް ލިބިފައިވާ ކަމަށް ފުލުހުން މައުލޫމާތު ދެއެވެ.

އަނިޔާވި މީހުންގެ ތެރެއިން އުމުރުން 62 އަހަރުގެ މީހާއަށް މިހާރު ފަރުވާދެމުން އަންނަނީ ޓްރީ ޓޮޕް ހޮސްޕިޓަލުގައެވެ. އާއިލާއާ ހަވާލާދީ ފުލުހުން ބުނީ، އޭނާގެ ސިކުނޑީގެ ކަނާތް ފަރާތަށް ލޭއެޅިފައިވާތީ ބޮލުގެ އޮޕަރޭޝަނެއް ކޮށްފައިވާ ކަމަށެވެ.

"އަދި މިހާރު އޭނާ އަށް ދަނީ ޓްރީޓޮޕް ހޮސްޕިޓަލުގެ އައިސީޔޫގައި ފަރުވާދެމުންނެވެ،" ފުލުހުން މީޑިއާތަކަށް ފޮނުވި މެސެޖުގައި ބުނެފަވެއެވެ.

ފުލުހުން ދަނީ މި އެކްސިޑެންޓާ ގުޅިގެން ބަލަންޖެހޭ ކަންކަން އިތުރަށް ތަހުގީގު ކުރަމުންނެވެ.

ހުޅުމާލެ ދެވަނަ ފިޔަވަހީގައި މިފަދަ ނުރައްކާތެރި އެކްސިޑެންޓެއް ހިނގާފައިވާއިރު، މިދިޔަ ހޮނިހިރު ދުވަހުގެ ރޭ ވިނަރެސް ހަތެއް ކައިރީގައި ހިނގި އެކްސިޑެންޓެއްގައި ސީރިއަސް އަނިޔާތަކެއް ލިބުނު އުމުރުން ނުވަ އަހަރުގެ ޒީވާ ސިނާން އަހުމަދު ވެސް ވަނީ ރޭ ފަތިހު ނިޔާވެފައެވެ.