ރައްޔިތުން ގޭތެރޭގައި ބޭތިއްބުމަށްފަހު އެމްޑީޕީގެ ވެރިކަމުގައި ގިނަ "ސަކަރާތްތަކެއް" ޖަހާފައިވާކަމަށް ކުރިންސުރެ އަޑުފެތުރުނެވެ. ނަމަވެސް އޭރު އެކަމުގެ ހަގީގަތް ނޭނގޭކަމަށާއި ވައްކަން ކޮށްފައިހުރީ ކިހާ މިންވަރެއްގެ ފައިސާ އެއް ބޭނުންކޮށްގެންކަމާއި ކިހިނެތްކަން ނޭނގޭ ކަމަށް ސަރުކާރުގެ އިސް ފަރާތްތަކުން ބުނެއެވެ.

ވީކްލީ ފިސްކަލް ޑިވެލޮޕްމަންޓް ރިޕޯޓު ނެރުން އައު ސަރުކާރުން ޖޫންމަހު މަޑު ޖައްސާލުމާ ގުޅިގެން އިދިކޮޅު ފަރާތްތަކުގެ ފާޑުކިޔުންތައް ބޮޑުވިއެވެ. އެކަމުގެ ޖަވާބު ދެއްވީ ހޮނިހިރުދުވަހު ރައީސުލްޖުމްހޫރިއްޔާގެ އޮފީހުން ބޭއްވި ނޫސްވެރިންގެ ބައްދަލުވުމުގައި ފިނޭނެސް މިނިސްޓަރު މޫސާ ޒަމީރެވެ. ވިދާޅުވީ ދައުލަތުގެ ހަރަދު ރެކޯޑުކުރަމުން ދިޔަ ގޮތާ ގުޅޭ ސީރިއަސް އަދި ގާނޫނާ ފުށުއަރާފަދަ ސީރިއަސް މައްސަލަތަކެއް ފާހަގަވެފައިވާކަމަށެވެ. މިދިޔަ އަހަރުގެ ބަޖެޓުގައި ޕޯސްޓްކޮށްފައިހުރި އެހެން ނަމަވެސް 2023 ވަނަ އަހަރުގެ ކޭޝްޕްލޯއިން ފައިސާ އަދާ ނުކުރެވި ހުރި 3 ބިލިއަނެއްހާ ރުފިޔާ ވަނީ މި އަހަރުގެ ކޭޝްފްލޯއިން އަދާކޮށްފައިކަމަށް މިނިސްޓަރު ވިދާޅުވިއެވެ.

"ދެ ބިލިއަން ރުފިޔާގެ ތަފާތު އެބަހުރި . މިއަހަރުގެ ބަޖެޓަށް އެބައި ވައްދައިފިނަމަ މިދިޔަ އަހަރުގެ ބަޖެޓަށްވުރެ މިއަހަރުގެ ބަޖެޓަށް 2 ބިލިއަން އިތުރުވަނެ."

ކުދި އަދަދުތައް ބަޖެޓުގައި ޖަހާފައި ބޮޑެތި އަދަދުތުން ހަރަދު ކޮށްފައިވާކަމަށާއި މިއީ ގާނުނާ ހިލާފު ކަންކަންކަމަށް ޒަމީރު ވިދާޅުވިއެވެ.

2020 ވަނަ އަހަރު ކޮވިޑުގެ އެންމެ ގޯސް ހާލަތަށް ތައްޔާރުވުމުގެ ގޮތުން ރާއްޖެއަށް ގެނައުމަށް ފައިސާ ދެއްކި ވެންޓިލޭޓަރުގެ އެއްބަސްވުމުގެ ނާޖާއިޒް ފައިސާ ނަގައި ކޮރަޕްޝަނަށް މަގުފައިވާ އަމަލުތައް ހިންގާފައިވާ މައްސަލައަކީ ރައްޔިތުން މިހާރުވެސް ކަންބޮޑުވުން ފާޅުކުރަމުންދާ އެމްޑީޕީގެ ކޮރަޕްޝަނުގެ މައްސަލައެކެވެ. 75 ވެންޓިލޭޓަރު ގަންނަން 34 މިލިއަން ރުފިޔާ ދުބާއީގެ އެގްޒެކިއުޓާސްއާ ހަވާލުކުރި ނަމަވެސް މިހާތަނަށް ލިބިފައިވަނީ އެންމެ 10 ވެންޓިލޭޓަރެވެ. ބާކީ ހުރި ވެންޓިލޭޓަރުތައް ނުފޮނުވާއިރު ފައިސާ ވެސް އަނބުރާ ދީފައިނުވެއެވެ. މި މުއާމަލާތުގެ ތެރެއިން ދައުލަތަށް މިލިއަނުން ފައިސާ ގެއްލިފައިވާއިރު މި ފައިސާ އަނބުރާ ލިބޭނެތޯ މިއީ ސުވާލެކެވެ.

ވެންޓިލޭޓަރުގެ ވައްކަމާ ގުޅިގެން ބަންޑާރަނައިބު ވާހަކަދެއްކެވިއެވެ. ވިދާޅުވީ ގޮންޖެހުންތަކެއް ހުރިނަމަވެސް ގެއްލުނު ފައިސާ ހޯދާނެކަމަށެވެ.

"ދުބާއީ ކުންފުންޏަކާ ގުޅިގެން ފައިސާ ހޯދުމުގެ މަސައްކަތް އެބަ ކުރިއަށްދޭ. ކުރިއެރުންވެސް އެބަ ލިބޭ." ބަންޑާރަ ނައިބު

ކޮވިޑް ތެރޭގައި އެމްޑީޕީން ހިންގި ވައްކަމުގެ ތަފްސީލުތަކާ ގުޅިގެން މެންދުރު ޓީވީގެ މައުޟޫ ޕްރޮގްރާމުގައި ބާރަށު ދާއިރާގެ މެމްބަރު އިބްރާހިމް ޝުޖާއު ވަނީ ވާހަކަފުޅު ދައްކަވާފައެވެ.

"ކޮވިޑްއާ އަޅުވާ ހުރިހާ ކަމެއް ކޮށްފައި ހުރީ. މަޝްރޫއު ނުހިންގާ ރަށްރަށަށް ހަރަދު ކޮށްފައިހުރިީ. ކޮވިޑް ފެސިލިޓީތަކުގައި ބޮޑެތި ވައްކަންތައް ކޮށްފައިހުރީ." މެމްބަރު ޝުޖާއު

މާލީ ހިސާބުތައް އޮޅުވާލީ ރައީސް އޮފީހުގެ ނުފޫޒުންކަމަށާއި ސަރުކާރުން ހަދަނީ ބުހުތާނު ދޮގުކަމަށް ވިދާޅުވެ އެމްޑީޕީ ސަރުކާރުގެ މާލީ ވަޒީރު އިބްރާހިމް އަމީރުވަނީ މިކަމާ ގުޅިގެން އެކްގައި ޕޯސްޓެއްކުރައްވާފައެވެ. އަމީރަށް ރައްދު ދެއްވީ ނައިބު ރައީސް ހުސައިން މުހައްމަދު ލަތީފެވެ. ވިދާޅުވީ ފެނިގެން ދަނީ ނިމިދިޔަ ސަރުކާރުން ލިބުނު ސުޕް މެޖޯރިޓީ ބޭނުންކޮށްގެން ނަހަމަ ގޮތުގައި ކުރަމުންދިޔަ ކަންކަން ފަސްއަޅައި ފޮރުވުމުގެ ނަތީޖާކަމަށެވެ. ދިވެހި ދައުލަތަށް ކޮވިޑްގެ ދުވަސްވަރު ލިބުނު އެހީތަކުގެ ތަފްސީލުވެސް ފޮރުވާފައިވާކަމަށާއި ގާނޫނު އަސާސީއާ ހިލާފަށް ކޮށްފައިވާ ކަންކަމަށް ފުރިހަމައަށް ޖަވާބުދާރީވާން ޖެހެނޭކަމަށް އެމަނިކުފާނު ވިދާޅުވިއެވެ.

މިކަމާ ގުޅިން ފިޝަރީޒް މިނިސްޓަރު އަހުމަދު ޝިޔާމް ވެސް ވަނީ ކަންބޮޑުވުން ފާޅުކުރައްވާފައެވެ. ވިދާޅުވީ 19 ވަނަ ރައްޔިތުންގެ މަޖިލީހުގައި މިވާހަކަ ދައްކާފައިވާނެކަމަށެވެ. މާލިއްޔަތު ޤާނޫނާ އަދި ދައުލަތުގެ ޚަރަދަށް ޒިންމާވާ ޤާނޫނާ ޚިލާފަށް އޭރު ސަރުކާރުން ދިޔައީ ތަނެއް ދޮރެއް ނުބަލާ ޚަރަދުކޮށް އެތައްގުނައެއް އަގުބޮޑުކޮށް ޕްރޮޖެކްޓުތައް ގާތް އެކުވެރިންނަށްދީ ބޮޑެތި އަދަދުތަކުން ބަދަލުދެމުންކަން ޝިޔާމް ފާހަގަކުރެއްވިއެވެ. ޝިޔާމް އިތުރަށް ވިދާޅުވީ ސަޕްލިމެންޓަރީ ބަޖެޓް ކޮންމެ އަހަރެއްގެ ބަޖެޓުގެ ބަނޑުދޮށަށްލައިގެން މަޖިލީހަށް ގެނެސް ފާސްކުރާއިރު އޮންނަނީ މާކުރިން އެޚަރަދުކޮށްފައިިކަމަށެވެ.

" ހިސާބުތައް ދިމާނުވާ ވާހަކަ އަޅުގަނޑުމެން ދެއްކީ ނުހަނު ކަންބޮޑުވުމާއިއެކު. މީ އެއްވެސް ހާލެއްގައި އަޅާނުލާ ދޫކޮށްލާވަރަށްވުރެ މާސީރިއަސް ކަމެއް. ޤައުމުގެ މުސްތަޤުބަލަށްޓަކައިވެސް މިކަން ބަލަންޖެހޭ".

ޕީއެންސީ މެމްބަރުންގެ ވާހަކަތަކަށް ރައްދުދީ ކުރީގެ ދިފާއީ ވަޒީރު މާރިޔާ އަހުމަދު ދީދީ ވަނީ އެމްޑީޕީގެ ވެރިކަމުގައި މިދިޔަ އަހަރު ދައުލަތުގެ ބަޖެޓުން ހަރަދުކުރުމަށް ފަހު ފިނޭންސް މިނިސްޓްރީގެ ސިސްޓަމަށް ނުވައްދާ ރެކޯޑް ނުކޮށް ހުރި މައްސަލަ ބަލަން ގޮވާލާފައެވެ. މާރިޔާ ވިދާޅުވީ ބަލަންޖެހޭކަމަށް ދެކިގެން ލަސްނުކުރުމަށާއި އެކަމަކު އެއީ މާލީ ހިސާބުތައް ހާމަކުރަން ދައްކާ ބަހަނާއަކަށް ވެގެންނުވާނެކަމަށެވެ.

މިއާއެކު ޕީއެންސީގެ ފަރާތުން މަޖިލީހުގައި އިނގުރައިދޫ ދާއިރާ ތަމްސީލުކުރައްވާ މެމްބަރު ފަލާހުއާއި ކުރީގެ މެމްބަރު އިބްރާހީމް ރަޝީދު (ބޮންޑާ) މީޑިއާއަށް ދޫކުރެއްވީ 19 ވަނަ މަޖިލީހުގައި ކުރީގެ ރައީސް މުހައްމަދު ނަޝީދު ދެއްކެވި ވާހަކަފުޅެވެ. ސަޕްލަމެންޓަރީ ބަޖެޓްގެ ބަހުސްގައި ވާހަކަފުޅު ދައްކަވަމުން ރައީސް ނަޝީދު ވިދާޅުވެފައިވަނީ ހުށަހެޅިފައިވަނީ ސަޕްލަމެންޓަރީ ބަޖެޓެއްނޫންކަމަށާއި ހުށަހެޅިފައިވަނީ ވައްކަމުގެ ރަސީދެއްކަމަށެވެ.

"ސަރުކާރަކަށް ހަރަދެއް ނުބެލެހެއްޓުނު. މިއޮތީ މާލީ ވަޒީރާއި ދައުލަތުން ވައްކަން ކޮށްފައި ވައްކަމުގެ ރަސީދެއް ފޮނުވާފައި. "

ފިނޭންސް މިނިސްޓަރާއި ބަންޑާރަނައިބު ހާމަކުރެއްވީ އަޅާނުލައި ދޫކުރެވޭވަރަށްވުރެ ބޮޑު މައްސަލައެވެ. މިކަމުގެ ކަންބޮޑުވުން އެތައް ރައްޔިތުންނަކާއި ސިޔާސީ ފަރާތްތަކުން މިހާރު އަންނަނީ ފާޅުކުރަމުންނެވެ. ސުވާލަކީ ކޮންމެ ސަރުކާރަކުންވެސް ހިންގާ ކޮރަޕްޝަނުގެ މައްސަލަތަކަށް އެ ޖަވާބުދާރީ ކުރެވި ފިޔަވަޅު އެޅޭނީ ކިހިނެތްހެއްޔެވެ؟