ފަހިދިރިއުޅުން ކޯޕަރޭޝަން (އެފްޑީސީ) އިން ތަރައްގީކޮށްފައިވާ ފަހި ފްލެޓް ކުއްޔަށް ދިން މީހަކު ޖޫރިމަނާކޮށް ދެ މީހަކަށް ލިޔުމުން އިންޒާރުދީފިއެވެ.

އެފްޑީސީއިން ވަނީ މިއަދުގެ ނިޔަލަށް ފަހި ފްލެޓްތަކުގެ ޔުނިޓްތަކަށް ދޫކޮށްފައިވާ ޖޫރިމަނާ އަދި އިންޒާރުގެ މައުލޫމާތު އާންމުކޮށްފައެވެ. އެގޮތުން ހުއްދަނެތި ބަދަލުގެނައުމުގެ 27 މައްސަލަ ހުށަހަޅާފައިވާ ކަމަށާއި އޭގެތެރެއިން 25 މައްސަލަ ބަލަމުންދާއިރު އެކަކު ޖޫރިމަނާކޮށް ދެ މީހަކަށް ނޯޓިސް ފޮނުވާފައިވާ ކަމަށް އެފްޑީސީއިން ބުނެފައިވެއެވެ.

Ad by Hajj Corporation

މީގެއިތުރުން ހުއްދަނެތި ކުއްޔަށް ދިނުމުގެ 11 މައްސަލައެއް ހުށަހަޅާފައިވާއިރު އަށް މައްސަލައެއް ބަލަމުންދާ ކަމަށާއި އަދި، އެކަކު ޖޫރިމަނާކޮށް ދެ މީހަކަށް ނޯޓިސް ފޮނުވާފައިވާ ކަމަށް ވެސް އެ ކޯޕަރޭޝަނުން ބުނެފައިވެއެވެ.

އެފްޑީސީއިން ބުނީ ކުނި އެޅުމުގެ ގަވައިދާ ހިލާފުވުމުގެ ތިން މައްސަލަ ހުށަހަޅާފައިވާ ކަމަށެވެ. އޭގެ ތެރެއިން އެއް މައްސަލަ ބަލަމުންދާ ކަމަށާއި ދެ މީހަކު ޖޫރިމަނާކޮށްފައިވާ ކަމަށެވެ.

މަހުން މަހަށް ގަވައިދުން 3405 ޔުނިޓުން ކުލި ނުދައްކާ ކަމަށާއި، އަދި 509 ޔުނިޓްގެ ކުލި ޕެންޑިންގައި ހުރިކަމަށް ވެސް އެ ކޯޕަރޭޝަނުން މައުލޫމާތުދެއެވެ.

އެ ކޯޕަރޭޝަންގެ ހައުސިން ޔުނިޓުތަކަކީ އާއިލާތަކުގެ ދިރިއުޅުމަށް ހާއްސަކޮށް ދޫކުރެވިފައިވާ ތަންތަނަށް ވީހިނދު، ވިޔަފާރީގެ އުސޫލުން ބޮޑު އަގުގައި އެ ތަންތަން ކުއްޔަށް ދޫކުރުމަކީ ވެފައިވާ އެއްބަސްވުމާ ކަނޑައެޅިގެން ހިލާފު ކަމެއް ކަމުގައި އެފްޑީސީން ދަނީ ތަކުރާރަުކޮށް އާންމުންނަށް ހަނދާންކޮށްދެމުންނެވެ.