ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލެ ފޭސް 2 ގައި އިމާރާތްކޮށްފައިވާ ފްލެޓްތަކުގެ ޔުޓިލިޓީ ބެލްކަންޏާއި ކުޑަދޮރުތަކަށް ގެނެސްފައިވާ ބަދަލުތައް، އަންނަ މަހުގެ 28 ވަނަ ދުވަހުގެ ކުރިން އުސޫލާ އެއްގޮތަށް ބަދަލުކުރުމަށް އެ ކުންފުނިން އަލުން އަންގައިފި އެެވެ.

މި ފްލެޓްތަކުގައި މީހުން ދިރިއުޅެން ފެށުމަށްފަހު އެކި ގޮތްގޮތަށް ބެލްކަންޏަށް ބަދަލުތައް ގެންދާތީ، އުސޫލާ ހިލާފަށް އެކަން ނުކުރުމަށް މީގެ ކުރިންވެސް އެފްޑީސީން އެންގި އެވެ. ނަމަވެސް ބައެއް ފަރާތްތަކުން އެ އެންގުމާ އެއްގޮތަށް އަމަލުކޮށްފައި ނުވާތީ، މިއީ އެކަން ރަނގަޅު ކުރުމަށް ލިބޭ އެންމެ ފަހުގެ ފުރުސަތު ކަމަށް އެ ކުންފުނިން ބުނެއެވެ. އެ މުއްދަތުގެ ތެރޭގައި ބެލްކަނިތައް ބަދަލުނުކުރާ ފަރާތްތަކާމެދު އެއްބަސްވުމާ އެއްގޮތަށް ޖޫރިމަނާކޮށް ފިޔަވަޅު އަޅާނެ ކަމަށްވެސް އަންގާފައިވެ އެވެ.

Ad by Hajj Corporation

 ކަނޑައަޅާފައިވާ މިންގަނޑުތަކާ ހިލާފަށް ކުޑަދޮރު ހަރުކޮށްފައިވާ ފަރާތްތަކުންވެސް އެފްޑީސީގެ އުސޫލުތަކާ އެއްގޮތަށް އެ ތަންތަން ބަދަލުކުރަން ޖެހޭނެ އެވެ. އެ ކުންފުނީގެ ވެބްސައިޓުގައިވާ ގަވާއިދުގައި ބަޔާންކުރާ ގޮތުގެ އިތުރުން އެއްވެސް އިތުރު ބަދަލެއް ގެނައުމަކީ މަނާކަމެކެވެ. އެފްޑީސީން ހުއްދަ ދީފައިވަނީ ހަމައެކަނި ދެ ގޮތަކަށް އެކަން ކުރުމަށެވެ. އެއީ ސްލައިޑިން ލޫވާ ފިކްސިން އާއި ގްރިލް އެންޑް ނެޓް ފިކްސިން އެވެ. އެ ދެ ގޮތަށް ހުއްދަ ދީފައިވަނީ ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމާއެކު އެކަށީގެންވާ މިންވަރަށް ވައި ދައުރުކުރުމަށް މަގުފަހިކޮށްދިނުމުގެ ގޮތުންނެވެ.

 ހުޅުމާލެ 2 ގައި ހުންނަ އެފްޑީސީގެ ޓަވަރުތަކުން ކުޑަކުދިން ވެއްޓުނު ހާދިސާތަކަކާ ގުޅިގެން އިމާރާތްތަކުގެ ސަލާމަތީ ކަންކަން ރަނގަޅުކުރުމުގެ މަސައްކަތްތައް ވަނީ ފަށާފައެވެ. އެގޮތުން އެޗްޑީސީ އާއި އެފްޑީސީ ގުޅިގެން ކުޑަދޮރުތައް މާބޮޑަށް ނުހުޅުވޭ ގޮތް ހެދުމާއި، ބެލްކަނީގައި ރެއިލިން ހަރުކުރުމާއި، ބެލްކަނިތައް 1.4 މީޓަރަށް އުސްކޮށްދިނުމުގެ މަސައްކަތް ކުރަމުންދެއެވެ. މީގެ އިތުރުން ހާއްސަ އެހީއަށް ބޭނުންވާ ކުދިންނާއި ސީރިއަސް ބަލިމީހުން އުޅޭ ގެތަކުން ބޭނުންވާނަމަ، އެޗްޑީސީގެ ސީއެސްއާރުގެ ދަށުން ބެލްކަނި އެއްކޮށް ބަންދުކޮށްދިނުމުގެ މަސައްކަތްވެސް ކޮށްދޭން ވަނީ ނިންމާފައެވެ.