ދިވެހިރާއްޖޭގައި ބޭރު ފައިސާ މާރުކުރުމުގެ ލައިސަންސް ނެތި އެފަދަ ވިޔަފާރިކުރާ ފަރާތްތަކާއެކު އެއްވެސް މުއާމަލާތެއް ނުކުރުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިލްތިމާސްކޮށްފިއެވެ.

އެމްއެމްއޭއިން ނެރުނު ބަޔާނެއްގައި ފާހަގަކޮށްފައިވާ ގޮތުގައި، ދިވެހިރާއްޖޭގައި ބޭރު ފައިސާ މާރުކުރުމުގެ ވިޔަފާރި ކުރަންވާނީ އެ އޮތޯރިޓީން ދޫކުރާ ލައިސަންސެއް އޮވެގެންކަން ޤާނޫނު ނަންބަރު 32/2024 (ބޭރު ފައިސާއާބެހޭ ޤާނޫނު) އަދި މަނީ ޗޭންޖިންގ ވިޔަފާރިއާބެހޭ ގަވާއިދުގައި ވަނީ ސާފުކޮށް ބަޔާންކޮށްފައެވެ. ނަމަވެސް، ބައެއް ފަރާތްތަކުން ލައިސަންސް ނެތި ބޭރު ފައިސާ މާރުކުރުމުގެ މުއާމަލާތްތައް ކުރަމުންދާކަން ވަނީ ފާހަގަކުރެވިފައެވެ.

Ad by Hajj Corporation

މަރުކަޒީ ބޭންކުން ބުނީ މިއީ ދިވެހިރާއްޖޭގެ ޤާނޫނުތަކުގެ ދަށުން ކުށެއް ކަމަށެވެ. އެހެންކަމުން އެއްވެސް ފަރާތަކުން އެމްއެމްއޭގެ ލައިސަންސް ނެތި ބޭރު ފައިސާ މާރުކުރުމުގެ ވިޔަފާރިކުރާ ފަރާތްތަކާއެކު އެފަދަ އެއްވެސް މުއާމަލާތެއް ނުކުރުމަށް ވަނީ އިލްތިމާސްކޮށްފައެވެ.

ދިވެހިރާއްޖޭގައި ބޭރުފައިސާ މާރުކުރުމުގެ ވިޔަފާރި ކުރުމުގެ ލައިސަންސް ދޫކޮށްފައިވާ ފަރާތްތަކުގެ އަދާހަމަ ލިސްޓް އެ އޮތޯރިޓީގެ ވެބްސައިޓުން ފެންނަން ހުންނާނެ ކަމަށް އެމްއެމްއޭއިން ބުނެއެވެ. އަދި މިހާތަނަށް ލައިސަންސް ދޫކުރެވިފައިވާ 59 ފަރާތެއްގެ މަޢުލޫމާތު ވަނީ އާންމުކޮށްފައެވެ.

އެހެންކަމުން، ބޭންކެއް ފިޔަވައި އެހެން ފަރާތަކާއެކު ބޭރު ފައިސާ މާރުކުރުމުގެ މުއާމަލާތެއް ކުރާނަމަ، އެ މުއާމަލާތް ކުރެވެނީ ލައިސަންސް ލިބިފައިވާ ފަރާތަކާއެކު ކަން ކަށަވަރުކޮށް، ޤާނޫނާއި ގަވާއިދާ އެއްގޮތަށް އަމަލުކުރުމަށް އެމްއެމްއޭއިން ވަނީ ހަނދާންކޮށްދީފައެވެ.