މޯލްޑިވްސް މަނިޓަރީ އޮތޯރިޓީގެ ފިންލިޓް ފެސްޓް 2026 ގެ ކުރެހުމުގެ މުބާރާތައް ކުރެހުން ހުށަހެޅުމުގެ ފުރުސަތު ހުޅުވާލައިފިއެވެ.

އެމްއެމްއޭ އިން ބުނިގޮތުގައި މިއީ ރާއްޖޭގައި މާލީ ހޭލުންތެރިކަން އިތުރުކުރުމަށް އެ އޮތޯރިޓީ އިން ކުރަމުންދާ މަސައްކަތްތަކުގައި ކުޑަކުދީންނަށް އަމާޒުކޮށްގެން ކުރިއަށް ގެންދާ ހަރަކާތެކެވެ.

Ad by Hajj Corporation

އެގޮތުން ސްކޫލް ކުދިންނަށް ޚާއްސަކޮށްގެން ކުރިއަށް ގެންދާ މި މުބާރާތުގައި ދެ ކެޓަގަރީއަކުން ވާދަކުރެވޭނެއެވެ. އެއީ ގްރޭޑް 5އިން 7އަށް އަދި ގްރޭޑް 8އިން 9ގެ ކެޓަގަރީއެވެ. މި މުބާރާތުގައި ޑިޖިޓަލް ކުރެހުންތަކާއި ޑިޖިޓަލްނޫން ކުރެހުންތައް ވެސް ބަލައިގަންނަ ގޮތަށް ވަނީ ހަމަޖެހިފައި ކަމަށް އެމްއެމްއޭއިން ބުނެއެވެ.

މި މުބާރާތުގައި ފަސް ތީމަކަށް ކުރެހުން ހުށަހެޅިދާނެއެވެ. އެއީ މާލީ ދުޅަހެޔޮކަމާއި ވިސްނުންތެރިކަމާއެކު ފައިސާގެންގުޅުން، ފައިސާ ރައްކާކުރުމާއި މުސްތަގުބަލުގެ އަމާޒުތައް، އެންމެން ބައިވެރިވާ މާލީ އިގްތިސާދު، އީޖާދުތަކާއި ކުރިމަގުގައި ފައިސާ, އަދި ރައްކާތެރި ޒިންމާދާރު ދެމެހެއްޓެނިވި މާލީ ނިޒާމު ކަމަށް އެ އޮތޯރިޓީން މައުލޫމާތުދެއެވެ.

ފިންލިޓް ފެސްޓް ކުރެހުމުގެ މުބާރާތަށް ކުރެހުން ހުށަހަޅައިގެން 3000 ރުފިޔާއާ ހަމައަށް އިނާމު ލިބުމުގެ ފުރުސަތު އެބައޮތެވެ. އަދި މި މުބާރާތަށް ހުށަހެޅޭ ކުރެހުންތަކުން ހޮވާލެވޭ ބައެއް ކުރެހުންތައް އެމްއެމްއޭގެ އެކިއެކި އިވެންޓްތަކާއި ހޭލުންތެރިކަމުގެ ކެންޕޭނުތަކުގައި ވެސް ބޭނުންކުރާނެކަމަށް އެ އޮތޯރިޓީން ބުނެފައިވެއެވެ.

މި މުބާރާތަށް ކުރެހުން ހުށަހަޅާނީ finlit@mma.gov.mvއަށް އީމެއިލް މެދުވެރިކޮށް ނުވަތަ މޯލްޑިވްސް މަނިޓަރީ އޮތޯރިޓީއަށް ކުރެހުމުގެ އަސްލު ފޮނުވައިގެންނެވެ. ކުރެހުން ހުށަހެޅުމުގެ ސުންގަޑިއަކީ 1 ނޮވެންބަރު 2026ގެ 23:59އެވެ.