ފ. ބިލެތްދޫގެ ރަށްވެހިކަމުން ވަކިވާން އެދޭ މީހުންގެ އަތުން 5،000 ރުފިޔާގެ ފީއެއް ނެގުމަށާއި، އަލަށް އެ ރަށުގެ ރަށްވެއްސަކަށް ވާ މީހުންނަށް 2500 ރުފިޔާގެ ފައިސާގެ އިނާޔަތެއް ދިނުމަށް އެ ރަށު ކައުންސިލުން ނިންމައިފިއެވެ.

ބިލެތްދޫ ކައުންސިލުން އާންމުކޮށްފައިވާ މައުލޫމާތުގައިވާ ގޮތުން، އެ ރަށުގެ ރަށްވެހިކަން ދޫކޮށްލާ މީހުންގެ އަތުން 5،000 ރުފިޔާގެ ފީއެއް ނަގަން ނިންމާފައިވާއިރު، އަލަށް ރަށްވެހިވާ ކޮންމެ މީހަކަށް 2،500 ރުފިޔާގެ ހަދިޔާއެއް ދިނުމަށް ވަނީ ނިންމާފައެވެ.

Ad by Hajj Corporation

މިހާރު 967 މީހުންގެ އާބާދީއެއް އޮންނަ ބިލެތްދޫ ކައުންސިލުން މި ފިޔަވަޅު އަޅާފައިވަނީ ރަށުގެ ރަށްވެހިންގެ އަދަދު ދަށްވިޔަނުދީ ހިފެހެއްޓުމަށާއި، ރަށުގެ އާބާދީ އިތުރުކުރުމަށް ބާރުއެޅުމުގެ މަގުސަދުގައެވެ.

ރާއްޖޭގެ ބައެއް އެހެން ރަށްރަށުގެ ކައުންސިލްތަކުން ވެސް މީގެ ކުރިން މިފަދަ ފިޔަވަޅުތައް އަޅާފައިވެއެވެ. އެގޮތުން ޅ. ހިންނަވަރުން ވެސް ރަށްވެހިކަން ދޫކޮށްލާ މީހުންގެ އަތުން 2،000 ރުފިޔާގެ ފީއެއް ނެގުމަށް މީގެ ކުރިން ވަނީ ނިންމައި އަމަލުކޮށްފައެވެ.

ކުދި އާބާދީތައް އޮންނަ ރަށްރަށުން މީހުން ރަށްވެހިކަން ބަދަލުކުރުން ހުއްޓުވުމަށް އެކި ރަށްރަށުގެ ކައުންސިލްތަކުން އަންނަނީ އެކި އުސޫލުތައް ކަނޑައަޅަމުންނެވެ.