ދަ ޔުނިކޯޑް ކޮންސޯޓިއަމް އިން ނެރޭ ޔުނިކޯޑް ސްޓޭންޑާޑްގައި، ދިވެހި ރުފިޔާގެ ނިޝާން ބޭނުންކުރެވޭ ގޮތަށް ހަދައިފި އެވެ.

ޔުނިކޯޑް ސްޓޭންޑާޑް ވާޝަން ޔުނިކޯޑް 18.0 ގައި ދިވެހި ރުފިޔާގެ ނިޝާން ހިމަނާފައިވާއިރު، މި ނިޝާނަށް ދީފައިވާ ކޯޑް ޕޮއިންޓަކީ U+20C2 އެވެ.

Ad by Hajj Corporation

އެމްއެމްއޭއިން ބުނިގޮތުގައި 2022 ވަނަ އަހަރު ތައާރަފުކޮށްފައިވާ ދިވެހި ރުފިޔާގެ ނިޝާން ޔުނިކޯޑް ސްޓޭންޑާޑްގައި ހިމެނިގެން ދިއުމާއެކު، ވެބްސައިޓްތަކާއި މޯބައިލް އެޕްލިކޭޝަންތައް އަދި އެކިއެކި ޑިޖިޓަލް ޕްލެޓްފޯމްތަކުގައި ދިވެހި ރުފިޔާގެ ނިޝާން އެއް މިންގަނޑަކަށް ބޭނުންކުރެވޭނެއެވެ. މިއީ ޑިޖިޓަލް ވަސީލަތްތަކުގައި ދިވެހި ރުފިޔާގެ ނިޝާން ފަސޭހަކަމާއެކު ބޭނުންކުރެވޭނެ ގޮތް ހެދުމުގައި ހާސިލްވި މުހިންމު ލަނޑުދަނޑިއެއް ކަމަށް ވެސް އެމްއެމްއޭއިން ފާހަގަކޮށްފައިވެއެވެ.

އެހެންކަމުން، ޔުނިކޯޑް ސްޓޭންޑާޑްގައި ދިވެހި ރުފިޔާގެ ނިޝާން ހިމެނުމަށް އެމްއެމްއޭއަށް މަސައްކަތްކޮށްދިން ހުރިހާ ފަރާތްތަކަށް އެމްއެމްއޭއިން ވަނީ ޝުކުރު އަދާކޮށްފައެވެ. ޔުނިކޯޑް ކޮންސޯޓިއަމްއަކީ ޑިޖިޓަލް ޕްލެޓްފޯމްތަކުގައި އެކި ގައުމުތަކުގެ ފައިސާގެ ނިޝާންތައް އެއް މިންގަނޑަކުން ދެނެގަނެވޭ ގޮތަށް ހަދައި، އެކަން ބަލަހައްޓާ އިދާރާއެކެވެ. ނަމަވެސް ކޮންމެ ގައުމެއްގެ ފައިސާގެ ނިޝާންތައް ތައްޔާރުކޮށް ޑިޒައިން ކުރުމަކީ އެ ގައުމެއްގެ ރަސްމީ އިދާރާތަކުން އަމިއްލައަށް ކުރާ ކަމެކެވެ.