ދިވެހިރާއްޖޭގެ އިޤްތިޞާދީ ޙާލަތު ފާއިތުވި އަހަރުތަކުގައި އޮތީ ނުރައްކާތެރި ފައްތަރެއްގައެވެ. ކުރީގެ އެމްޑީޕީ ސަރުކާރުން ވެރިކަން ނިންމާލިއިރު، ދައުލަތް އޮތީ ބޮޑެތި ލޯނުތަކާއި ދަރަނީގެ ބޮޑު ދަންތުރައެއްގައި ތާށިވެފައެވެ. ނަމަވެސް މިހާރުގެ ސަރުކާރުން އިސްނަގައިގެން އަޅަމުންދާ ހަރުދަނާ މާލީ ފިޔަވަޅުތަކުގެ ސަބަބުން، ރައްޔިތުންގެ ބޮލުގައި އެޅިފައިވާ ބޮޑެތި ދަރަނިތަކުން ސަލާމަތްވުމުގެ އުންމީދު މިވަނީ އާވެފައެވެ. ވަކިން ޚާއްޞަކޮށް، ސްޓޭޓް ބޭންކް އޮފް އިންޑިއާ (އެސްބީއައި) މެދުވެރިކޮށް ނަގާފައިވާ 150 މިލިއަން ޑޮލަރުގެ ދަރަނި އެއްކޮށް ދައްކައި ޚަލާސްކުރުމަކީ މި ސަރުކާރަށް ޝުކުރު ޙައްޤު މުހިންމު ކާމިޔާބީއެކެވެ.

އެސްބީއައި ލޯނުގެ ފަސްމަންޒަރާއި ދަރަނީގެ މަޅި

Ad by Hajj Corporation

ކުރީގެ ސަރުކާރުން ބަޖެޓުގެ ދަރަނި ފޫބެއްދުމަށްޓަކައި 2019 ވަނަ އަހަރުގެ ތެރޭގައި އެސްބީއައި މެދުވެރިކޮށް 50 މިލިއަން ޑޮލަރުގެ ޓްރެޝަރީ ބިލްތަކެއްގެ ގޮތުގައި ތިން ފަހަރެއްގެ މަތިން ޖުމްލަ 150 މިލިއަން ޑޮލަރުގެ ދަރަނި ނެގިއެވެ. އެގޮތުން 2019 ވަނަ އަހަރުގެ މާރިޗު މަހުގެ 17 ގައި 50 މިލިއަން ޑޮލަރު، ޖޫން މަހުގެ 26 ގައި 50 މިލިއަން ޑޮލަރު އަދި އޮކްޓޫބަރު 1 ވަނަ ދުވަހު 50 މިލިއަން ޑޮލަރު ވަނީ ނަގާފައެވެ. މި ދަރަނި އަނބުރާ ދެއްކުމުގެ ޤާބިލުކަން ނެތި، 2020 އިން ފެށިގެން 2023 އާ ހަމައަށް އެ ދަރަނި ދެއްކުން ފަސްކުރަމުން ގޮސް، ރައްޔިތުން ތިބީ އިންތިހާ ބޮޑު މާލީ ބުރައެއްގެ ތެރޭގައެވެ.

ދަރަނި ދައްކައި ޚަލާސްކުރުމުގެ ހިކުމަތްތެރި ސްޓްރެޓެޖީ

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޒަޢާމަތުގައި މި ސަރުކާރުން ވަނީ އެ ދަރަނީގެ މަޅިން ދިވެހި ރައްޔިތުން ސަލާމަތްކޮށްދީފައެވެ. ސަރުކާރު ފެށުމަށްފަހު ފުރަތަމަ 50 މިލިއަން ޑޮލަރު 2024 ޖަނަވަރީ 7 ގައި ވަނީ ދައްކާފައެވެ. އަދި ބާކީ އޮތް ބައި އިންޑިއާ ސަރުކާރާއެކު މަޝްވަރާކޮށް، ރޯލްއޯވަރ ކުރުމަށްފަހު ފިޔަވަހިތަކަކަށް ބަހާލައިގެން މުޅިން ދައްކައި ނިންމާލިއެވެ. މިކަމާ ގުޅޭގޮތުން ރައީސުލްޖުމްހޫރިއްޔާ ވިދާޅުވެފައިވާ ފަދައިން، ކުރީ ސަރުކާރުން ރައްޔިތުންގެ ބޮލުގައި އެޅުވި 150 މިލިއަން ޑޮލަރުގެ ދަންތުރައިން ރައްޔިތުން މިވަނީ ސަލާމަތްކުރެވިފައެވެ.

އިތުރު ދަރަންޏަކާ ނުލައި މާލީ ޒިންމާ އަދާކުރުން

މި ސަރުކާރުގެ އެންމެ ފާހަގަކޮށްލެވޭ އެއް ސިފައަކީ، ކުރީގެ ދަރަނިތައް ދެއްކުމަށްޓަކައި އިތުރު ލޯނުތަކާއި ދަރަނިތައް ނުނަގައި، ދައުލަތުގެ އާމްދަނީއާއި މާލީ ވަސީލަތްތައް ހަރުދަނާކޮށްގެން ދަރަނި އަދާކުރަމުން ދިއުމެވެ. މާލީ ކަންކަމާއި ސަރުކާރު ކުންފުނިތަކާ ބެހޭ ވަޒީރު ޙަސަން ޒަރީރު ހާމަކުރައްވާފައިވާ ގޮތުގައި މި ސަރުކާރުން މިހާތަނަށް ދަރަނި ދެއްކުމަށް ޖުމްލަ 1.3 ބިލިއަން ޑޮލަރު ވަނީ ހޭދަކޮށްފައެވެ. މީގެ ތެރޭގައި ރާއްޖޭގެ ތާރީޚުގައި އެއްފަހަރާ ދެއްކި އެންމެ ބޮޑު ދަރަނި ކަމުގައިވާ 500 މިލިއަން ޑޮލަރުގެ ސުކޫކް ވެސް ހިމެނެއެވެ.

މާޒީއާ އަޅާބަލާއިރު ފެންނަ ބޮޑު ތަފާތު

ދަރަނި އަދާކުރުމުގައި މި ސަރުކާރުން ދައްކަމުންދާ ނަމޫނާއަކީ ފާއިތުވި ދެ ސަރުކާރުގެ ފުރަތަމަ ދެ އަހަރާއި ބަޔާ އަޅާބަލާއިރު ވަރަށް ބޮޑު ކުރިއެރުމެކެވެ. ރައީސް ޔާމީންގެ ސަރުކާރުގެ އެ މުއްދަތުގައި ދެއްކީ 191 މިލިއަން ޑޮލަރެވެ. އަދި ރައީސް ޞާލިޙުގެ ސަރުކާރުގައި ދެއްކުނީ 428 މިލިއަން ޑޮލަރެވެ. ނަމަވެސް މި ސަރުކާރުން ރަސްމީ ރިޒާވުގެ ބޮޑު ބައެއް ބޭނުންކޮށްގެންވެސް ދަނީ ޤައުމު ބަނގުރޫޓުވިޔަ ނުދީ، ދަރަނިތައް ޤަވާއިދުން އަދާކުރަމުންނެވެ.

މި ސަރުކާރަށް ތަޢުރީފް ހައްގު

ޚުލާޞާކޮށް ދަންނަވާނަމަ، ފާއިތުވި އެމްޑީޕީ ސަރުކާރުން ދައުލަތް ވައްޓާލި މާލީ އަނދަވަޅުން ޤައުމު ސަލާމަތްކުރުމަށް މި ސަރުކާރުން ކުރަމުންދާ މަސައްކަތްތަކަކީ ތަޢުރީފު ޙައްޤު މަސައްކަތްތަކެކެވެ. އެސްބީއައިގެ 150 މިލިއަން ޑޮލަރުގެ ދަރަނި ދައްކައި ޚަލާސްކުރުމަކީ ރާއްޖޭގެ އިޤްތިޞާދީ މިނިވަންކަމާއި ރައްޔިތުންގެ މުސްތަޤްބަލަށް ލިބުނު ވަރަށް ބޮޑު އުފަލެކެވެ. މިފަދަ ހަރުދަނާ މާލީ ސިޔާސަތުތަކުގެ ސަބަބުން ޤައުމުގެ އިޤްތިޞާދު ހަމަމަގަށް އެޅި، ދިވެހި ކޮންމެ ރައްޔިތަކަށްވެސް އޭގެ ހެޔޮ ފައިދާ ކުރާނެކަން ކަށަވަރެވެ.