ވެރިކަން ކުރާ ޕާޓީ -- ޕީއެންސީ މެމްބަރުންގެ އަދަދު 80،000 އަށް ވުރެ މައްޗަށް އަރައިފި އެވެ.

ޕީއެންސީގެ މެންބަރުންގެ ޖުމްލަ އަދަދު މިރޭ އިއުލާންކުރެއްވީ އެ ޕާޓީގެ ރައީސް އަދި ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ.

ސޯޝަލް ސެންޓަރުގައި ޕީއެންސީގެ ކޮންގްރެސް ނިންމުމަށް މިރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޑރ. މުއިއްޒު ވިދާޅުވީ މީގެ ދެ އަހަރު ކުރިން ޕީއެންސީގައި ތިބީ 3،000 މެމްބަރުން ކަމަށެވެ. އެކަމަކު ޕާޓީގެ މެމްބަރުންގެ އަދަދު އިތުރުކުރުމަށް ކުރެވުނު މަސައްކަތްތަކާއެކު މިރޭގެ ނިޔަލަށް އެ ޕާޓީގައި 80،803 މެމްބަރުން އެބަތިބި ކަމަށްވެސް ވިދާޅުވި އެވެ.

ރައީސް ވިދާޅުވީ ޕީއެންސީގެ މެމްބަރުންގެ އަދަދު އިތުރުވެގެން ދިއުމަކީ މަސައްކަތްތަކަށް ލިބޭ ހިތްވަރަކަށް ވާނެ ކަމަށެވެ.

ޕީއެންސީގެ މެންބަރުންގެ އަދަދު އިތުރުވުމަކީ ރައްޔިތުން އެ ޕާޓީގެ ފަލްސަފާ ގަބޫލުކުރާކަން އަންގައިދޭ ކަމެއް ކަމަށްވެސް ރައީސް ވިދާޅުވި އެވެ.

"އިރާދަކުރެވިއްޔާ ފަތުއަޑުގައި ދަމުން ދަމުން ގޮސް 100،000 އަށް ވުރެ ވެސް މައްޗަށް ދާނެ ކަމަށް ގަބޫލުކުރަނީ،" ރައީސް ވިދާޅުވި އެވެ.

ޕީއެންސީއަކީ މިހާރު ރާއްޖޭގައި އޮތް އެންމެ ބޮޑު ސިޔާސީ ޕާޓީ އެވެ. ޕީއެންސީގެ ކޮންގްރެސްގައި މިރޭ ވަނީ އެ ޕާޓީގެ މަތީ މަޖިލީހަށާއި ލީޑަޝިޕަށް އާ ދައުރަކަށް ހޮވުނު މެންބަރުން އިގުރާރުވެފަ އެވެ.

Ad by Hajj Corporation