ދިވެހިރާއްޖޭގެ ދީނީ ކަންކަން ހަރުދަނާކޮށް، ގައުމީވަންތަކަމާއި ސަގާފީ ސިފަތައް ދިރުވައި އާލާކުރުމުގެ ރޫޙުގައި، ތާރީހީ މުހިންމު ފިޔަވަޅެއް އެޅުމަށް އިސްލާމީ ކަންތައްތަކާއި އައުގާފާ ބެހޭ ވުޒާރާއިން ވަނީ ތައްޔާރުވެފައެވެ. އެގޮތުން، ރާއްޖޭގެ މިސްކިތްތަކުގައި އިމާމުވެ ނަމާދުކުރައްވައި އަދި ހުކުރު ހުތުބާ ކިޔާ އިމާމުންނާއި ޚަތީބުން ތުރުކުރެއްވުމަށް ހާއްސަ، މުޅިން އާ ރަސްމީ ފޭރާންކޮޅެއް ފަރުމާކުރައްވާނެކަން ވަޒީރު ޑރ. މުޙައްމަދު ޝަހީމް އަލީ ސައީދު ވަނީ ވިދާޅުވެފަ އެވެ. މިއީ ދިވެހި ތާރީހުގައި ވެސް މިފަދަގޮތަކަށް ރަސްމީ ހެދުމެއް އިމާމުންނަށް ހަމަޖައްސާ ފުރަތަމަ ފަހަރެވެ.

Ad by Hajj Corporation

މި ފޭރާންކޮޅު ފަރުމާކުރުމުގައި އެންމެ ބޮޑު އިސްކަމެއް ދީފައިވަނީ ދިވެހިންގެ މުއްސަނދި ތާރީހާއި، އާސާރީ ބިނާރާއި، އަދި ދިވެހިވަންތަ އިސްލާމީ ހަޟާރަތުގެ ނަމޫނާތަކަށެވެ. ވަޒީރު ވިދާޅުވިގޮތުގައި ޑިޒައިނަށް ހިޔާލު ހޯދާފައިވަނީ މާލޭގެ ހުކުރު މިސްކިތުގެ މުންނާރާއި، ދިވެހިން ޒަމާނުއްސުރެ ވިޔެ އުޅުނު ފަންނުވެރި ތުނޑުކުނަލުގެ ޑިޒައިނުތަކުގެ އިތުރުން ދިވެހި އިމާރާތްކުރުމުގެ ހުނަރު ދައްކުވައިދޭ ހިރިގަލުގެ ނަލަ ފަރުމާތަކުންނެވެ. މީގެ އިތުރުން ފޭރާމާ އެކަށީގެންވާ ގޮތަށް ބޮލުގައި އަޅާ ތާހިކާގެ ނަމޫނާއެއްވެސް މި ޑިޒައިނުގައި ހިމަނާފައިވެއެވެ.

މި މުހިންމު މަސައްކަތް މިހާރު އޮތީ ފުރަތަމަ މަރުހަލާގައެވެ. މިކަމާ ގުޅޭގޮތުން ވީހާވެސް ގިނަ ފަރާތްތަކުގެ ހިޔާލާއި މަޝްވަރާ ހޯދުމަށް ވުޒާރާއިން ވަނީ ހުޅުވާލާފައެވެ. އާންމުކޮށް ހުރިހާ ފަރާތްތަކެއްގެ ފިކުރާއި މަޝްވަރާއާއެކު އުފެދޭ ފުރިހަމަ ނަތީޖާއެއް ނެރުމަކީ މައިގަނޑު އެއް އަމާޒެވެ. އަދި މި އަންނަ މުއްދަތުގެ ތެރޭގައި މަސައްކަތް ނިންމައި، އަންނަ ރޯދަމަހަށް މި ފޭރާންކޮޅު އަމަލީގޮތުން ބޭނުންކުރުމަށް އަމާޒު ވަނީ ހިފާފަ އެވެ.

މިފަދަ ފޭރާންކޮޅެއް ތައާރަފު ކުރުމުގެ ފަހަތުގައިވާ އެންމެ ބޮޑު ފިކުރަކީ ބޭރުގެ އެކި ފަރާތްތަކުން އަންނަ ބިދޭސީ އާދަކާދަތަކާއި ނުފޫޒުތަކުން ދިވެހިންގެ ދީނީ ސަގާފަތް ސަލާމަތްކުރުމެވެ. ހަމައެއާއެކު، އިލްމުވެރިންނާއި ދީނީ ހިދުމަތްތެރިންގެ ކިބައިން ދިވެހިވަންތަ ސިފަތަކާއި، ގައުމީ ޝަހްސިއްޔަތު ފެންނަންހުރުމަކީ ރާއްޖޭގެ ތާރީހާއި ސަގާފަތް ކުރިއަށް އޮތް ޖީލުތަކަށް ގެންގޮސްދިނުމަށް ލިބޭނެ މުހިންމު ފުރުސަތެކެވެ. މިއީ އިމާމުން ހެނދުން އެޅުމުގެ މިންގަނޑަށް ގެންނަ ވަރަށް ކުލަގަދަ އަދި ޝަރަފުވެރި ބަދަލަކަށް ވެގެންދާނެއެވެ. އަދި މިފަދަ ސަގާފީ ޑިޒައިނަކަށް ފޭރާންކޮޅެއް ހަމަޖެހިގެންދިއުމުން، މިސްކިތްތަކުގެ މާހައުލަށް އިތުރު ފުރިހަމަކަމެއް ލިބިގެންދާނެ އެވެ.