އެމެރިކާގެ ނިއުޔޯކުގައި ކުރިއަށްދާ އދ. ގެ އާންމު މަޖިލީހުގެ 81 ވަނަ ސެޝަންގެ ހަވާސާގެ ތެރެއިން، ދިވެހިރާއްޖެއާއި ވިއެޓްނާމާ ދެމެދު ރަސްމީ މަޝްވަރާތައް ކުރިއަށް ގެންދިއުމާ ގުޅޭ ފަހުމުނާމާއެއްގައި ސޮއިކޮށްފި އެވެ.

މި އެއްބަސްވުމުގެ ޒަރީއާއިން ދެ ޤައުމުގެ ދެމެދުގައި މިހާރު އޮތް ގުޅުން އިތުރަށް ބަދަހިވެގެންދާނެއެވެ. ދިވެހި ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ ޚާރިޖީ ވަޒީރު އިރުތިޝާމް އާދަމް އެވެ. ވިއެޓްނާމްގެ ފަރާތުން ސޮއިކުރެއްވީ އެ ޤައުމުގެ މިނިސްޓަރ އޮފް ފޮރިން އެފެއަރސް ލެ ހައޮއި ޓްރަންގ އެވެ.
މި އެއްބަސްވުމުގެ ދަށުން ދެ ޤައުމުގެ ޚާރިޖީ ވުޒާރާއިން ގުޅިގެން، ރަސްމީ މަޝްވަރާތައް ކުރިއަށް ގެންދާނެ ޚާއްޞަ އޮނިގަނޑެއް އެކުލަވާލާނެއެވެ. މި އޮނިގަނޑުގެ ސަބަބުން ސަރަހައްދީ އަދި ބައިނަލްއަޤްވާމީ މައިދާނުގައި ދެ ޤައުމުގެ މަސްލަހަތު ހިމެނޭ މައްސަލަތަކުގައި ޤަވާއިދުން މަޝްވަރާކޮށް، ހަރުދަނާ މަންސައެއް ޤާއިމްވެގެންދާނެ އެވެ.
އެއްބަސްވުމުގައި ސޮއިކުރެއްވުމަށްފަހު ބޭއްވެވި ބައްދަލުވުމުގައި ވާހަކަފުޅުދައްކަވަމުން ޚާރިޖީ ވަޒީރު އިރުތިޝާމް އާދަމް ވަނީ، މި އެއްބަސްވުމުގެ ސަބަބުން ދެ ޤައުމު ގުޅިގެން މަސައްކަތްކުރުމުގެ ފުރުސަތު ފުޅާވެ، ރަސްމީ މުޢާމަލާތައް އިތުރުވެގެންދާނެ ކަމަށް ވިދާޅުވެފައެވެ. އަދި ވިއެޓްނާމާއެކު ގުޅިގެން މަސައްކަތްކުރާނެ ދާއިރާތަކާއި، ދެ ޤައުމަށް ފައިދާހުރި ކަންކަން ހޯދުމަށް ގާތުން މަސައްކަތްކޮށްދެއްވާނެ ކަމުގެ ޔަޤީންކަން އެ ކަމަނާ ދެއްވާފައިވެއެވެ.

Ad by Hajj Corporation