މާލޭގެ ސޯސަންމަގުގައި ހިނގި ނުރައްކާތެރި އެކްސިޑެންޓުގައި ޒަޚަމްވެގެން އޭޑީކޭ ހޮސްޕިޓަލުގައި ފަރުވާދެމުންދިޔަ މޯލްޑިވްސް އިމިގްރޭޝަންގެ މުވައްޒަފު، ޢާއިޝަތު މާހިދާ (26އ) ނިޔާވެއްޖެއެވެ.

Ad by Hajj Corporation

ފުލުހުން ވިދާޅުވި ގޮތުގައި އޭނާ ނިޔާވެފައިވަނީ އޭޑީކޭ ހޮސްޕިޓަލުގައި ފަރުވާދެމުންދަނިކޮށް މިއަދު ހަވީރުގެ ވަގުތެއްގައެވެ.

މާހިދާ ނިޔާވުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މީސްމީޑިއާ މެދުވެރިކުރައްވައި މަރްޙޫމާގެ ޢާއިލާއަށާއި މޯލްޑިވްސް އިމިގްރޭޝަންގެ މުވައްޒަފުންނަށް ތަޢުޒިޔާ ފޮނުއްވާފައެވެ.

"މާތްﷲގެ ތަނަވަސް ރަޙްމަތުގައި މަރްޙޫމާ ޢާއިޝަތު މާހިދާ ލަހައްޓަވައި، ސުވަރުގޭގެ ދާއިމީ ނިޢުމަތް މިންވަރު ކުރައްވާށި! އާމީން" ރައީސްގެ މެސެޖުގައި ވިދާޅުވެފަވެއެވެ.

މި އެކްސިޑެންޓް ހިނގާފައިވަނީ ސެޕްޓެމްބަރު 21 ވަނަ ދުވަހުގެ ދަންވަރު 01:12 އެހައިކަންހާއިރު ސޯސަންމަގުގައި ދެ ސައިކަލު ޖެހިގެންނެވެ. މި ހާދިސާގައި 3 މީހަކަށް އަނިޔާވެފައިވާއިރު، އޭގެ ތެރޭގައި ހިމެނެނީ ނިޔާވި އަންހެން މީހާގެ އިތުރުން 21 އަހަރާއި 22 އަހަރުގެ ދެ ފިރިހެނުންނެވެ. އެ ދެ ފިރިހެނުންނަށް ފަރުވާދެމުންދަނީ އައިޖީއެމް ހޮސްޕިޓަލުގައެވެ.

މި މައްސަލައާ ގުޅިގެން ފުލުހުން ވަނީ އެއް ސައިކަލު ދުއްވި ތ. ދިޔަމިގިލި، އައްސޭރި، މާހު ޙަސަން (21އ) ހައްޔަރުކޮށްފައެވެ. އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ކޯޓުން ވަނީ އޭނާގެ ބަންދަށް 15 ދުވަސް ޖަހައިދީފައެވެ. ކޯޓު އަމުރުގައި ބަޔާންކޮށްފައިވާ ގޮތުގައި، ސީސީޓީވީ ފޫޓޭޖާއި ހާދިސާ ރިޕޯޓް އަދި ޓްރެފިކް ވައިލޭޝަން ރެކޯޑުތަކުން އޭނާގެ މައްޗަށް އެކަށީގެންވާ ހެކި ވަނީ ލިބިފައެވެ.

މައްސަލަ ތަހުގީގުކުރާ އޮފިސަރު ކޯޓުގައި ވިދާޅުވެފައިވަނީ، ހައްޔަރުކުރި މީހާއަކީ އެއްގަމު އުޅަނދު ދުއްވުމުގެ ލައިސަންސް އޮންނަ މީހެއް ނޫން ކަމަށާއި، އޭނާ ބާރު ސްޕީޑުގައި ޒިގްޒެގްކޮށް ދުއްވުމުގެ ސަބަބުން ހިނގި މި އެކްސިޑެންޓުގައި އަނެއް ސައިކަލުގައި ތިބި ދެމީހުންގެ ސިކުނޑިއަށް ބޮޑެތި ގެއްލުންތަކެއް ލިބި ހާލަތު ވަރަށް ނާޒުކުވި ކަމަށެވެ. އަދި ލައިސަންސް ނެތި ދުއްވައިގެން މިއަހަރު ތެރޭގައި ހަތަރު ފަހަރެއްގެ މަތިން އޭނާ ޖޫރިމަނާކޮށްފައިވާ ކަމަށްވެސް ފުލުހުން ފާހަގަކޮށްފައިވެއެވެ.