ރަޝިއާގެ މޮސްކޯ އަދި ސެއިންޓް ޕީޓަސްބާގްގެ އިތުރުން ކަޒަކިސްތާނުގެ އަލްމަޓީގައި ކުރިއަށްދިޔަ "އައި އޭމް މޯލްޑިވްސް ރޯޑްޝޯ 2026" ގައި، އއ. ތޮއްޑޫގެ ލޯކަލް ޓޫރިޒަމްގެ ތަފާތު ތަޖުރިބާތައް ދައްކާލައި، ބައިނަލްއަގުވާމީ މުހިންމު މާކެޓުތަކުގައި އެ ރަށުގެ މަގުބޫލުކަން އިތުރުކުރުމުގެ މަސައްކަތް ކޮށްފިއެވެ.

ތޮއްޑޫ ތަމްސީލުކުރައްވައި ވާހަކަދައްކަވަމުން ޝޯލައިން ގްރޭންޑްގެ ފައުންޑަރ އަދި ސީއީއޯ ޒުލައިޚާ އިބްރާހީމް ވަނީ، ރީތި ގޮނޑުދޮށްތަކާއި، ދަނޑުވެރިކަމުގެ މުއްސަނދި ތާރީޚާއި، ދިވެހިވަންތަ އަސްލު ތަޖުރިބާތަކުގެ އިތުރުން ހިތްހެޔޮ މެހެމާންދާރީގެ ސަބަބުން ލޯކަލް އައިލެންޑް މަންޒިލެއްގެ ގޮތުގައި ތޮއްޑޫގެ ޑިމާންޑް ބޮޑުވަމުން އަންނަކަން ފާހަގަކުރައްވާފައެވެ. އަދި މިފަދަ ބައިނަލްއަގުވާމީ ރޯޑްޝޯތަކުގައި ބައިވެރިވުމަކީ ޓްރެވަލް އެޖެންޓުންނާއި ޓުއާ އޮޕަރޭޓަރުންނާ ސީދާ ގުޅުން ބަދަހިކޮށް، ވަކިވަކި ޕްރޮޕަޓީތަކުގެ ބަދަލުގައި މުޅި ރަށް އެއް މަންޒިލެއްގެ ގޮތުގައި އިޝްތިހާރު ކުރުމަށް ލިބޭ މުހިންމު ފުރުސަތެއް ކަމަށް ޒުލައިޚާ ވިދާޅުވިއެވެ.

Ad by Hajj Corporation

އެމޭޒިންގ ވިއު ގެސްޓްހައުސްގެ ފައުންޑަރ މޫސާ ފާރޫގް ވެސް ވަނީ މި ރޯޑްޝޯގެ އަގުވަޒަންކުރައްވައި ވާހަކަދައްކަވާފައެވެ. އޭނާ ފާހަގަކުރެއްވި ގޮތުގައި މިފަދަ ބައިނަލްއަގުވާމީ ޕްލެޓްފޯމްތަކަކީ ތޮއްޑޫގެ ފަތުރުވެރިކަމުގެ ވިޔަފާރިތަކަށް އައު ޕާޓްނާޝިޕްތައް އުފެއްދުމަށާއި، އައު މާކެޓުތަކަށް ވާސިލުވުމަށް ލިބޭ ވަރަށް ރަނގަޅު ފުރުސަތެކެވެ.

މި ބައިވެރިވުމަކީ ބައިނަލްއަގުވާމީ ފެންވަރުގައި ސްޓްރެޓީޖިކްކޮށް އަދި ގުޅިގެން ރަށް އިޝްތިހާރު ކުރުމަށް ތޮއްޑޫއިން ކުރަމުންދާ ދެމެހެއްޓެނިވި މަސައްކަތުގެ ހެއްކެކެވެ. "އައި އޭމް މޯލްޑިވްސް ރޯޑްޝޯ" މެދުވެރިކޮށް ދުނިޔޭގެ ފަތުރުވެރިކަމުގެ ސިނާއަތާ އޮތް ގުޅުން ވަރުގަދަކޮށް، މުޅި ދުނިޔޭގެ ދަތުރުވެރިންނަށް ރަށުގެ ޚާއްސަ ހިތްގައިމުކަން ދައްކުވައިދިނުމުގެ މަސައްކަތް އެ ރަށުން އަންނަނީ ކުރަމުންނެވެ.

ސާފު ގޮނޑުދޮށްތަކާއި، ދަނޑުވެރިކަމާއި، ސަގާފަތުގެ އިތުރުން އެކޮމޮޑޭޝަނާއި ތަފާތު ތަޖުރިބާތައް އިތުރުވަމުން އަންނަ ތޮއްޑޫ އިން ދަނީ ރާއްޖޭގެ އެންމެ ކުރިއަރާފައިވާ އެއް ލޯކަލް އައިލެންޑް ޑެސްޓިނޭޝަންގެ ގޮތުގައި އެ ރަށުގެ މަގާމު އިތުރަށް ވަރުގަދަކުރަމުންނެވެ.