ދެ ދާއިރާއަކުން ފަންނުވެރިން ތަމްރީނު ކުރުމުގެ އެއްބަސްވުމެއްގައި މޯލްޑިވްސް ޕޮލިޓެކްނިކާއެކު އެންވަޔަރަމެންޓް މިނިސްޓްރީން އެއްބަސްވުމެއްގައި ސޮއި ކޮށްފިއެވެ.

އެގޮތުން، ރާއްޖޭގެ އެކި ކަންކޮޅުތަކުގައި ރެފްރިޖަރޭޝަން އަދި އެއާ ކޮންޑިޝަނިން (އާރްއޭސީ) ޓެކްނީޝަނުން ތަމްރީނު ކުރުމުގެ މަސައްކަތް މި އެއްބަސްވުމުގެ ދަށުން ކުރުމަށް ވަނީ ނިންމާފައެވެ.

ތިން އަހަރު ދުވަހުގެ މުއްދަތަށް ވެވުނު މި އެއްބަސްވުމަކީ އާރްއޭސީ ސާރވިސިން ދާއިރާއަށް ލައިސަންސިން ނިޒާމެއް ތަޢާރަފުކުރުމަށް ކުރެވޭ މަސައްކަތުގެ ބައެއް ކަމަށް މިނިސްޓްރީން މަޢުލޫމާތު ދެއެވެ.

މި އެއްބަސްވުމުގެ ދަށުން ތަމްރީނު ޕްރޮގްރާމްތަކަށް ބޭނުންވާ އާލާތްތައް ހޯދުމަށާއި، މުސްތަޤުބަލުގައި ރެފްރިޖަރަންޓް ރީސައިކަލް ކުރުމާއި އަލުން ބޭނުންކުރެވޭ ގޮތަށް ސާފުކުރުމުގެ މަސައްކަތަށް އެހީތެރިކަން ފޯރުކޮށްދިނުން ހިމެނޭ ކަމަށް މިނިސްޓްރީން ބުނެ އެވެ.

މީގެ އިތުރުން މި އެއްބަސްވުމުގެ ސަބަބުން ރާއްޖޭގެ އެކި ސަރަޙައްދުތަކުގައި ތިބި އާރްއޭސީ ޓެކްނީޝަނުންނަށް ފަންނީ ހުނަރު އިތުރުކޮށް، ދާއިރާގެ ފެންވަރު މަތިކުރުމަށް މަގުފަހިވެގެންދާނެ ކަމަށާއި އަދި މިކަމުގެ ސަބަބުން ތިމާވެއްޓަށް ގެއްލުން ދެނިވި ގޭސްތައް ޖައްވަށް ބޭރުވާ މިންވަރު މަދަދުކުރުމަށްވެސް އެހީތެރިވެގެންދާނެ ކަމަށް މިނިސްޓްރީން ބުނެ އެވެ.