އިނގިރޭސި ފުޓްބޯޅައިގެ ތާރީޚުގައި ވެސް ހިނގި އެންމެ ބޮޑު އެއް މައްސަލައިގެ ފެށުމަކީ މެންޗެސްޓާ ސިޓީން ދުނިޔެއަށް ސިއްރުކުރަން ބޭނުންވި މުހިންމު ލިޔެކިޔުންތަކެކެވެ. ބީބީސީ ސްޕޯޓްސް އިން ރިޕޯޓްކޮށްފައިވާ ގޮތުގައި، ޕްރިމިއާ ލީގުން ސިޓީއާ ދެކޮޅަށް 115 ދައުވާއެއް އުފުލުމަށް މަގުފަހިވި ތަހުގީގުތައް ފެށުމުގައި އެންމެ މުހިންމު ދައުރެއް އަދާކުރީ ޕޯޗުގަލްގެ ކޮމްޕިއުޓާ ހެކަރެއް ކަމަށްވާ ރުއީ ޕިންޓޯ އެވެ.

ޕިންޓޯ އޭނާގެ 'ފުޓްބޯލް ލީކްސް' ޕްލެޓްފޯމް މެދުވެރިކޮށް، ކްލަބުގެ ގިނަ އަދަދެއްގެ ސިއްރު ލިޔެކިޔުންތައް އާންމުކުރި އެވެ. އޭގެ ތެރޭގައި ސްޕޮންސާޝިޕް އެއްބަސްވުންތަކާއި އެކި ފަރާތްތަކަށް ކޮށްފައިވާ ފައިސާގެ މުއާމަލާތްތަކާ ގުޅޭ އެތެރޭގެ އީމެއިލްތައް ހިމެނެ އެވެ. މި ލީކުވި މައުލޫމާތުތައް ނޫސްވެރިންނާއި ފުޓްބޯޅަ އިދާރާތަކުން ބަލައި ދިރާސާކުރުމަށްފަހު، ސިޓީގެ މާލީ ކަންކަން ބަލަން ފެށި އެވެ. އޭގެ ނަތީޖާއެއްގެ ގޮތުން 2023 ވަނަ އަހަރުގެ ފެބްރުއަރީ މަހު ޕްރިމިއާ ލީގުން އެ ކްލަބާ ދެކޮޅަށް ރަސްމީކޮށް ދައުވާ އުފުލި އެވެ.

Ad by Hajj Corporation

މި މައްސަލަ ބެލި މިނިވަން ކޮމިޝަނުން، މެންޗެސްޓާ ސިޓީގެ މައްޗަށް ކުރެވުނު 115 ދައުވާގެ ތެރެއިން ގިނަ ދައުވާތަކެއް ސާބިތުވެ ކުށްވެރިވެފައިވާ ކަމަށް 25 ސެޕްޓެމްބަރު 2026 ގައި ބީބީސީން ވަނީ ރިޕޯޓްކޮށްފަ އެވެ. މި ނިންމުން ސިޓީން އިސްތިއުނާފު ކުރާނެ ކަމަށް ބެލެވެ އެވެ.

ޕިންޓޯއަކީ މިހާރުވެސް ގިނަ ބައެއްގެ މެދުގައި ބޮޑެތި ބަހުސްތަކެއް އުފެދިފައިވާ ފަރާތެކެވެ. އޭނާއަށް ތާއީދުކުރާ ފަރާތްތަކުން އޭނާ ސިފަކުރަނީ ފޮރުވިފައިވާ ސިއްރުތައް ހާމަކުރި ވިސިލްބްލޯއާއެއްގެ ގޮތުގަ އެވެ. ނަމަވެސް، ފާޑުކިޔާ ފަރާތްތަކުން ބުނަނީ އޭނާ ސިއްރު މައުލޫމާތު ހޯދީ ގާނޫނާ ޚިލާފު ވަސީލަތްތައް ބޭނުންކޮށްގެން ކަމަށެވެ.

ޕިންޓޯ 2015 ވަނަ އަހަރު 'ފުޓްބޯލް ލީކްސް' އުފެއްދުމަށްފަހު، 2015 އިން 2018 އަށް ދުނިޔޭގެ ފުޓްބޯޅައާ ގުޅޭ ގާތްގަނޑަކަށް 18.6 މިލިއަން ލިޔެކިޔުން ވަނީ އާންމުކޮށްފަ އެވެ. މިއީ ދުނިޔޭގެ ފުޓްބޯޅައިގެ ތާރީޚުގައި ވެސް މިހާތަނަށް ހިނގި އެންމެ ބޮޑު ލީކެވެ.