ހުޅުމާލެ ފޭސް އެކެއްގައި ހަދާފައިވާ ސިންތެޓިކް ޓްރެކް ހަލާކުވެފައިވާތީ، ބައިނަލްއަގްވާމީ މިންގަނޑުތަކަށް ފެތޭ އައު ސިންތެޓިކް ޓްރެކެއް އެޅުމުގެ އަމަލީ މަސައްކަތް އަންނަ މަހުގެ 1 ވަނަ ދުވަހު ފެށުމަށް ނިންމައިފިއެވެ.

އަހާ ފޯރަމްގައި ވާހަކަ ދައްކަވަމުން ކުޅިވަރާ ބެހޭ ވަޒީރު އަބްދުﷲ ރާފިއު ރޭ ވިދާޅުވީ، ހުޅުމާލޭގައި މިހާރު އޮތް ސިންތެޓިކް ޓްރެކަކީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި އެޅި ޓްރެކެއް ކަމަށެވެ. ނަމަވެސް، އެ ޓްރެކްގެ ސިންތެޓިކް ފަށަލަ ހަލާކުވެ، އެތުލީޓުންނަށް އެކަމުގެ ސަބަބުން ގެއްލުންތަކެއް ވަމުންދާކަން ވުޒާރާގެ ސަމާލުކަމަށް އައިސްފައިވާ ކަމަށް ވަޒީރު ފާހަގަކުރެއްވިއެވެ. އަދި މިހާރު އޮތް ޓްރެކަކީ ބައިނަލްއަގްވާމީ ސްޓޭންޑަޑްތަކަށް ހެދިފައިވާ ޓްރެކެއް ނޫން ކަމަށްވެސް ވިދާޅުވިއެވެ.

Ad by Hajj Corporation

ވަޒީރު އިތުރަށް ވިދާޅުވި ގޮތުގައި، މިހާރު ހުރި ޓްރެކަކީ ބައިނަލްއަގްވާމީ ފެންވަރުގެ ޓްރެކަކަށް ނުވާތީ، ދިވެހި އެތުލީޓުން ރެކޯޑެއް ހެދިކަމުގައި ވިޔަސް ވޯލްޑް އެތުލެޓިކްސްގެ އުސޫލުތައް އޮންނަ ގޮތުން އެ ރެކޯޑުތައް ރަސްމީކޮށް ބަލައެއް ނުގަނެވެއެވެ. އެހެންކަމުން، އަލަށް ގާއިމުކުރާ ޓްރެކް ވެގެންދާނީ ދުނިޔޭގެ އެތުލެޓިކްސް ޖަމިއްޔާއިން ގަބޫލުކުރާ ފެންވަރުގެ ޓްރެކަކަށެވެ.

"އަޅުގަނޑުމެން ޓްރެކް ހަދަން މި ޖެހެނީ ވޯލްޑް އެތުލެޓިކްސް ގަބޫލުކުރާ ފެންވަރަށް. އަޅުގަނޑުމެންގެ އެތުލީޓުން ނެރޭ ނަތީޖާ ގަބޫލުކުރާ ފެންވަރަށް. ދެން އެގޮތުގެ މަތިން އަޅުގަނޑުމެން ސިންތެޓިކްގެ މެޓީރިއަލް އެއްކޮށް ބަދަލުކޮށް އިރާދަކުރެއްވިއްޔާ މުޅި އެއްކޮށް ބޭސް ނަގާ އަލުން ޓްރެކެއް އަޅަން މި ޖެހެނީ. އަދި އަޅުގަނޑުމެން އަންނަ މަހުގެ 1 ވަނަ ދުވަހުން ފެށިގެން ދާނެ،" ވަޒީރު ވިދާޅުވިއެވެ.

މި މަޝްރޫއުގެ ދަށުން ޓްރެކްގެ މެޓީރިއަލް އެއްކޮށް ބަދަލުކޮށް، މުޅި ބޭސް ނަގައިގެން އަލުން ޓްރެކް އެޅުމުގެ މަސައްކަތް އަންނަ އަހަރުގެ ޖަނަވަރީ މަހުގެ ނިޔަލަށް އެއްކޮށް ނިންމުމަށް ވަނީ އަމާޒު ހިފާފައެވެ. މީގެ އިތުރުން، ހުޅުމާލެ ޓްރެކްގެ އިތުރުން މާލޭގައި ހުރި ސިންތެޓިކް ޓްރެކްވެސް ބައިނަލްއަގްވާމީ ފެންވަރަށް ބަދަލުކުރުމުގެ މަސައްކަތް ކުރަމުން އަންނަ ކަމަށް ކުޅިވަރާ ބެހޭ ވަޒީރު ވަނީ ހާމަކުރައްވާފައެވެ.