ޔުއެފާ ނޭޝަންސް ލީގުގައި ޖަރުމަނުގެ ކޯޗުކަމާ ހަވާލުވި ފަހުން ޔާގެން ކްލޮޕަށް ފުރަތަމަ މޮޅު ހޯދުމަށް ކުރަމުންދާ އިންތިޒާރު އިތުރަށް ދިގުލައިގެން ގޮސްފިއެވެ. މި މެޗުގައި ޑިމިޓްރިއޮސް ކޯރބެލިސް ދެވަނަ ހާފުގައި ކާމިޔާބުކުރި ލަނޑުން ގްރީސް ވަނީ 1-0 އިން ޖަރުމަނުގެ މައްޗަށް ތާރީޚީ މޮޅެއް ހޯދާފައެވެ.

ނޭޝަންސް ލީގުގެ ފުރަތަމަ މެޗުގައި ނެދަލެންޑްސްއާ ދެކޮޅަށް ކުޅެ އެއްވަރުވި މެޗަށްފަހު، އަމިއްލަ ސަޕޯޓަރުންގެ ކުރިމަތީގައި ކްލޮޕް އިރުޝާދުދިން ފުރަތަމަ މެޗު ނިމުނީ ހައިރާންކުރުވަނިވި ބައްޔަކުންނެވެ. މި ނަތީޖާއާއެކު ކުޅުނު ދެ މެޗުން ލިބުނު އެންމެ ޕޮއިންޓާއެކު ގްރޫޕް އޭ2 ގެ ތިންވަނައިގައި ޖަރުމަނު އޮތްއިރު، ދެ މެޗުން މޮޅުވެ 6 ޕޮއިންޓާއެކު ގްރޫޕުގެ އެއްވަނައިގައި އޮތީ ގްރީސްއެވެ. ޖަރުމަނަށް ދެން އޮތީ ބުރާސްފަތި ދުވަހު އަމިއްލަ ދަނޑުގައި ސާބިއާއާ ދެކޮޅަށް ކުޅޭ މެޗެވެ.

Ad by Hajj Corporation

މެޗުގެ ބޮޑުބައި ކޮންޓްރޯލްކޮށް، 75.5 އިންސައްތަ ބޯޅަ ހިފަހައްޓައިގެން ކުޅުނީ ޖަރުމަނުންނެވެ. ފުރަތަމަ ހާފުގައި ޔޫނިސް އެބްނޫތާލިބް އަދި ކަރީމް އަދެޔެމީ އަށް ލަނޑު ޖަހާނެ ރަނުގެ ފުރުސަތުތަކެއް ލިބުނު ނަމަވެސް، ގްރީސްގެ ގޯލްކީޕަރު ކޮންސްޓަންޓިނޯސް ޒޮލާކިސް ވަނީ ހުށިޔާރުކަމާއެކު އެ ހަމަލާތައް ދިފާއުކޮށްފައެވެ. ދެވަނަ ހާފުގައިވެސް ޖަރުމަނުން ގިނަ ހަމަލާތަކެއް އުފެއްދި ނަމަވެސް ލަނޑެއް ކާމިޔާބު ކުރެވޭ ގޮތެއް ނުވިއެވެ.

މެޗުގެ ހަމައެކަނި ލަނޑު ގްރީސްއިން ކާމިޔާބުކުރީ 74 ވަނަ މިނެޓުގައެވެ. ކްރިސްޓޯސް ޒޮލިސް ނަގައިދިން ހުރަހެއް ޖަރުމަނުގެ ޕެނަލްޓީ އޭރިއާ ބޭރުން ކޯރބެލިސްއަށް ލިބުމުން، އޭނާ ފޮނުވާލި ހަމަލާ ގޯލުގެ ތެރެއަށް ވަނީ ޖޯޝުއާ ކިމިކްގެ ގައިގައި ޖެހި މިސްރާބު ބަދަލުވެގެންނެވެ. ޖަރުމަނުން ނަތީޖާ ހަމަހަމަކުރުމަށް ސާޖް ގްނަބްރީ މެދުވެރިކޮށް ކުރި މަސައްކަތްވެސް ގްރީސްގެ ކީޕަރު ވަނީ ހުއްޓުވާފައެވެ.

މި މެޗަށް ނުކުތް ޓީމަށް ކްލޮޕް ފަސް ބަދަލެއް ގެނައި ނަމަވެސް، ފުރުސަތުތަކުގެ ބޭނުން ނުހިފުމުގެ އަދަބު ޖަރުމަނަށް ވަނީ ލިބިފައެވެ. ޖަރުމަނުގެ ކޯޗުކަމާ ހަވާލުވުމަށްފަހު އަވަސް ކާމިޔާބީތަކެއްގެ ޔަގީންކަން ނުދެވޭނެ ކަމަށް ބުނެފައިވާ ލިވަޕޫލްގެ ކުރީގެ ކޯޗަށް ޓީމު ރަނގަޅު ކުރުމަށް އަދިވެސް ގިނަ މަސައްކަތްތަކެއް ކުރަންޖެހިފައިވާކަން މި މެޗުން ވަނީ ސާބިތުވެގެން ގޮސްފައެވެ.