ރާއްޖޭގެ ތާރީހުގައި ކުރާ އެންމެ ބޮޑު އިންވެސްޓްމެންޓާއެކު އީގަލް ހިލްސް ކުންފުންޏަށް ދިވެހިން އިތުބާރުކޮށްފައިވާ ކަމަށް އެ ކުންފުނީގެ ޗެއާމަން މުހައްމަދު އަލައްބާރު ވިދާޅުވެއްޖެ އެވެ.

ފުށިދިއްގަރު ފަޅުގައި ތަރައްގީކުރާ ރަސްމާލޭގައި އަބޫދާބީގެ އީގަލް ހިލްސް ކުންފުނިން ކުރިއަށް ގެންދިއުމަށް އެއްބަސްވެފައިވާ 20 ބިލިއަން ޑޮލަރުގެ މަޝްރޫއާ ގުޅޭ ގޮތުން އާންމުކުރެއްވި ވީޑިއޯއެއްގައި އަލައްބާރު ވިދާޅުވީ ދުނިޔޭގައި އޮތީ އެންމެ ރާއްޖެއެއް ކަމަށާއި އެއީ ވަރުބަލިވުމުން ދާން ބޭނުންވާ ރާއްޖެއަށް ކަމަށެވެ.

"ވަރުބަލިވުމުން ބުނަނީ ރާއްޖެއަށް ދާން ބޭނުމޭ. އެންމެ ފުރިހަމަ ޗުއްޓީ، އެންމެ ރީތި ތަން. އެއީ ރާއްޖެ. އެހެންވީމަ އެއީ ދިރިއުޅެން ވެސް އެންމެ ފުރިހަމަ ތަނަށް ނުވާންވީ ކީއްވެ؟" އަލައްބާރު ވިދާޅުވި އެވެ.

Ad by Hajj Corporation

https://www.instagram.com/mohamedalabbar/reel/Dd0oHspNx4T/

އޭނާ ވިދާޅުވި ގޮތުގައި އެ ކުންފުނިން ރާއްޖޭގައި ހިންގާ މަޝްރޫއުގެ ދަށުން އީގަލް ހިލްސް އިން ބިނާ ކުރަނީ މީހުންނަށް މަހަކަށް ނުވަތަ ހަފުތާއަކަށްވެސް މަޑުކޮށްލެވޭނެ ސަހަރެކެވެ.

އަލައްބާރު ގަބޫލުކުރާ ގޮތުގައި މި މަޝްރޫއިން ލިބޭ އާމްދަނީއަކީ ދުނިޔޭގެ ނިސްބަތުން ވެސް އެންމެ ރަނގަޅު އެއް ފައިދާއަށްވުން އެކަށީގެންވެ އެވެ.

ރާއްޖޭގެ ތާރީހުގައި ކުރާ އެންމެ ބޮޑު އިންވެސްޓްމެންޓާއެކު އެ ކުންފުންޏަށް ދިވެހިން އިތުބާރުކޮށްފައިވާ ކަމަށާއި މިއީ ލިބޭ ޝަރަފެއް ކަމަށްވެސް އޭނާ ވިދާޅުވި އެވެ.

ރާއްޖޭގައި މިހާތަނަށް ހިންގާ ބޭރުގެ އެންމެ ބޮޑު އިންވެސްޓްމަންޓްގެ މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ހައުސިން މިނިސްޓަރު ޑރ. އަބްދުﷲ މުއްތަލިބް އެވެ. އީގަލް ހިލްސްގެ ފަރާތުން ސޮއިކުރެއްވީ އެ ކުންފުނީގެ ބާނީ އަދި ޗެއާމަން މުޙައްމަދު އަލައްބާރު އެވެ.

މި މަޝްރޫއުގައި ބައިނަލްއަގުވާމީ ފެންވަރުގެ ހޮޓާތަކާއި ރިސޯޓްތައް އަދި މަތީ ފަންތީގެ ބްރޭންޑަޑް ރެޒިޑެންސީވެސް ހިމެނެ އެވެ.

ދުނިޔޭގެ ފެންވަރުގެ މެރީނާއެއްވެސް ހިމެނޭ މި މަޝްރޫއުގައި ވޯޓާފްރަންޓް ސަރަހައްދުތަކާއި ރެސްޓޯރެންޓްތަކާއި ފިހާރަތަކުގެ އިތުރުން މުނިފޫހިފިލުވުމުގެ ސެންޓަރުތައްވެސް ހިމެނެ އެވެ.

އެކި ފިޔަވަހިތަކަށް ބަހާލައިގެން ކުރިއަށްގެންދާ މި މަޝްރޫއުގެ ޖުމްލަ އިންވެސްޓްމަންޓް 20 ބިލިއަން ޑޮލަރަށް އަރާނެ ކަމަށް އީގަލް ހިލްސް އިން ވަނީ ލަފާކޮށްފަ އެވެ.

މި މަޝްރޫއުގެ ސަބަބުން ރާއްޖެއަށް ބޭރުގެ އިންވެސްޓްމަންޓްގެ ގޮތުގައި ޖުމްލަ 30 ބިލިއަން ޑޮލަރަށްވުރެ ގިނަ ފައިސާ ވަންނާނެ ކަމަށް ލަފާކުރެވޭއިރު، މީގެ ތެރެއިން 18 ބިލިއަން ޑޮލަރަކީ ސީދާ ރާއްޖެއަށް ލިބޭނެ އިންވެސްޓްމަންޓެވެ.

މީގެ އިތުރުން، މި މަޝްރޫޢުގެ ސަބަބުން ސީދާ ގޮތުންނާއި ނުސީދާ ގޮތުން 54,000 އަށް ވުރެ ގިނަ ވަޒީފާ އުފެދޭނެ ކަމަށް ބެލެވެ އެވެ. އަދި މި މަޝްރޫއު ފުރިހަމަވުމުން، އަހަރަކު އެއް މިލިއަނަށްވުރެ ގިނަ ފަތުރުވެރިން ޒިޔާރަތްކޮށް، ފަތުރުވެރިކަމުން އަހަރަކު ދެ ބިލިއަން ޑޮލަރަށްވުރެ ގިނަ އާމްދަނީ ލިބޭނެ ކަމަށް ލަފާކޮށްފައިވެ އެވެ.

އީގަލް ހިލްސްއަކީ ބުރުޖް ޚަލީފާ އާއި ދުބާއީ މޯލް ތަރައްގީކުރި އީމާރު ޕްރޮޕަޓީޒްގެ ބާނީ މުހައްމަދު އަލައްބާރުގެ އަމިއްލަ ކުންފުންޏެކެވެ.