ކޮންމެ އަހަރެއްގެ ސެޕްޓެމްބަރު މަހުގެ 29 ވަނަ ދުވަހު ފާހަގަކުރާ ދުނިޔޭގެ ހިތުގެ ދުވަހާ ގުޅިގެން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ނެރުނު ރިޕޯޓުގައި، ހިތުގެ ބަލިތަކުން ރައްކާތެރިވުމަށްޓަކައި ދިރިއުޅުމުގެ ވައްޓަފާޅިއަށް އަމަލީ ގޮތުން ބަދަލުތަކެއް ގެނައުމަށާއި ދުރާލާ ސްކްރީން ކުރުމަށް ބާރުއަޅައިފިއެވެ. މި އަހަރުގެ ހިތުގެ ދުވަހުގެ ޝިއާރަކީ "Don’t Miss a Beat" އެވެ. މި ޝިއާރުގެ މައިގަނޑު މަޤްސަދަކީ ހިތާއި ލޭހޮޅިތަކުގެ ބަލިތަކުގެ އަލާމާތްތައް ދެނެގަނެ، ވީހާވެސް އަވަހަކަށް ފަރުވާ ފެށުމަށް ހޭލުންތެރިކަން އިތުރުކުރުމެވެ.

ރާއްޖޭގެ ހާލަތަށް ބަލާއިރު، މަރުވާ މީހުންގެ 84 އިންސައްތައަކީ ގައިންގަޔަށް ނާރާ ބަލިތައް ތަހައްމަލު ކުރަމުންދާ މީހުންނެވެ. "ނޮން ކޮމިއުނިކަބްލް ޑިޒީޒް ރިސްކް ފެކްޓަރ ސަރވޭ 2020-2021" އިން ދައްކާ ގޮތުގައި، ރާއްޖޭގައި އުމުރުން 15 އަހަރާއި 65 އަހަރާ ދެމެދުގެ އާބާދީގެ 4.7 އިންސައްތަ މީހުންނަކީ ހިތުގެ ބަލި، ސްޓްރޯކް އަދި އެންޖީނާ ފަދަ ބަލިތައް ތަހައްމަލު ކުރަމުންދާ ފަރާތްތަކެވެ. މިފަދަ ހިރާސްތަކަށް ހުށަހެޅިފައިވާ މިންވަރު ދެނެގަތުމަށްޓަކައި ޕްރައިމަރީ ހެލްތު ކެއަރގެ ނިޒާމު ހަރުދަނާކޮށް، މާލޭގައި ދަމަނަވެށީގެ އިތުރުން 'އާރބަން ޕްރައިމަރީ ހެލްތު ކެއާރ ސެންޓަރ' މާފަންނުގައި 2025 ނޮވެމްބަރުގައި ހުޅުވައި ހިދުމަތް ދެމުން އަންނައިރު، އަތޮޅުތެރޭގައިވެސް މި ހިދުމަތްތައް ފުޅާކުރެވެމުންދެއެވެ.

Ad by Hajj Corporation

އެޗްޕީއޭގެ ތަފާސްހިސާބުތަކުން ދައްކާ ގޮތުގައި، 2026 ވަނަ އަހަރުގެ ސެޕްޓެމްބަރުގެ ނިޔަލަށް 37,038 މީހުން ގައިންގަޔަށް ނާރާ ބަލިތަކަށް ސްކްރީން ކުރެވިފައިވެއެވެ. އޭގެ ތެރެއިން 21.2 އިންސައްތަ މީހުންގެ ކޮލެސްޓްރޯލް މަތިވެފައިވާއިރު، 18 އިންސައްތަ މީހުންނަކީ ލޭމައްޗަށްދާ މީހުންނެވެ. އަދި 10.4 އިންސައްތަ މީހުންނަކީ ހަކުރުބަލި ތަހައްމަލުކުރާ ފަރާތްތަކެވެ. މިހާރު ރާއްޖޭގައި އުމުރުން 18 އަހަރުން މަތީގެ ކޮންމެ މީހަކަށް އަހަރަކު އެއްފަހަރު ހިލޭ މެޑިކަލް ސްކްރީން ހެދޭނެ އިންތިޒާމު ހަމަޖައްސާފައިވާއިރު، ދުންފަތުގެ އިސްތިއުމާލުކުރުން ހުއްޓުވުމަށް "ޖެނެރޭޝަނަލް ބޭން" ސިޔާސަތާއި 5 އަހަރުގެ ގައުމީ ކެމްޕޭނެއްވެސް ވަނީ ފަށާފައެވެ.

ހިތުގެ ބަލިތަކުން ރައްކާތެރިވުމަށްޓަކައި ދުޅަހެޔޮ ކާނާ ބޭނުންކުރުމާއި ކަސްރަތު ކުރުމާ ގުޅޭ ގައުމީ ގައިޑްލައިންތަކެއް ވަނީ އެކުލަވާލާފައެވެ. ކޮންމެ ހަފުތާއަކު މަދުވެގެން 150 މިނެޓު އެރޮބިކް ކަސްރަތު ކުރުމަށާއި، ތަރުކާރީ އާއި މޭވާ ގިނަކޮށް، ލޮނާއި ހަކުރު އަދި ސަރުބީ މަދުކުރުމަށް އެޗްޕީއޭ އިން އިރުޝާދު ދެއެވެ. އަދި ދުންފަތާއި ވޭޕުން ދުރުހެލިވެ، އެކަށީގެންވާ ވަރަށް ނިދުމާއި، ސްކްރީން ޓައިމް މަދުކުރުމަކީ ކުޑަކުދިންނާއި ޒުވާނުން އަދި ބޮޑެތި މީހުންވެސް ސަމާލުކަން ދޭންޖެހޭ މުހިންމު ކަންކަމެވެ.

ހާޓް އެޓޭކެއްގެ އަލާމާތްތައް ދެނެގަނެ، އެފަދަ ހާލަތެއްގައި ލަސްނުކޮށް ފަރުވާ ހޯދުމުގެ މުހިންމުކަންވެސް އެޗްޕީއޭ އިން ފާހަގަކުރެއެވެ. އެގޮތުން މޭގައި ރިއްސުން ނުވަތަ ފިއްތުމެއް އިހުސާސްވުން، އެ ތަދު އަތް، ކޮނޑު، ކަރު، ދަތްދޮޅި ނުވަތަ ބުރަކަށް ފެތުރުން، ނޭވާ ކުރުވުން، އާދަޔާ ހިލާފަށް ދާހިއްލުން އަދި މޭނުބައިކޮށް ވަރުދެރަވުން ފަދަ އަލާމާތެއް ފެނިއްޖެނަމަ، ވަގުތުން ސިއްހީ އެހީތެރިކަން ހޯދުމަށް އިލްތިމާސްކުރެއެވެ.