ޕްރިމިއާ ލީގުގެ މާލީ ގަވާއިދުތަކާ ޚިލާފަށް ސިއްރުން ކްލަބަށް 830 މިލިއަން ޕައުންޑަށް ވުރެ ގިނަ ފައިސާ ވެއްދުމަށްޓަކައި މެންޗެސްޓާ ސިޓީން ފޭކު ވިޔަފާރި އެއްބަސްވުންތަކެއް ހަދާފައިވާ ކަމަށް ޕްރިމިއާ ލީގުން ހާމަކޮށްފިއެވެ. މި މައްސަލަ ބެލި މިނިވަން ކޮމިޝަނުން ވަނީ 2009-10 އިން ފެށިގެން 2017-18 ވަނަ އަހަރުގެ ސީޒަނާ ދެމެދު އެ ކްލަބުން ގަވާއިދާ ޚިލާފުވެފައިވާ ކަމަށް ނިންމައި، ހުރިހާ (115) ދައުވާއަކަށް ކްލަބް ކުށްވެރިވާ ކަމަށް ކަނޑައަޅާފައެވެ.

ކޮމިޝަނުގެ ރިޕޯޓުގައި ބަޔާންކޮށްފައިވާ ގޮތުގައި، ކްލަބުގެ އާމްދަނީ އޮޅުވާލައިގެން މަތިކުރުމަށާއި ޚަރަދުތައް ކުޑަކޮށް ދެއްކުމަށް ސިޓީން ވަނީ ދޮގު އެއްބަސްވުންތަކެއްގެ ހަދައި، ކުލަބުގެ އޯނަރުގެ އަމިއްލަ ފައިސާ ނުގަވައިދުން ޓީމަށް ލިބުނު ފައިސާތަކެއްކަމަށް ހަދައި ލިޔެކިޔުންތައް ބަދަލުކޮށް އެފައިސާއިން ޚަރަދުކޮށްފައެވެ. ސިޓީން ޕްރިމިއާ ލީގު ކާމިޔާބުކުރި ތިން ސީޒަނެއް ކަމަށްވާ 2011-12، 2013-14 އަދި 2017-18 ގައި ސްޕޮންސާ ފީގެ ގޮތުގައި 360 މިލިއަން ޕައުންޑް ރެކޯޑުކޮށްފައިވީ ނަމަވެސް، އޭގެ ތެރެއިން ސައްހަ ކަމަށް ފެނިފައިވަނީ އެންމެ 43 މިލިއަން ޕައުންޑެވެ. ބާކީ ހުރި ފައިސާއަކީ ކްލަބުގެ ވެރިން ސިއްރިއްޔާތުގައި ވަގުކޮންޓްރެކްޓް ހަދައިގެން ޖަމާކޮށްފައިވާ ފައިސާއެވެ.

Ad by Hajj Corporation

މީގެ އިތުރުން، މި މައްސަލައިގެ ތަހުގީގުގައި ކްލަބުގެ މުހިންމު ހެކިވެރިންތަކެއް ގަސްދުގައި ދޮގު މައުލޫމާތާއި އޮޅުވާލުންތައް އެކުލެވޭ ހެކިބަސް ދީފައިވާ ކަމަށްވެސް ކޮމިޝަނުން ފާހަގަކޮށްފައިވެއެވެ. އަދި މި އަމަލުތަކުގެ ސަބަބުން 2009-10 ވަނަ އަހަރުގެ ސީޒަނުގައި ޕްރިމިއާ ލީގުގެ ތާރީޚުގައިވެސް އެއް ސީޒަނެއްގައި ކްލަބަކަށް ލިބުނު އެންމެ ބޮޑު ގެއްލުން ރެކޯޑުކުރުމުން އެ ކްލަބް ސަލާމަތްވި ކަމަށް ރިޕޯޓުގައި ބުނެފައިވެއެވެ.

2008 ވަނަ އަހަރުން ފެށިގެން އަބޫދާބީ ޔުނައިޓެޑް ގްރޫޕް (އޭޑީޔޫޖީ) އިން މިލްކުވެރިކަން ދަމަހައްޓަމުން އަންނަ މެންޗެސްޓާ ސިޓީން އަދިވެސް މި ތުހުމަތުތަކަށް އިންކާރު ކުރެއެވެ. މި ނިންމުން އިސްތިއުނާފު ކުރުމަށް ސިޓީއަށް އޮކްޓޯބަރު މަހުގެ 2 ވަނަ ދުވަހާ ހަމައަށް ފުރުސަތު ވަނީ ދީފައެވެ.