އަމިއްލަ ފަރާތްތަކުން މަގު ކޮންނަމުންދާއިރު ސްޓެލްކޯގެ ކަރަންޓު ކޭބަލްތަކަށް ގެއްލުން ލިބޭ މައްސަލަ ހައްލުކުރުމަށްޓަކައި، އެފަދަ މަސައްކަތްތައް ކުރާ ފަރާތްތަކުގެ އަތުން ކޭބަލް ކަނޑައިން ދިއުމުން މަރާމާތަށްދާ ހަރަދު ނަގަން އެ ކުންފުނިން ނިންމައިފި އެވެ.

ސްޓެލްކޯއިން ބުނީ މިގޮތަށް ހަރަދު ނަގަން ނިންމާފައި ވަނީ އިމާރާތް ކުރުމުގެ ބޭނުމުގައި މަގު ކޮންނަ ފަރާތްތަކުގެ ސަބަބުން ކޭބަލްތަކަށް ގެއްލުންލިބި ކަރަންޓު ކެނޑުމުގެ މައްސަލަ ބޮޑުވެފައިވާތީ ކަމަށެވެ. އަދި މިފަދަ ހާދިސާތައް ދުވަހުން ދުވަހަށް އިތުރުވަމުންދާތީ އާންމުންނަށް ލިބޭ ތަކުލީފުތަކުން ސަލާމަތްކޮށް ދެމެހެއްޓެނިވި ހިދުމަތެއް ފޯރުކޮށްދިނުމަށް އެފަދަ އިހުމާލެއްވާ ފަރާތްތަކުގެ އަތުން ހަރަދު ނެގުމަކީ މުހިއްމު ކަމެއް ކަމަށް ވެސް އެކުންފުނިން މައުލޫމާތުދެ އެވެ.

Ad by Hajj Corporation

މިފަދަ ކަންކަމާ ގުޅިގެން ސްޓެލްކޯގެ މީޑީއާ އޮފިޝަލަކު ވިދާޅުވީ، ކޭބަލެއް ބުރިވުމުން ސިސްޓަމުން ދައްކާނީ އާތު ފޯލްޓެއް އުޅޭކަމަށް ކަމަށާއި، އާންމުންގެ ރައްކާތެރިކަމަށްޓަކައި ސިސްޓަމް ފަރުމާކޮށްފައިވަނީ އޮޓޮމެޓިކުން ކަރަންޓު ކެނޑޭގޮތަށް ކަމަށެވެ. އެގޮތުން މައްސަލަ ދެނެގަނެ ކަރަންޓު އަނބުރާ ދިނުމަށް ވަގުތު ނަގާ ކަމަށާއި، މިދިޔަ އެއް ހަފުތާގެ ތެރޭގައި ވެސް ހުޅުމާލެ ފޭސް 1 ގައި ކަރަންޓު ކޭބަލް ބުރިވެގެން ދެ ދުވަހު ކަރަންޓު ކެނޑިފައިވާ ކަމަށެވެ. އެހެންކަމުން، ކަރަންޓު ވިއުގައަށް ގެއްލުން ނުވާނެހެން ޒިންމާދާރުކަމާއެކު މަގު ކޮނުމުގެ މަސައްކަތްތައް ރާވައިގެން ކުރިއަށް ގެންދިއުމަށް ސްޓެލްކޯއިން ވަނީ ހުރިހާ ފަރާތްތަކަކަށް އިލްތިމާސްކޮށްފައެވެ.