ނުކުޅެދުންތެރިކަން ހުންނަ ފަރާތްތަކުގެ ހުނަރުތައް ތަރައްގީކޮށް ކުރިއެރުވުމަށްޓަކައި ހުޅުމާލެ ފޭސް 2 ގައި ތަރައްގީކުރާ "ކޮމިއުނިޓީ އެމްޕަވަމަންޓް ހަބް" އަންނަ އޮކްޓޯބަރު މަހު ހުޅުވުމަށް ތައްޔާރުވަމުންދާ ކަމަށް ހެލްތް މިނިސްޓަރު ޤީލާ ޢަލީ ވިދާޅުވެއްޖެ އެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ވިދާޅުވީ، އިސްލާމީ ކަންތައްތަކާ ބެހޭ ވުޒާރާގެ ޒަކާތު ފަންޑުން ހަރަދުކޮށްގެން، އިޖުތިމާޢީ ތަރައްގީއާ ބެހޭ ވުޒާރާއާއި އެފްޑީސީ ގުޅިގެން ކުރިއަށްގެންދާ މި މަޝްރޫޢުގެ މަގްސަދަކީ ނުކުޅެދުންތެރިކަން ހުންނަ ފަރާތްތަކަށް ބޭނުންވާ ހުނަރާއި ޢިލްމު ފަހިކޮށްދީ، މަސައްކަތުގެ ތަޖުރިބާއާއި އިގްތިސޯދީ މިނިވަންކަމަށް މަގުފަހިކޮށްދިނުން ކަމަށެވެ. އަދި 18 އާއި 40 އަހަރާ ދެމެދުގެ އުމުރުފުރާގެ މީހުންނަށް އަމާޒުކޮށްގެން ހަދާ 5500 އަކަފޫޓުގެ މި މަރުކަޒުގައި ސައިން ލޭންގުއޭޖް ޕްރޮގްރާމްތަކާއި ވޯކްޝޮޕްތައް ވެސް ކުރިއަށްދާނެ ކަމަށް ވިދާޅުވިއެވެ.

Ad by Hajj Corporation

މި ހަބުގައި ހިމެނޭ މުހިންމު ބައިތަކުގެ ތެރޭގައި ހޮސްޕިޓިލިޓީ އަދި ކަލިނަރީ ތަމްރީނާއި، މަސައްކަތުގެ ތަޖުރިބާ ފޯރުކޮށްދިނުމަށް އިންކްލޫސިވް ކެފޭއެއްގެ އިތުރުން، އެ ފަރާތްތަކުން އުފައްދާ ތަކެތި މާކެޓުކޮށް ވިއްކުމަށް ޢާންމުންނަށް ހުޅުވާލާފައިވާ ފިހާރައެއް ހިމެނެއެވެ. މީގެއިތުރުން 3 ވޯކްޝޮޕް ޖާގައާއި، ކޮމްޕިއުޓަރ އަދި އައި.ޓީ ތަމްރީނުދޭ ތަނަކާއި، އިޖުތިމާޢީ ގުޅުން ބަދަހިކުރުމަށް ޚާއްޞަ އެކްޓިވިޓީ ރޫމަކާއި މަލްޓިމީޑިއާ ރޫމެއްވެސް މިތަނުގައި ހުންނާނެއެވެ.

މިނިސްޓަރު އިތުރަށް ވިދާޅުވީ މި ސަރުކާރުން މިހާތަނަށް 416 ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ފުރުޞަތު ފަހިކޮށްދީފައިވާ ކަމަށެވެ.