ރަސްމާލޭގައި ހިންގުމަށް ހަމަޖެހިފައިވާ ބިޔަ ބޮޑު މަޝްރޫއުގެ ތެރެއިން ދައުލަތަށް 11 ބިލިއަން ޑޮލަރު -- 169 ބިލިއަން ރުފިޔާގެ އާމްދަނީއެއް ލިބޭނެ ކަމަށް ފިނޭންސް މިނިސްޓަރު ހަސަން ޒަރީރު ވިދާޅުވެއްޖެ އެވެ.

ރަސްމާލޭގައި "މޯލްޑިވްސް ވޯޓާފްރޮންޓް އެންޑް މެރީނާ" ގެ ނަމުގައި ދިވެހި ތާރީހުގައި ހިންގާވެސް ހިންގާ އެންމެ ބޮޑު މަޝްރޫއު ހިންގަން ހަވާލުވެފައިވަނީ ޔޫއޭއީގެ ރިއަލް އެސްޓޭޓްގައި އެންމެ ވަރުގަދަ ކުންފުނިތަކުގެ ތެރޭގައި ހިމެނޭ އީގަލް ހިލްސް އެވެ.

ދިވެހި ސަރުކާރުން މިދިޔަ ހަފްތާގެ ތެރޭގައި ވަނީ އީގަލް ހިލްސްއާ އެކު މިމަޝްރޫއުގެ ކޮމާޝަލް ޓާމްސްތައް ހިމެނޭ އެއްބަސްވުމެއްގައި ސޮއިކޮށްފަ އެވެ.

ފިނޭންސް މިނިސްޓަރު ޒަރީރު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ ރަސްމާލޭގެ 500 ހެކްޓަރުގެ ބިމެއްގައި އީގަލް ހިލްސްގެ މަޝްރޫއު އެއްކޮށް ނިންމަން 10 އަހަރުގެ މުއްދަތެއް ނަގާނެ ކަމަށާ އެ މުއްދަތުގެ ތެރޭގައި އެކަނިވެސް ދައުލަތަށް 11 ބިލިއަން ޑޮލަރުގެ އާމްދަނީއެއް ލިބޭނެ ކަމަށެވެ.

އެކި މަރުހަލާތަކަށް ބަހާލައިގެން ކުރިއަށް ގެންދާ މިމަޝްރޫއަށް 20 ބިލިއަން ޑޮލަރު ހޭދަކުރުމަށް ހަމަޖެހިފައިވާއިރު އެތަނުގައި ދިރިއުޅޭނެ ގެދޮރާއި ރިސޯޓުތަކާއި މެރީނާއާއި ހޮޓާތަކާއި ފިހާރަތަކާއި އޮފީސްތަކާއި ތައުލީމީ އަދި ސިއްހީ ހިދުމަތްދޭ މަރުކަޒުތައް ހުންނާނެ އެވެ.

މިމަޝްރޫއަށް ދިވެހިންގެ އިތުބާރު ލިބިފައިވާ ކަމަށް އީގަލް ހިލްސްގެ ޗެއާމަން މުހައްމަދު އަލައްބާރު ވިދާޅުވެފައިވެ އެވެ.

އީގަލް ހިލްސްގެ މަޝްރޫއާ ގުޅޭގޮތުން ޒަރީރު އިތުރަށް ވިދާޅުވީ ދައުލަތަށް މިހާރު އާމްދަނީ ވައްދައިދޭ 179 ރިސޯޓާއި، 16 ހޮޓަލާއި، 920 ގެސްޓްހައުސްއާއި 165 ސަފާރީ އުޅަންދުން ދައުލަތަށް ލިބޭ އާމްދަނީއަށް ވުރެ ބޮޑު އާމްދަނީއެއް ހަމައެކަނި ރަސްމާލެ މަޝްރޫއުން ލިބޭނެ ކަމަށެވެ. އެހެންކަމުން ރާއްޖޭގެ ދުރުރާސްތާގެ ތަރައްގީއަށް ރަސްމާލެ މަޝްރޫއަކީ ވަރަށް ބޭނުންތެރި މަޝްރޫއެއް ކަމުގައި ވިދާޅުވި އެވެ.

"މި މަޝްރޫއު ކުރިއަށް ގެންދަން ދައުލަތުން އެއްވެސް ލޯނެއް ނުނަގާނެ. އަދި ސޮވެރިން ގެރެންޓީއެއްވެސް ނުދޭނެ. މީގެ ސަބަބުން ދައުލަތަށް މާލީ އިލްތިޒާމެއް ނުއުފުލައި، ސީދާ އާމްދަނީ ލިބޭނެ މަގު ކަށަވަރުވެގެންދާނެ،" މިނިސްޓަރު ވިދާޅުވި އެވެ.

ރަސްމާލެ މަޝްރޫއުގެ ތެރެއިން ލިބޭނެ އިތުރު ފައިދާތައްވެސް މިނިސްޓަރު ވަނީ ހިއްސާކުރައްވާފަ އެވެ. އެގޮތުން އެތަނުން ލިބޭ ޓީޖީއެސްޓީގެ އިތުރުން ފުރަތަމަ ވިއްކާ ތަންތަނުންނާއި ކުއްޔަށް ދޭ ތަންތަނުން ޑިވެލޮޕަރަށް ލިބޭ އާމްދަނީގެ 10 ޕަސެންޓް ދައުލަތަށް ލިބޭނެ ކަމުގައި ވިދާޅުވި އެވެ. އަދި ފުރަތަމަ ފަހަރަށް ތަންތަން ގަންނަ މީހުންގެ އަތުން އެ ތަނެއްގެ އަގުގެ ހަތަރު ޕަސެންޓް ދައުލަތަށް ލިބޭނެ ކަމުގައިވެސް ވިދާޅުވި އެވެ.

މިނިސްޓަރު ވިދާޅުވީ އީގަލް ހިލްސް އިން ތަންތަން ވިއްކުމަށްފަހު އެ ކުންފުންޏަށް ލިބޭ ފައިސާ ބަހައްޓަންޖެހޭނީވެސް ރާއްޖޭގައި ހުޅުވާފައިވާ އެސްކްރޯ އެކައުންޓެއްގައި ކަމަަށެވެ. އެހެންވެ އީގަލް ހިލްސްއަށް ލިބެންޖެހޭ ފައިސާ ލިބެމުންދަނީ އެއްބަސްވުމުގައިވާ ގޮތަށް ކަމަށްވެސް ވިދާޅުވި އެވެ. އަދި މިމަޝްރޫއާ ގުޅޭ ފައިސާގެ ހުރިހާ މުއާމަލާތެއް ކުރަންޖެހެނީވެސް ދިވެހި ބޭންކުތައް މެދުވެރިކޮށް ކަމަށްވެސް މިނިސްޓަރު ވިދާޅުވި އެވެ.

"މިމަޝްރޫއު ނިމޭއިރު އަހަރަކު އެއް މިލިއަނަށްވުރެ ގިނަ ފަތުރުވެރިން އެތަނަށް ޒިޔާރަތް ކުރާނެ،" މިނިސްޓަރު ވިދާޅުވި އެވެ.

Ad by Hajj Corporation