ޕްރިމިއާ ލީގުގެ މާލީ ގަވާއިދުތަކާ ހިލާފުވެފައިވާ ކަމަށް ރަސްމީކޮށް ނިންމައި، މެންޗެސްޓާ ސިޓީ ކުށްވެރިވި ނަމަވެސް، އަބަދުވެސް އޮންނާނީ އޭނާގެ ކުރީގެ ޓީމުގެ ފަހަތުގައި ކަމަށް އެ ކްލަބުގެ ކުރީގެ މެނޭޖަރު ޕެޕް ގާޑިއޯލާ ބުނެފިއެވެ. ސިޓީގެ ތާރީޚުގައި 20 ތަށި ކާމިޔާބުކޮށްދިން ގާޑިއޯލާ އެކުލަބުގައި ހުރި މުައްދަތުގައިވެސް ވަގު ލިޔުންތައް ބޭނުންކޮށްގެން ކުލަބުން ކުޅުންތެރިން ގަނެފައިވާކަން ސާބިތުވެފައިޥާކަމަށް ޕްރީމިއަރ ލީގުގެ ބަޔާނުގައިވެއެވެ.

މިނިވަން ކޮމިޝަނަކުން ސިޓީއާ ދެކޮޅަށް ހުށަހެޅި މާލީ ގަވާއިދުތަކާ ސީރިއަސްކޮށް ހިލާފުވުމުގެ 100 އަށް ވުރެ ގިނަ މައްސަލަ ސާބިތުވެފައިވާ ކަމަށް ނިންމުމާ ގުޅިގެން، މިއީ ގާޑިއޯލާ މި މައްސަލައިގައި އާންމުކޮށް ވާހަކަދެއްކި ފުރަތަމަ ފަހަރެވެ. އޭނާ މި ޝުއޫރުތައް ފާޅުކޮށްފައިވަނީ ސޯޝަލް މީޑިއާ ޕްލެޓްފޯމް އެކްސް (ކުރީގެ ޓްވިޓާ) ގައެވެ.

Ad by Hajj Corporation

2016 އިން 2026 އަށް ސިޓީގެ ކޯޗުކަން ކޮށްދިން ސްޕެއިންގެ ގާޑިއޯލާ ބުނީ، "އަހަރެން މިތާނގައި ހުރިކަން ސިޓީގެ ކޮންމެ ސަޕޯޓަރަކަށްވެސް އެނގެން ބޭނުން؛ ކުރިއަށްވުރެ ބޮޑަށް. އަހަރެން އަބަދުވެސް ހުރީ، އަދި އަބަދުވެސް ހުންނާނީ އަހަރެންގެ ކްލަބާއި، އޯނަރާއި، ޗެއާމަނާއި، ފެރާންއާއި، ކުޅުންތެރިންނާއި، ސްޓާފުންނާއި، އެންޒޯ އަދި ތިޔަ ހާއްސަ ސަޕޯޓަރުންގެ ފަހަތުގައި،" ކަމަށެވެ. އަދި މި އުނދަގޫ ހާލަތުން އެންމެން އެކުގައި އަރައިގަންނާނެ ކަމަށްވެސް އޭނާ ވަނީ ފާހަގަކޮށްފައެވެ.

އޭނާގެ މި ޕޯސްޓުގައި ކްލަބުގެ ޗެއާމަން ޚަލްދޫން އަލް މުބާރަކާއެކު އުފާފާޅުކުރާ ފޮޓޯތަކާއި، ޗެމްޕިއަންސް ލީގު ތަށި އުފުލާލި މަންޒަރާއި، ސަޕޯޓަރުންނަށް އަތްޖަހާ މަންޒަރު އަދި 2023 ވަނަ އަހަރުގެ ޕްރިމިއާ ލީގު ކާމިޔާބީ ފާހަގަކުރި ފޮޓޯތައްވެސް ހިމަނާފައިވެއެވެ.

ސިޓީން ގަވާއިދާ ހިލާފުވެފައިވާ ކަމަށް ނިންމާފައިވަނީ އިނގިރޭސި ފުޓުބޯޅައިގެ އެންމެ އުހަށް އެ ޓީމު އަރައިގަނެ، ޒަމާނީ ފުޓުބޯޅައިގެ އެންމެ ވަރުގަދަ އެއް ބާރަށް ވެގެންދިޔަ 9 ސީޒަނުގެ މުއްދަތުގައެވެ. އަންގާރަ ދުވަހު އާންމުކުރި ރިޕޯޓުގައި ބަޔާންކޮށްފައިވާ ގޮތުގައި، 2009/10 ސީޒަނުން ފެށިގެން 2017/18 ސީޒަނާ ހަމައަށް ސްޕޮންސަރުންނާއެކު ވެފައިވާ އަސްލު އެއްބަސްވުންތައް އޮޅުވާލައި، ސައްހަ ނޫން އެއްބަސްވުންތަކެއް ސިޓީން ވަނީ ހަދާފައެވެ.