އިބްރާހީމް މުހައްމަދު ސޯލިހްގެ ވެރިކަމުގައި އެންމެ ބާރުގަދަ ވަޒީރަށް ވެގެން، ފައްޔާޒު މަސައްކަތް ކުރީ އޭނާއަކީ އެންމެންގެ "ބްރޯ" ކަމަށް ދައްކައިގެންނެވެ. ސޯލިހް ސަރުކާރުގެ އިސްވެރިންނާއި އެމްޑީޕީގެ ގައުމީ މަޖިލީހުގެ މެޖޯރިޓީ މެންބަރުން ފައްޔާޒުގެ ފަހަތުގައި އެދުވަސްވަރު އަބަދު މުގޯލި އަޅަމުން ދިޔައީ އޭނާގެ ބާރުގައި މާލީ މަންފާއެއް ލިބުމަށް އެދި އެވެ. ފައްޔާޒުގެ އެ އަމަލަކީ ބޮޑު ގޯހެއް ކަމަށް ތުހުމަތުކޮށް އެ ވާހަކަ އެންމެ ބޮޑަށް ދެއްކެވީ އެމްޑީޕީގެ މިހާރުގެ ޗެއާޕާސަން ގަލޮޅު ކެނެރީގެ މުހައްމަދު ނަޝީދު އެވެ. ފައްޔާޒަށް ކުރެވޭ ހިޔާނާތުގެ ތުހުމަތުތައް ގިނަވެ، ނަޝީދު ވަނީ ފައްޔާޒު، ވަޒީރުކަމުން ވަކިކުރުމަށް އިތުބާރު ނެތް ކަމުގެ ވޯޓެއް މަޖިލީހުގެ ތެރެއިން ނެގުމަށްވެސް އެ ދުވަސްވަރު މަސައްކަތްކޮށްފަ އެވެ. އެކަމަކު ފައްޔާޒުގެ ބާރުގައި ހިސޯރުކޮށްފައި އޮތް މަޖިލީހުގެ ތެރެއިން އެކަން ވަނީ ނާކާމިޔާބުކޮށްލާފަ އެވެ.

ފައްޔާޒަށް ކުރާ ހިނާޔާތުގެ ތުހުމަތުތައް "ފޮރުވަން" ރައީސް ސޯލިހް މަސައްކަތް ކުރާތީ އެއީ ސޯލިހްގެ ސިޔާސީ ހަޔާތް ހަލާކުވެގެންދާނެ ކަމެއްކަން ނަޝީދު ވަނީ އެ ދުވަސްވަރު ސޯލިހަށް ހަނދާންވެސް ކޮށްދީފަ އެވެ. ސޯލިހަށް ރިޔާސީ އިންތިހާބު ގެއްލުނީ ނަޝީދު އޭރު ހަނދާންކޮށްދިން ގޮތަށް ފައްޔާޒުގެ ދިފާއުގައި މަސައްކަތް ކުރުމުން ކަމަށް ދެކޭ މީހުންވެސް ވަރަށް ގިނަ އެވެ.

Ad by Hajj Corporation

ސޯލިހްގެ ސަރުކާރާ ގުޅޭ ހިޔާނާތުގެ އެންމެ ބޮޑެތި މައްސަލަތަކުގެ ތެރެއިން އާރްޑީސީގެ ހިޔާނާތަކީ މަޝްހޫރު ވާހަކައެކެވެ. އާރްޑީސީގެ އަޑި ނޭނގޭ ބޮޑު ހިޔާނާތުގެ ތެރެއިން ބަޔަކު ދިރުވާލި ފައިސާއިން މާލީ މަންފާ އެންމެ ބޮޑަށް ލިބުނު މީހަކީ ފައްޔާޒު ކަމަށް ދިވެހި ފުލުހުން ތުހުމަތުކޮށްފައިވެ އެވެ. އަދި އެ މައްސަލައިގައި އޭނާ ފުލުސް އޮފީހަށް ހާޒިރުކޮށް، ސުވާލުވެސް ކޮށްފައިވެ އެވެ.

މީގެއިތުރުން ދައުލަތުން އެކިއެކި ފަރާތްތަކަށް ބަދަލު ދިނުމަށްޓަކައި ސޯލިހްގެ ވެރިކަމުގައި އުފެއްދި، އޮލްޓަނޭޓިވް ޑިސްޕިއުޓް ރިޒޮލިއުޝަން ކޮމިޓީގެ ތެރެއިންވެސް ހިޔާނާތަށް މަގުފަހިވާ ގޮތަށް ފައްޔާޒު ކަންތައްތަކެއް ކޮށްފައިވާ ކަމަށް އެންޓި ކޮރަޕްޝަން ކޮމިޝަން (އޭސީސީ)އިން ތުހުމަތުކޮށްފައިވެ އެވެ. އެގޮތުން ފައްޔާޒަށް ލިބިފައިވާ ބާރު ދައްކައިގެން، ދައުލަތަށް ފައިދާއެއް ލިބެން އޮތް ކަމެއްގައި، ރަސްމީ ހައިސިއްޔަތު ނަހަމަ ގޮތުގައި ބޭނުންކޮށް، އަމިއްލަ ކުންފުންޏަކަށް މާލީ މަންފާ ހޯދައިދިން ކަމަށް އޭސީސީގެ ތުހުމަތުގައި ބުނެފައިވެ އެވެ. މައްސަލައިގެ ތަހުގީގަށް އޭސީސީއަށް ހާޒިރުކޮށް ސުވާލުކުރުމުން ފައްޔާޒު ވަނީ އޭސީސީގެ އިތުބާރު ގެއްލުވާލުމަށް އެތައް ވާހަކައެއް ދައްކާފަ އެވެ.

ފައްޔާޒުގެ މަސްލަހަތު ކުރިން އޮތް ބިގް ކުންފުންޏަށް 30 މިލިއަނަށް ވުރެ ގިނަ ރުފިޔާ ދޫކޮށްފައިވަނީވެސް އޭނާގެ ވަޒީރުކަމުގައި ބާރުގެ ބޭނުންކޮށްގެން ކަމަށް އެތައް ބަޔަކު ތުހުމަތުކުރެ އެވެ. ބިގުގެ މައްސަލަ ސުޕްރީމް ކޯޓުން ބެލުމަށްފަހު، އަލުން އެ މައްސަލަ ބެލުމަށް ދަށު ކޯޓަށް އަމުރުކޮށް، ދައުލަތުން ބިގަށް ފައިސާ ދިނުން އޭރު ހުއްޓުވާފައިވެސްވެ އެވެ.

ސޯލިހްގެ ސަރުކާރުގައި އިންޓަގްރޭޓެޑް ޓޫރިޒަމް ޕްރޮޖެކްޓުތަކެއް ފެށުމަށްޓަކައި، ޓޫރިޒަމާ ބެހޭ ގާނޫނަށް އިސްލާހު ހުށަހެޅުމުން އޭރު މަޖިލީހުގައި ތިބި އެމްޑީޕީގެ މެންބަރުން ވަނީ އެ މައްސަލައިގައިވެސް ފައްޔާޒަށް ބޮޑެތި ތުހުމަތުތަކެއްކޮށްފަ އެވެ. އެ އިސްލާހުތަކުގެ ބޭނުމަކީ އިކޮނޮމިކް މިނިސްޓްރީއަށް ބާރު ލިބޭ ގޮތަށް ސަރުކާރުން އިތުރު ވިޔަފާރިތަކަށް ވަދެ، ފައްޔާޒަށް މާލީ މަންފާތަކެއް ލިބޭ ގޮތް ފަހިކުރުން ކަމަށް މެންބަރުން ތުހުމަތުކޮށްފައިވެ އެވެ.

ފައްޔާޒުގެ އިކޮނޮމިކް މިނިސްޓަރު ކަމުގައި ކުދި އަދި މެދު ފަންތީގެ ވިޔަފާރިތަކަށް އެހީވުމުގެ ނަމުގައި ހިޔާނާތަށް މަގުފަހިކުރަން ބޭންކެއްވެސް ވަނީ އުފައްދާފަ އެވެ. އެތަނުން ފައްޔާޒުގެ ގާތް އެތައް ބަޔަކަށް ލޯނު ދީ މުޅި ބޭންކިން ނިޒާމު ފުނޑާލުމުގެ މޭސްތިރިޔަކީވެސް ފައްޔާޒު އެވެ.

ސޯލިހްގެ ވެރިކަމުގައި ރާއްޖޭގެ 61 ރަށެއްގައި ޕޮލިސް ސްޓޭޝަން އަޅަން އަވަށްޓެރި ގައުމެއްގެ ކުންފުންޏަކާ ހަވާލުކުރުމުން، ފައްޔާޒުގެ މަސްލަހަތު ހުރި ބަޔަކު އެ މަޝްރޫއުގެ ތެރެއަށް ވަދެ، ދައުލަތުން އެތައް މިލިއަން ޑޮލަރެއް ދަމައިގެންފައިވާ ކަމަށް ބުނާ މައްސަލައެއް ފުލުހުން މިހާރުވެސް ދަނީ ތަހުގީގުކުރަމުންނެވެ. އެ މަޝްރޫއާ ގުޅޭ އެއްވެސް މަސައްކަތެއް ނުކޮށް ދައުލަތުން 3.6 މިލިއަން ޑޮލަރު ފައްޔާޒުގެ މަސްލަހަތު ހުރި ފަރާތްތަކަށް ލިބިފައިވާ ކަމަށް ފުލުހުން ތުހުމަތުކުރެ އެވެ.

ފައްޔާޒަކީ ސިޔާސީ ބިކާރީއެއް ކަމަށް އެތައް ބަޔަކު ގަބޫލުކުރި ނަމަވެސް ރައީސުލްޖުމްހޫރިއްޔާގެ މަގާމާ ހަވާލުވުމުގެ ހުވަފެން އޭނާ ދަނީ ދެކެމުންނެވެ. އެކަމަކު ހިޔާނާތްތެރިންނާއި ފައްޔާޒު ފަދަ ބަނގުރޫޓްވެފައި ތިބި މީހުންނަށް ދިވެހި ރައްޔިތުން ނޫނެކޭ ބުނާނެކަން މާޒީވެ ދިޔަ އިންތިހާބުތަކުން އެނގިގެންދެ އެވެ.