ރާއްޖޭން މިރޭ ކުޅުނު އެކުވެރިކަމުގެ މެޗުގައި ކުޅުންތެރިޔަކު މަދުކޮށް ކުޅެ، ލިބުނާން އަތުން ރާއްޖެ ބަލިވެއްޖެއެވެ.

ކިރްގިސްތާންގެ ޑޮލެން އިމުރްޒަކޯވް ސްޓޭޑިއަމްގައި މިރޭ ކުޅުނު މެޗުގައި ލުބުނާނުން ރާއްޖޭގެ މައްޗަށް ކުރި ހޯދީ 6-0 ގެ ނަތީޖާއަކުންނެވެ. މި މެޗަކީ މިފަހަރު އިންޓަނޭޝަނަލް ބްރޭކްގައި ރާއްޖޭން ކުޅުނު ތިންވަނަ މެޗެވެ. ފުރަތަމަ ޗައިނާއާ ދެކޮޅަށް އެގައުމުގައި ކުޅުނު މެޗުން ރާއްޖެ ބަލިވެފައި އޮތީ 3-0 ގެ ނަތީޖާއަކުންނެވެ. އަދި އޭގެ ފަހުން ކިރިގިސްތާނާ ދެކޮޅަށް ކުޅުނު މެޗުން ބަލިވީ 5-0 ގެ ނަތީޖާއަކުންނެވެ.
މިއަދުގެ މެޗުގެ ފުރަތަމަ ތިން މިނެޓުގެ ތެރޭގައި ލުބުނާނުން ވަނީ ގޯލެއް ޖަހައި ލީޑު ހޯދައިފައެވެ. ހަސަން ސްރޫރް ދިން ބޯޅައަކުން ލުބުނާނަށް އެ ގޯލު ކާމިޔާބުކޮށްދިނީ ހުސެން ޗަކްރޫން އެވެ. ރާއްޖެއަށް އުނދަގޫތަކަކާ ކުރިމަތިލާން ޖެހުނީ މެޗުގެ 12 ވަނަ މިނެޓުގައި ރާއްޖޭގެ ކެޕްޓަން ސަމޫހު އަލީ (ސަމުއްޓޭ) އަށް ދެއްކި ރަތް ކާޑާ ގުޅިގެންނެވެ.

މެޗުގެ ފުރަތަމަ ހާފު ނިމުމުގެ ކުރިން ލުބުނާނުން ވަނީ އިތުރު ދެ ގޯލު ޖަހައިފައެވެ. ލުބުނާނަށް އެ ދެ ގޯލު ވެސް ކާމިޔާބުކޮށްދިނީ ޗަކްރޫން އެވެ. އެ ގޯލުތަކާއެކު އޭނާގެ ހެޓްރިކް ފުރިހަމަވެގެންދިޔައެވެ. މެޗުގެ ފުރަތަމަ ހާފު ނިމިގެންދިޔައީ 3-0 ގެ ނަތީޖާއަކުން ލުބުނާން ކުރީގައި އޮވެގެންނެވެ.

މެޗުގެ ދެވަނަ ހާފުގައި ލުބުނާނުން ޖެހި ހަތަރު ގޯލުގެ ތެރެއިން އެއް ގޯލަކީ ރާއްޖޭގެ އަހުމަދު މާއިޝް ރަޝީދު އަތުން ބައިކޮޅަށް ވަން ގޯލެކެވެ. އޭގެ ފަހުން ޖެހި ތިން ގޯލާއެކު ލުބުނާންގެ އަލީ ކަސާސް ވަނީ ހެޓްރިކެއް ފުރިހަމަކޮށްފައެވެ.

މީގެ ކުރިން އިންޑިއާގައި ބޭއްވި ސާފް ޗެމްޕިއަންޝިޕް 2023 ގައި ވެސް ރާއްޖެ އާއި ލުބުނާނުން ބައްދަލުކުރިއެވެ. އެ މެޗުން ރާއްޖެ ބަލިވީ 1-0 ގެ ނަތީޖާއަކުންނެވެ.