މިޒަމާނުގެ ދިރިއުޅުމުގެ ބުރަކަމާއި، ނަފުސާނީ އެކި ގޮންޖެހުންތަކާއި ހާސްކަމުން ސަލާމަތްވެ، ހިތަށް ހަމަޖެހުން ހޯދުމަށް އޮތް އެންމެ ފުރިހަމަ ފަރުވާއަކީ ގިނަގިނައިން މާތް ﷲ ހަނދުމަކުރުން ކަމަށް މިއަދުގެ ހުކުރު ޚުޠުބާގައި ހަނދާންކޮށްދީފިއެވެ.

ގިނަގިނައިން މާތް ﷲ ހަނދުމަކުރުން މި މައުޟޫޢަށް ރާއްޖޭގެ އެކި ކަންކޮޅުތަކުގައި އިއްވި މިއަދުގެ ޚުޠުބާގައި ފާހަގަކޮށްފައިވާ ގޮތުގައި، އިންސާނާގެ ދިރިއުޅުމުގައި ކުރިމަތިވާ ތަކުލީފުތަކަށް އޮތް އެންމެ ކުރު އަދި ފަސޭހަ މަގަކީ ވެސް ﷲގެ ޙަޟްރަތަށް ކުއްތަންވުމެވެ. ޛިކުރުކުރުމަކީ ހަމައެކަނި ނަފުސަށް ހަމަޖެހުން ގެނެސްދޭ ކަމެއް ނޫން ކަމަށާއި އެއީ މަރުވެފައިވާ ހިތްތަކަށް ދިރުން ގެނެސްދީ، ޣާފިލުކަމުގެ ނިދިން އިންސާނާ ހޭލައްވާލދޭ ކަމެއްކަން ޚުޠުބާގައި ބަޔާންކޮށްފައިވެއެވެ.

Ad by Hajj Corporation

މާތް ﷲ ހަނދުމަކުރުން ނުވަތަ ޛިކުރުކުރުމަކީ ހަމައެކަނި ދުލުން ކޮށްލާ ކަމެއް ނޫން ކަމަށާއި، އެކަން މައިގަނޑު ތިން ބަޔަކަށް ބެހިގެންވާ ކަމަށް ޚުޠުބާގައި ވަނީ ބުނެފައެވެ. އެގޮތުން ހިތުން ޛިކުރުކުރުމާއި، ދުލުން ޛިކުރުކުރުމާއި، އަމަލުން ޛިކުރުކުރުން ހިމެނޭކަމަށް ހިތުބާގައި ވަނީ ބުނެފައެވެ.

ޚުޠުބާގައި ބުނީ، ޛިކުރުކުރުމަކީ ހަމައެކަނި މިސްކިތުގައި އިނދެގެން ނުވަތަ ވަކި ވަގުތަކު ކުރާ ކަމަކަށް ހަދަންޖެހޭ ސަބަބެއް ނެތް ކަމަށެވެ.

ހިނގާފައި ދާއިރު، ސަވާރީއެއްގައި ދަތުރުކުރާއިރު، އޮށޯވެ އޮންނަ އިރު އަދި މަސައްކަތުގެ މައިދާނުގައި އުޅޭއިރު ވެސް މާތް ﷲ މަތިން ހަނދުމަކުރެވިދާނެ: ހުތުބާ

ބާއްޖަވެރިކަމަށް އެދޭ މީހާގެ ދޫ އަބަދުވެސް ﷲގެ ޛިކުރުމަތީގައި ތެތްކަންމަތީ ބެހެއްޓުމަށް ރަސޫލާ ނަސޭހަތްތެރިވެވަޑައިގެންފައިވާކަން ޚުޠުބާގައި ހަނދާންކޮށްދިނެވެ. އަދި ޤުރުއާނުގެ އާޔަތަކުން ދަލީލުދައްކަވަމުން، އީމާންވެފައިވާ މީހުންގެ ހިތްތައް ހަމަޖެހެނީ ހަމައެކަނި ﷲ ހަނދުމަކުރުމުން ކަމަށް ހުތުބާގައިވަނީ ބުނެފައެވެ.