އާޖެންޓީނާގެ ގައުމީ ޓީމުގެ ކެޕްޓަން ލިއޮނެލް މެސީ އަށް، އެ ގައުމުގެ އެންމެ ޝަރަފުވެރި އެއް ޔުނިވަރސިޓީ ކަމަށްވާ ޔުނިވަރސިޓީ އޮފް ބުއެނޮސް އައިރިސް (ޔޫބީއޭ) އިން ދޭ އެންމެ މަތީ ޝަރަފު ކަމުގައިވާ "ޑޮކްޓަރ ހޮނޮރިސް ކޯސާ" އެރުވުމަށް ނިންމައިފިއެވެ. މި ޝަރަފަކީ ފުޓުބޯޅަ ކުޅިވަރުގެ އިތުރުން މެސީ ހޯދާފައިވާ ޚާއްސަ ކާމިޔާބީއެކެވެ.

ޔޫބީއޭގެ ސުޕީރިއަރ ކައުންސިލުން އިއްތިފާގުން މި ނިންމުން ނިންމާފައިވަނީ މެސީގެ ޕްރޮފެޝަނަލް ކެރިއަރާއި، ގައުމު ތަމްސީލުކުރުމުގައި ދައްކުވައިދީފައިވާ އަގުތަކާއި، ދަނޑުން ބޭރުގައި އޭނާގެ ހުރި ނުފޫޒާއި ނަމޫނާ ސިފަތަކަށް ބެލުމަށްފަހުގައެވެ. މެސީގެ ކެރިއަރަކީ ފަންނީ މޮޅުކަމާއި، ކެތްތެރިކަމާއި، މަޑުމައިތިރިކަމުގެ އިތުރުން އަޚުލާގީ ރިވެތި އުސޫލުތަކުގެ މިސާލެއް ކަމަށް އެ ޔުނިވަރސިޓީން ބަޔާންކޮށްފައިވެއެވެ.

Ad by Hajj Corporation

މި ޝަރަފު މެސީ އަށް އެރުވުމަށް ހަމަޖެހިފައިވަނީ 6 އޮކްޓޯބަރ 2026 ގައި އެސްޓާޑިއޯ މޮނިއުމެންޓަލް ސްޓޭޑިއަމްގައެވެ. މި ރަސްމިއްޔާތު ބޭއްވުމަށް ހަމަޖެހިފައިވަނީ ބެނިންއާ ދެކޮޅަށް އާޖެންޓީނާ ކުޅޭ ފަހު މެޗުގެ ކުރިންނެވެ. މިއީ ގައުމީ ޓީމަށް މެސީ ކުޅެދޭނެ އެންމެ ފަހު މެޗަށް ވެގެންދާނެއެވެ.

ޔޫބީއޭ އިން ފާހަގަކުރި ގޮތުގައި، ގައުމީ ޓީމާއެކު މެސީ ހޯދި ކާމިޔާބީތަކުގެ ތެރޭގައި 2021 ވަނަ އަހަރުގެ ކޮޕާ އެމެރިކާ، 2022 ގެ ފައިނަލިސިމާ، 2022 ވަނަ އަހަރުގެ ފީފާ ވޯލްޑް ކަޕް އަދި 2024 ގެ ކޮޕާ އެމެރިކާ ހިމެނެއެވެ. މީގެ އިތުރުން 2026 ވަނަ އަހަރުގެ ވޯލްޑް ކަޕްގެ ފައިނަލަށް ދަތުރުކޮށް ރަނަރަޕްކަން ހޯދި ޓީމުގައި ވެސް މެސީ ވަނީ މުހިންމު ދައުރެއް އަދާކޮށްފައެވެ.

ޑޮކްޓަރ ހޮނޮރިސް ކޯސާ އަކީ އެކި ދާއިރާތަކުން ފާހަގަކޮށްލެވޭ ފަދަ ޚިދުމަތްތަކެއް ކޮށްދީފައިވާ ފަރާތްތަކަށް ޔޫބީއޭ އިން އަރުވާ އެންމެ މަތީ ޝަރަފުވެރި އެވޯޑެވެ. މިއީ ކިޔަވައިގެން ހޯދާ ސަނަދަކާ ތަފާތުކޮށް، ގައުމީ އަދި ސަގާފީ ގޮތުން މުޖުތަމައަށް ކޮށްދީފައިވާ ޚިދުމަތްތަކުގެ އަގުވަޒަންކުރުމުގެ ގޮތުން ދެވޭ އޮނަރަރީ ލަގަބެކެވެ.