ދުނިޔޭގެ ހިތުގެ ދުވަސް ފާހަގަކުރުމުގެ ގޮތުން ހެލްތު ޕްރޮޓެކްޝަން އޭޖެންސީ (އެޗް.ޕީ.އޭ) އާއި ސިއްޙީ ދާއިރާގައި ހަރަކާތްތެރިވާ ގިނަ މުއައްސަސާތަކާއި މަދަނީ ޖަމްޢިއްޔާތައް ގުޅިގެން ހުޅުމާލެ ފޭސް 2 ގެ ރުއްގަނޑު 3 ސަރަޙައްދުގައި ޚާއްޞަ ހަރަކާތްތަކެއް ކުރިއަށް ގެންގޮސްފިއެވެ.

'ޑޯންޓް މިސް އަ ބީޓް' މި ޝިޢާރުގެ ދަށުން ބޭއްވި މި ހަރަކާތުގެ މައިގަނޑު މަޤްޞަދަކީ ހިތުގެ ދުޅަހެޔޮކަން ފާހަގަކުރުމާއި، ހިތާއި ލޭނާރުގެ ބަލިތަކާމެދު އާންމުންގެ ހޭލުންތެރިކަން އިތުރުކުރުމެވެ.

Ad by Hajj Corporation

މި ހަރަކާތް ޝަރަފުވެރިކޮށްދެއްވީ މިނިސްޓަރ އޮފް ހެލްތު، ފެމިލީ އެންޑް ވެލްފެއަރ ޑރ. ޢާއިޝަތު ރަމީލާ އަދި ދުނިޔޭގެ ޞިއްޙަތު ޖަމްޢިއްޔާ (ޑަބްލިއު.އެޗް.އޯ) އިން ދިވެހިރާއްޖެއަށް ކަނޑައަޅުއްވާފައި ހުންނަވާ މަންދޫބު މިސް ޕޭޑެންއެވެ. މީގެއިތުރުން ހައުސިންގ އެންޑް ޑިވެލޮޕްމަންޓް ކޯޕަރޭޝަން (އެޗް.ޑީ.ސީ)، ޓައިނީ ހާރޓްސް އޮފް މޯލްޑިވްސް، ނޭޝަނަލް ސެންޓަރ ފޯރ ކާޑިއޯވެސްކިއުލަރ ސައިންސަސް (އެން.ސީ.ސީ.އެސް)، ހުޅުމާލެ ހޮސްޕިޓަލް، މޯލްޑިވިއަން ރެޑް ކްރެސެންޓް، އަރބަން ޕްރައިމަރީ ހެލްތު ކެއަރ ސެންޓަރ، މޯލްޑިވިއަން ފިޒިއޮތެރަޕީ އެސޯސިއޭޝަން، ފެކަލްޓީ އޮފް ހެލްތު ސައިންސަސް އަދި ނޭޝަނަލް ޑައިއެބީޓީސް ސެންޓަރުން ވަނީ މި ހަރަކާތުގައި ބައިވެރިވެފައެވެ.

އާންމުންނަށް ހިލޭ ޓެސްޓުތަކާއި ސިއްޙީ މަޢުލޫމާތު

މި އިވެންޓުގެ ތެރެއިން އާންމުންނަށް ހިލޭ ހެލްތު ސްކްރީންކުރުމާއި މަޢުލޫމާތު ފޯރުކޮށްދިނުމަށް ތަފާތު ސްޓޯލްތައް ވަނީ ޤާއިމުކޮށްފައެވެ. އެގޮތުން ހުޅުމާލެ ހޮސްޕިޓަލުގެ ޕަބްލިކް ހެލްތު ސެންޓަރުން ލޭގެ ޕްރެޝަރާއި ހަކުރު ޗެކްކުރުމުގެ ޚިދުމަތް ދީފައިވާއިރު، އަރބަން ޕްރައިމަރީ ހެލްތު ކެއަރ ސެންޓަރާއި އެން.ޑީ.ސީ އަދި އެން.ސީ.ސީ.އެސް ގުޅިގެން ވަނީ ހިތާއި ލޭދައުރުވާ ނިޒާމުގެ މޮޑެލްތައް ދައްކާލުމުގެ އިތުރުން ކުޑަކުދިންނަށް ޚާއްޞަ ކުޅިވަރުތަކާއި ފޭސް ޕެއިންޓިންގ ކުރިއަށް ގެންގޮސްފައެވެ.

ހަމައެއާއެކު، މޯލްޑިވިއަން ފިޒިއޮތެރަޕީ އެސޯސިއޭޝަނުން ޖިސްމާނީ ހަރަކާތްތަކަށް ތައްޔާރުވެފައިވާ މިންވަރު ދެނެގަތުމުގެ ޓެސްޓުތައް ހެދިއިރު، މޯލްޑިވިއަން ރެޑް ކްރެސެންޓުން ވަނީ ސީ.ޕީ.އާރް އަދި ފުރަތަމަ އެހީގެ ތަމްރީނު ހަރަކާތްތައް ކުރިއަށް ގެންގޮސްފައެވެ. އަދި އެޗް.ޕީ.އޭ ޓޮބެކޯ ކޮންޓްރޯލުން ވަނީ ދުންފަތުގެ އިސްތިޢުމާލުކުރުން ހުއްޓާލުމާ ގުޅޭގޮތުން ލަފާއާއި ހޭލުންތެރިކަމުގެ މަޢުލޫމާތު ފޯރުކޮށްދީފައެވެ.

ޤައުމީ ފެންވަރުގެ ހަރަކާތްތައް

ހެލްތު ޕްރޮޓެކްޝަން އެޖެންސީއިން އިސްނަގައިގެން ކުރިއަށް ގެންދިޔަ މި ހަރަކާތުގެ ތެރެއިން، ރާއްޖޭގެ ހުރިހާ ރަށެއްގައި ހިތެއްގެ ބައްޓަން އެޅުމާއި ފޮޓޯ ނެގުމުގެ ޚާއްޞަ ހަރަކާތްތަކެއްވެސް ވަނީ ކުރިއަށް ގެންގޮސްފައެވެ. މި ހަރަކާތުގެ ބައިވެރިން ވަނީ ޤައުމީ ފެންވަރުގައި ހިތުގެ ބަލިތަކާ ދެކޮޅަށް މަސައްކަތްކުރުމުގެ އެއްބައިވަންތަކަން ހާމަކޮށްދީފައެވެ.

މީގެއިތުރުން، އަމިއްލަ ހިތުގެ ދުޅަހެޔޮކަމަށްޓަކައި ކުރާނެ ކަންކަން ބަޔާންކޮށް 'ޕްރޮމިސް ޓު ހާރޓް' ޕްލެޖު ބޯޑުގައި ސޮއިކުރުމުގެ ފުރުޞަތުވެސް މި އިވެންޓުގެ ތެރެއިން އާންމުންނަށް ވަނީ ހުޅުވާލާފައެވެ.