މެޖިސްޓްރޭޓް ކޯޓުތަކުގައި މައްސަލަ ހުށަހެޅުމާއި ބެލުމާއި، ކޯޓުތައް ހިންގުމުގައި އަމަލުކުރާނެ ގޮތް ބަޔާންކޮށްދޭ ސުޕްރީމް ކޯޓުގެ ގަވާއިދަށް 1 އޮކްޓޫބަރު 2026 ން ފެށިގެން އަމަލުކުރަން ފަށައިފިއެވެ.

ގަވާއިދު ނަންބަރު ‪2026/R-60‬ ގެޒެޓުގައި ޝާއިއުކުރެވުނީ 1 ޖުލައި 2026 ގައެވެ. 153 މާއްދާއިން ހަދާފައިވާ މި ގަވާއިދަކީ، މެޖިސްޓްރޭޓް ކޯޓުތައް ހިންގުމުގައި ހުރިހާ ކޯޓުތަކުން އެއްގޮތަކަށް އަމަލުކުރެވޭކަން ކަށަވަރުކުރުމަށް ހަދާފައިވާ ގަވާއިދެކެވެ.

Ad by Hajj Corporation

ގަވާއިދުގައިވާ ގޮތުން، ގާނޫނު ތަންފީޒުކުރާ އިދާރާއަކުން ހައްޔަރުކުރުމުގެ އަމުރު ފަދަ ކޯޓު އަމުރަކަށް އެދި ހުށަހެޅިއްޖެނަމަ، 24 ގަޑިއިރުގެ ތެރޭގައި ކޯޓުން ގޮތެއް ނިންމަންވާނެއެވެ. ކޯޓުގެ އިޚްތިޔާރުން ބޭރުގެ ކަމެއް ދިމާވެގެން ނުނިމިއްޖެނަމަ، އެންމެ ލަސްވެގެން 48 ގަޑިއިރުގެ ތެރޭގައި ނިންމަންވާނެ، އަދި ލަސްވި ސަބަބު ލިޔުމުން ރިކޯޑުކުރަންވާނެއެވެ. ނިންމި ގޮތް ސަބަބާއެކު ލިޔުމުން ދޭންވާނެއެވެ.

ބަންދުގައި ތިބޭ މީހުންގެ ބަންދާމެދު ގޮތެއް ނިންމާ ގަޑިތައް ކޯޓުން އާންމުކޮށް އިއުލާނުކުރަންވާނެއެވެ. ވީޑިއޯ ކޮންފަރެންސިންގ މެދުވެރިކޮށް ހާޒިރުކުރުމަކީ ވެސް ފަނޑިޔާރެއްގެ ކުރިމައްޗަށް ހާޒިރުކުރުމެއްކަމުގައި ބެލެވޭނެއެވެ.

މައްސަލަ ހުށަހަޅާ ފޯމު ކައުންޓަރަށް، ނުވަތަ އީމެއިލް މެދުވެރިކޮށް ހުށަހެޅޭނެއެވެ. ފޯމު ހުށަހެޅުނު ދުވަހުން ފެށިގެން ރަސްމީ މަސައްކަތު 5 ދުވަހުގެ ތެރޭގައި، އެ ފޯމު ފުރިހަމަވޭތޯ ކޯޓުން އަންގަންވާނެއެވެ. ކޯޓަށް ހާޒިރުވުމަށް އަންގާ އަމުރު އީމެއިލް ނުވަތަ މުއާޞަލާތީ ވަސީލަތެއްގެ އެކައުންޓަކަށް ވެސް ރައްދުކުރެވޭނެ ކަމަށާއި، އަމުރަށް ހާޒިރުނުވާ މީހަކު 250 ރުފިޔާއިން ޖޫރިމަނާކުރެވިދާނެ ކަމަށް ގަވާއިދުގައި ބަޔާންކޮށްފައިވެއެވެ.

ކައިވެނިކުރަން އެދޭ މީހުން ކޯޓަށް ހުށަހަޅަންވާނީ ކައިވެނި ކުރަން ބޭނުންވާ ދުވަހުގެ 7 ދުވަސް ކުރިންނެވެ. ވަރިކުރެވިއްޖެނަމަ 3 ދުވަހުގެ ތެރޭގައި ކޯޓަށް އަންގަންވާނެއެވެ.

މީގެ އިތުރުން، ކޯޓުގެ ދުވަހުގެ ތާވަލާއި ތަފާސްހިސާބު މީސްމީޑިއާ މެދުވެރިކޮށް އާންމުކުރުމަށްޓަކާ ކޯޓުގެ އެކައުންޓު ހުޅުވަންވާނެ ކަމަށް ވެސް ގަވާއިދުގައި ބަޔާންކޮށްފައިވެއެވެ.