މިދިޔަ ސެޕްޓެންބަރު މަހު 150،000 އަށް ވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވާ ކަމަށް ފަތުރުވެރިކަމާއި މަދަނީ އުދުހުންތަކާ ބެހޭ ވުޒާރާގެ އެންމެ ފަހުގެ ތަފާސްހިސާބުތަކުން ދައްކައިފިއެވެ.

ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވަމުން އަންނައިރު، ކުރިއަށްއޮތް ހައި ސީޒަންގައި މި އަދަދު އިތުރަށް މައްޗަށް ދާނެ ކަމަށް ސަރުކާރާއި ދާއިރާގެ ހިއްސާދާރުން އަންދާޒާކުރެއެވެ.

Ad by Hajj Corporation

ފަތުރުވެރިކަމާ ބެހޭ ވުޒާރާއިން އާންމުކޮށްފައިވާ ތަފާސްހިސާބުތަކަށް ބަލާއިރު، މިދިޔަ ސެޕްޓެންބަރު މަހު ރާއްޖެއަށް ޖުމްލަ 150,764 ފަތުރުވެރިން ވަނީ ޒިޔާރަތްކޮށްފައެވެ. މިއީ މިދިޔަ އަހަރުގެ ސެޕްޓެންބަރު މަހު ޒިޔާރަތްކުރި 151,114 ފަތުރުވެރިންނާ އަޅާބަލާއިރު 0.2 އިންސައްތައިގެ ދަށްވުމެކެވެ. މިދިޔަ މަހު އެވްރެޖްކޮށް ދުވާލެއްގެ މައްޗަށް 5,872 ފަތުރުވެރިން ޒިޔާރަތްކުރިއިރު، އެ މަހުގެ އެންމެ ގިނަ ފަތުރުވެރިން ޒިޔާރަތްކޮށްފައިވަނީ ސެޕްޓެންބަރު 26 ވަނަ ދުވަހުއެވެ. އެ ދުވަހު އެކަނިވެސް 6,284 ފަތުރުވެރިން ރާއްޖެ އެތެރެވިއެވެ.

މި އަދަދުތަކާއެކު، މިއަހަރުގެ މިހާތަނަށް ރާއްޖެއަށް ޒިޔާރަތްކުރި ޖުމްލަ ފަތުރުވެރިންގެ އަދަދު ވަނީ 1,603,021 އަށް އަރާފައެވެ. މިއީ މިދިޔަ އަހަރުގެ މި މުއްދަތުގައި ޒިޔާރަތްކުރި 1,659,031 ފަތުރުވެރިންނާ އަޅާބަލާއިރު 3.4 އިންސައްތަ ދަށް އަދަދެކެވެ. އެންމެ ގިނައިން ފަތުރުވެރިން ޒިޔާރަތްކުރި ގައުމުތަކުގެ އެއްވަނައިގައި 300,977 ފަތުރުވެރިންނާއެކު ޗައިނާ އޮތްއިރު، ދެވަނައިގައި އޮތް ރަޝިއާއިން 229,236 ފަތުރުވެރިން ވަނީ އައިސްފައެވެ. މީގެ އިތުރުން އިނގިރޭސިވިލާތުން 119,968 ފަތުރުވެރިން، ޖަރުމަނުވިލާތުން 99,062 ފަތުރުވެރިން އަދި އިޓަލީވިލާތުން 98,039 ފަތުރުވެރިން ޒިޔާރަތްކޮށްފައިވެއެވެ.

ރާއްޖެއަށް ޒިޔާރަތްކުރި ފަތުރުވެރިންގެ ތެރެއިން 1,158,404 ފަތުރުވެރިން ޗުއްޓީ ހޭދަކޮށްފައިވަނީ ރިސޯޓުތަކުގައެވެ. އަދި ގެސްޓްހައުސްތަކުގައި 345,220 ފަތުރުވެރިން، ހޮޓާތަކުގައި 36,106 ފަތުރުވެރިން އަދި ސަފާރީ އުޅަނދުތަކުގައި 29,679 ފަތުރުވެރިން ޗުއްޓީ ހޭދަކުރިއެވެ. މީގެ އިތުރުން، ވައިގެ މަގުން ޖުމްލަ 1,587,438 ފަތުރުވެރިން ރާއްޖެ އެތެރެވި އިރު، މީގެ ތެރެއިން 1,569,214 ފަތުރުވެރިން އައީ ވެލާނާ އިންޓަރނޭޝަނަލް އެއަރޕޯޓުންނެވެ. އަދި ގަން، މާފަރު، ހަނިމާދޫ، މާމިގިލި އަދި ދާލު އެއަރޕޯޓް މެދުވެރިކޮށްވެސް ފަތުރުވެރިން ރާއްޖެއަށް އެތެރެއެވެ.