އާޖެންޓީނާގެ ތަރި ލިއޮނެލް މެސީ ބައިނަލްއަގުވާމީ ފުޓްބޯޅައިން ރިޓަޔާކުރުމާ ގުޅިގެން، އޭނާއަށް ދޭ ޝަރަފެއްގެ ގޮތުން ގައުމީ ޓީމުގެ 10 ނަންބަރު ޖާޒީ ރިޓަޔާކުރަން އާޖެންޓީނާގެ ފުޓްބޯޅަ އެސޯސިއޭޝަނުން ކުރި މަސައްކަތަށް ދުނިޔޭގެ ފުޓްބޯޅައިގެ މައި އިދާރާ (ފީފާ) ގެ ގަވާއިދުތަކުން ހުރަސްއަޅައިފިއެވެ.

ވިއްސަކަށް އަހަރުގެ ކާމިޔާބު ކެރިއަރަކަށްފަހު އުމުރުން 39 އަހަރުގެ މެސީ ބައިނަލްއަގުވާމީ ފުޓްބޯޅައިން ރިޓަޔާކުރާނެކަން އިއުލާނުކުރީ މިދިޔަ އޮގަސްޓް މަހުގެ 31 ވަނަ ދުވަހުއެވެ. އިންޓަ މިއާމީގެ ފޯވާޑް ރަސްމީކޮށް ސަޕޯޓަރުންނާ އަލްވަދާއު ކިޔާނީ އޮކްޓޯބަރު މަހުގެ 6 ވަނަ ދުވަހު ބުއެނޮސް އައިރިސްގެ އެސްޓާޑިއޯ މޮނިއުމެންޓަލްގައި ބެނިންއާ ދެކޮޅަށް ކުޅޭ ރަހުމަތްތެރިކަމުގެ މެޗުގައެވެ. އާޖެންޓީނާގެ ގައުމީ ޓީމަށް ކުޅެދިން 207 މެޗުގައި 125 ލަނޑު ޖަހައިދިން މެސީ ވަނީ 2026 ވަނަ އަހަރުގެ ވޯލްޑް ކަޕް ފައިނަލަށް ވެސް އެ ޓީމު ގެންގޮސްދީފައެވެ. އެ މެޗުން ސްޕެއިން އަތުން އާޖެންޓީނާ ބަލިވީ 1-0 އިންނެވެ.

Ad by Hajj Corporation

އާޖެންޓީނާއިން 10 ނަންބަރު ޖާޒީ ދާއިމީކޮށް ރިޓަޔާކުރަން ބޭނުންވި ނަމަވެސް ފީފާގެ ގަވާއިދު އޮންނަ ގޮތުން ބައިނަލްއަގުވާމީ މުބާރާތްތަކުގައި ޓީމުތަކުން 1 އިން 26 އަށް ކުޅުންތެރިންގެ ނަންބަރުތައް ހަމަޖައްސަން ޖެހެއެވެ. އެހެންކަމުން އެ ރޭންޖުގެ ނަންބަރެއް ދާއިމީކޮށް ރިޓަޔާއެއް ނުކުރެވޭނެއެވެ. މީގެ ކުރިން ލައިބީރިއާއިން ވެސް ޖޯޖް ވިއާގެ ޝަރަފުގައި 14 ނަންބަރު ރިޓަޔާކުރަން އުޅުމުން މި މައްސަލަ ދިމާވެ، 2026 ވަނަ އަހަރުގެ ވޯލްޑް ކަޕް ކޮލިފައިންގައި ނިކޮލަސް އެންޑްރޫސް ވަނީ އެ ނަންބަރު ބޭނުންކޮށްފައެވެ.

އާޖެންޓީނާގެ ކޯޗު ލިއޮނެލް ސްކަލޯނީ ބުނީ ކުރިއަށް އޮތް މެޗުތަކުގައި އެ ނަންބަރު އެހެން ކުޅުންތެރިއަކަށް ދިނުން މަޖުބޫރު ނޫން ކަމަށާއި، މެސީގެ ވަދާއީ މެޗު ނިމެންދެން އެ ނަންބަރު އެއްވެސް ކުޅުންތެރިއަކަށް ނުދޭނެ ކަމަށެވެ. އަދި އެ ނަންބަރު ދޭނެ ވަކި ކުޅުންތެރިއަކު އަދި ނުނިންމާ ކަމަށް ވެސް އޭނާ ބުންޏެވެ.

އީއެސްޕީއެން އާޖެންޓީނާގެ ރިޕޯޓަރު ފެޑެރިކޯ ބުއޭނޯ ހާމަކުރި ގޮތުގައި، ސްކަލޯނީ އެ ޓީމުގެ ކޯޗުކަމުގެ އެއްބަސްވުން އާކޮށްފިނަމަ، ދެން 10 ނަންބަރު ޖާޒީ ދޭން ޓީމުގެ އެތެރޭގައި މިހާރު ވަނީ ނިންމައިފައެވެ. އެއީ އުމުރުން 22 އަހަރުގެ އެޓޭކިން މިޑްފީލްޑަރު ނިކޯ ޕާޒްއަށެވެ. ކުރިން ރެއާލް މެޑްރިޑަށް ކުޅުނު އަދި މިހާރު ކޯމޯ އަށް ކުޅެމުން އަންނަ ޕާޒް ވަނީ މިހާތަނަށް އާޖެންޓީނާ ގައުމީ ޓީމަށް 11 މެޗު ކުޅެދީ އެއް ލަނޑު ޖަހައިފައެވެ.