މެންޗެސްޓާ ސިޓީގެ މައްޗަށް މާލީ ގަވާއިދުތަކާ ޚިލާފުވި ކަމަށް ސާބިތުވެ، ކުށްވެރިވުމާ ގުޅިގެން ޔުނައިޓެޑް އަރަބް އެމިރޭޓްސް (ޔޫއޭއީ) އިން އިނގިރޭސިވިލާތުގައި ކުރަން ރާވާފައިވާ އެތައް ބިލިއަން ޕައުންޑެއްގެ އިންވެސްޓްމަންޓް އަނބުރާ ގެންގޮސްފާނެ ކަމުގެ އިންޒާރު އިނގިރޭސި ސަރުކާރަށް ދީފައިވާ ކަމަށް ރިޕޯޓުތައް ބުނެފިއެވެ.

ދަ ޓެލެގްރާފްގައިވާ ގޮތުން، ޔޫއޭއީގެ އޮފިޝަލުން މިހާރު ވިސްނަމުންދަނީ އިނގިރޭސިވިލާތުގެ އޮކްސްފޯޑާއި ކޭމްބްރިޖް ދެމެދު އެޅުމަށް ނިންމާފައިވާ ޓެކްނޮލޮޖީ ހަބަށް ކުރަން އުޅުނު އިންވެސްޓްމަންޓްތައް ހުއްޓާލުމަށެވެ. މިއީ އިނގިރޭސިވިލާތުގެ ސިލިކަން ވެލީގެ ގޮތުގައި ތަރައްގީކުރަން އުޅުނު މުހިންމު މަޝްރޫއެކެވެ.

Ad by Hajj Corporation

މި މައްސަލައިގެ ހުކުމް އިއްވުމުގެ ދެ ހަފްތާ ކުރިން ސިޓީގެ ޗެއާމަން ޚަލްދޫން އަލް މުބާރަކް އަދި އިނގިރޭސިވިލާތުގެ ބިޒްނަސް ސެކްރެޓަރީ ޖޮނަތަން ރެއިނޮލްޑްސް ވަނީ ބައްދަލުކުރައްވާފައެވެ. ސަރުކާރުން ބުނާ ގޮތުގައި އެ ބައްދަލުވުމުގައި މަޝްވަރާކުރީ ވިޔަފާރި، ދިފާއީ އަދި ސަލާމަތީ ކަންކަމާ ގުޅޭގޮތުން ކަމަށާއި މެންޗެސްޓާ ސިޓީއާ ބެހޭގޮތުން ނޫން ކަމަށެވެ. ނަމަވެސް އެ ދަނޑިވަޅަކީ އާންމުކޮށް އިއުލާނު ނުކުރި ނަމަވެސް، ކުށްވެރިވާނެކަން އަލް މުބާރަކަށް އެނގިވަޑައިގަންނަވާނެ ވަގުތެއް ކަމަށް ބެލެވެއެވެ.

މި ނިންމުމާ ގުޅިގެން، ޔޫއޭއީން ކުރިއަށް އޮތް ތަނުގައި އިނގިރޭސިވިލާތަށް ކުރަން އޮތް ބޮޑެތި އިންވެސްޓްމަންޓްތަކަށް އޮތް ޝައުގުވެރިކަން ކުޑަވެފައިވާ ކަމަށާއި، މީގެ ސަބަބުން ދެ ގައުމުގެ ގުޅުމަށް އަސަރުކޮށްފާނެ ކަމަށް ދެކެވޭ ވާހަކަތަކަށް އިނގިރޭސި ބޮޑުވަޒީރުގެ އޮފީސް، ޑައުނިންގ ސްޓްރީޓުން ވަނީ އެއްބަސްވެފައެވެ.