ރާއްޖޭގެ ފަހުރުވެރި ގައުމީ ބްރޯޑްކާސްޓިން ދުވަހުގެ މުނާސަބަތުގައި، ގައުމީ މަސްލަހަތު އިސްކޮށް، ދޮގު މައުލޫމާތާއި ފިތުނަ އުފެދޭ ކަންކަމުން ދުރުހެލިވެ ޒިންމާދާރުކަމާއެކު މައުލޫމާތު ފެތުރުމަށް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން (އެމްއެމްބީސީ) އިން އިލްތިމާސްކޮށްފިއެވެ.

މި ދުވަހުގެ މުނާސަބަތުގައި ކޮމިޝަނުން ނެރުނު ބަޔާނެއްގައި ވަނީ، ރާއްޖޭގެ ބްރޯޑްކާސްޓަރުންނަށާއި، މި ދާއިރާގައި ހަރަކާތްތެރިވާ އެންމެހައި މުވައްޒަފުންނާއި ހިދުމަތްތެރިންނަށް ދުވަހުގެ ހެޔޮއެދުންތަކާއި ތަހުނިޔާ އަރިސްކޮށްފައެވެ.

Ad by Hajj Corporation

ކޮމިޝަނުގެ ބަޔާނުގައި ފާހަގަކޮށްފައިވާ ގޮތުގައި، ބްރޯޑްކާސްޓިން ދާއިރާއަކީ މުޖުތަމަޢުގެ އިޖުތިމާއީ، ސިޔާސީ އަދި އިގްތިސާދީ ހޭލުންތެރިކަން އިތުރުކުރުމުގައްޔާއި، ރައްޔިތުންނަށް ތެދު މައުލޫމާތު ފޯރުކޮށްދިނުމުގައި އެންމެ މުހިންމު ދައުރެއް އަދާކުރާ އެއް ވަސީލަތެވެ. ހާއްސަކޮށް، އިސްލާމީ ރިވެތި އަހުލާގާއި ދިވެހި ޤައުމިއްޔަތާއި ސަގާފަތް ދަމަހައްޓައި، ސައްހަ އަދި އިތުބާރުހުރި މައުލޫމާތު ފޯރުކޮށްދިނުމުގައި ބްރޯޑްކާސްޓަރުން އަދާކުރަނީ އަގުހުރި ގައުމީ ހިދުމަތެއް ކަމަށް ބަޔާނުގައި ވެއެވެ.

ރާއްޖޭގެ ބްރޯޑްކާސްޓިން ހިދުމަތުގެ ތާރީހަށް އަލިއަޅުއްވާލައްވަމުން ކޮމިޝަނުން ފާހަގަކުރީ، މި ހިދުމަތް އެންމެ ފުރަތަމަ ފެށިގެން އައީ 29 ޑިސެމްބަރު 1962 ގައި "މާލެ ރޭޑިއޯ" ގެ ނަމުގައި ކަމަށެވެ. އޭގެ ފަހުން ސެނެކޯ ރޭޑިއޯ، 1967 ގައި މޯލްޑިވްސް އައިލެންޑް ބްރޯޑްކާސްޓިންގ ސާވިސް (އެމްއައިބީއެސް) އަދި 1969 ގައި ރޭޑިއޯ މޯލްޑިވްސްގެ ނަމުގައި މި ހިދުމަތް ކުރިއަށްދިޔައެވެ. އަދި 1980 ގައި "ދިވެހިރާއްޖޭގެ އަޑު" ގެ ނަމަށް ބަދަލުވެ، ހިދުމަތް އިތުރަށް ފުޅާވެގެންދިޔައިރު، 1978 ގައި ޓެލެވިޒަން މޯލްޑިވްސް (ޓީވީއެމް) ގެ ހިދުމަތް ވަނީ ފެށިފައެވެ.

މީގެއިތުރުން، 2007 ވަނަ އަހަރު އަމިއްލަ ފަރާތްތަކަށް ބްރޯޑްކާސްޓް ކުރުމުގެ ފުރުސަތު ހުޅުވާލުމާއެކު، 2010 ވަނަ އަހަރު ބްރޯޑްކާސްޓްކުރުމުގެ ގާނޫނު ވުޖޫދަށް އައިސް، މި ދާއިރާއަށް ހަރުދަނާ ގާނޫނީ އޮނިގަނޑެއް އެކުލަވާލެވުނެވެ. އަދި 18 ސެޕްޓެމްބަރު 2025 ގައި ތަސްދީގުކުރެވުނު މީޑިއާ އަދި ބްރޯޑްކާސްޓިންގ ރެގިއުލޭޝަން ގާނޫނުގެ ދަށުން މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަން އުފެދި، ޒަމާނީ މީޑިއާތަކާއެކު މި ދާއިރާ ވަނީ އައު ހަރުފަތަކަށް ވާސިލުވެފައެވެ. މިވަގުތު ރާއްޖޭގައި 37 ބްރޯޑްކާސްޓަރުންނާއި 29 ރީބްރޯޑްކާސްޓަރުން ރައްޔިތުންނަށް ހިދުމަތް ދެމުން ގެންދާކަން ކޮމިޝަނުން އުފަލާއެކު ފާހަގަކުރެއެވެ.

ކޮމިޝަނުން އިތުރަށް ހާމަކުރި ގޮތުގައި، ޓެކްނޮލޮޖީގެ ގޮތުން ދުނިޔެއަށް އަންނަ ކުރިއެރުންތަކާއެކު، ބްރޯޑްކާސްޓިންގ ދާއިރާ އިތުރަށް ތަރައްޤީކޮށް، ފެންވަރު ރަނގަޅު ޚިދުމަތްތަކެއް ފޯރުކޮށްދިނުމަށް އަބަދުވެސް މަސައްކަތް ކުރަމުންދާނެއެވެ. އަދި ދާއިރާގެ މަސައްކަތްތެރިންގެ ފަންނީ ޤާބިލުކަން އިތުރުކުރުމާއި، ޤާނޫނާއި ގަވާއިދުގެ ތެރެއިން މިނިވަން އަދި ޒިންމާދާރު މީޑިއާ ވެއްޓެއް ޤާއިމުކުރުމަކީ އެ ކޮމިޝަނުގެ މައިގަނޑު އެއް އަމާޒެވެ.

މި ބަޔާން ނިންމާލަމުން ކޮމިޝަނުން ވަނީ، ބްރޯޑްކާސްޓިންގ ދާއިރާ އިތުރަށް ހަރުދަނާކޮށް، ދާއިރާގައި މަސައްކަތްކުރާ ފަރާތްތަކުގެ ޙައްޤުތައް ހިމާޔަތްކުރުމަށް ކުރަމުންދާ މަސައްކަތްތައް ހުއްޓުމެއްނެތި ކުރިއަށްގެންދާނެ ކަމުގެ ފުރިހަމަ ޔަޤީންކަން އަރުވާފައެވެ.